އިސްރާއީލުގެ ވައިގެ ހަމަލާތަކުގައި ޣައްޒާގައި އެއް ޢާއިލާއެއްގެ 10 މީހުންނާއެކު 15 މީހުން ޝަހީދުވެއްޖެ
ހުކުރު ވިލޭރޭ އިސްރާއީލުން ޣައްޒާ ގައި ހިންގި ވައިގެ ހަމަލާތަކުގައި 15 މީހުން ޝަހީދުވެފައިވާ އިރު، ބުރާސްފަތި ދުވަހު 40 އާންމުން ޝަހީދުވެފައިވާ ކަމަށް ޣައްޒާގެ ސިވިލް ޑިފެންސުން ވަނީ ބުނެފައެވެ.
17 އޭޕްރީލް 2025 - ޣައްޒާގެ ދެކުނުގެ ޚާން ޔޫނިސް އަށް އިސްރާއީލުން ދިން ހަމަލާތަކުގައި ހަލާކުވި އިމާރާތެއްގެ ބައިތަކުގެ މަތީގައި ކުޑަކުދިންތަކެއް އިށީނދެގެން
ޣައްޒާ އަށް ހުކުރު ވިލޭރޭ އިސްރާއީލުން ދިން ވައިގެ ދެ ހަމަލާ އެއްގައި ފަލަސްތީނުގެ 15 މީހުން ޝަހީދުވެއްޖެއެވެ.
ޣައްޒާގެ ސިވިލް ޑިފެންސް އޭޖެންސީން ހުކުރު ދުވަހު ބުނެފައިވަނީ އިސްރާއީލުގެ ދެ ވައިގެ ހަމަލާއެއްގައި 15 މީހުން ޝަހީދުވި އިރު، މީގެ ތެރޭގައި އެއް ޢާއިލާއެއްގެ 10 މެމްބަރުން ހިމެނެއެވެ.
ސިވިލް ޑިފެންސްގެ ޓެލެގްރާމް މެދުވެރިކޮށް ތަރުޖަމާނު މަހްމޫދު ބައްސާލް ވިދާޅުވި ގޮތުގައި، ދެކުނު ޣައްޒާގެ ޚާން ޔޫނިސްގެ ބަނީ ސުހައިލާ ސަރަހައްދުގައި އިސްރާއީލުގެ އިސްތިއުމާރީ ބާރުން ދިން މި ހަމަލާގައި ގިނަ އަދަދެއްގެ ބަޔަކުޒަޚަމްވެފައިވާ ކަމަށެވެ.
އޭގެ ފަހުން ބައްސާލް އިތުރަށް ވިދާޅުވި ގޮތުގައި އުތުރު ޣައްޒާގެ ތާލް އަލް-ޒަޢާތަރުގައި ދެ ގެއަކަށް ދިން ހަމަލާއެއްގައި ޝަހީދުވި އިތުރު "5 މީހުންގެ ހަށިގަނޑު" ނަގާފައިވާ ކަމަށެވެ.
މާރޗް 18 ގައި ޣައްޒާގައި އަލުން ހަނގުރާމަ ފެށުމަށްފަހު، އިސްރާއީލުގެ އަސްކަރިއްޔާ އިން ވައިގެ ހަމަލާތައް އިތުރުކޮށް، އަދި ބިމުގެ އޮޕަރޭޝަންތައް ފުޅާކޮށްފައިވެއެވެ.
އެންމެ ފަހުން މި ދިން ހަމަލާތަކާ ގުޅޭގޮތުން އިސްރާއީލުގެ އަސްކަރިއްޔާ އިން އެއްވެސް ކޮމެންޓެއް ކޮށްފައެއް ނުވެއެވެ.
ބުރާސްފަތި ދުވަހު، ސިވިލް ޑިފެންސް އޭޖެންސީން ރިޕޯޓުކުރި ގޮތުގައި އިސްރާއީލުގެ ހަމަލާތަކުގައި މަދުވެގެން 40 އާންމު ރައްޔިތުން ޝަހީދުވެފައިވެއެވެ. މީގެ ގިނަ މީހުންނަކީ ހިޖުރަކުރި މީހުންގެ ކޭމްޕްތަކުގައި ތިބި މީހުންނެވެ.
