ކޮރަޕްޝަންގެ ބޮޑެތި ތުހުމަތުތަކެއް ކުރެވޭ "ކެއިރެޓްސޫ" އަށް 136.8 މިލިއަން ރުފިޔާގެ މަޝްރޫޢު އެއް ހަވާލު ކުރި މައްސަލަ އެއް ފެންމަތިވެއްޖެ އެވެ.

މި މައްސަލަ ފެންމަތިވެފައި ވަނީ މީސްމީޑިއާގައި އެ ކުންފުންޏަށް 3 ފަޔަރ ޓްރަކް ގެނައުމަށް ޕްރޮކިއުމެންޓް، 138.6 މިލިއަން ރުފިޔާގެ އަގަކަށް ހަވާލު ކުރިކަމުގެ އަޑު ފެތުރެން ފެށުމާއި އެކުގައެވެ. މިކަމާއި ގުޅޭ ގޮތުން ރާއްޖެ އެމްވީ އަށް މައުލޫމާތު ދިން އިތުބާރު ހުރި މަސްދަރަކުން ބުނީ އެ ކުންފުންޏާއި ހަވާލުކޮށްގެން 3 ރޯސެންބަޔަރ ފަޔަރ ޓްރަކް ގެންނަ ކަމަށް މައުލޫމާތު ލިބިފައިވާ ކަމަށެވެ. އެއީ ގާތްގަނޑަކަށް ޓްރަކަކަށް 3 މިލިއަން ޑޮލަރެވެ.

މި ކުންފުންޏަކީ ގްރޫޕް ހަދައިގެން ކުށްކުރާ ގްރޫޕަކާއި ގުޅުން އޮންނަ ކުންފުންޏެއް ކަމަށް މި ކަމާއި މެދު ފާޑު ކިޔާ މީހުން ދަނީ ބުނަމުންނެވެ. އަދި މި މަރުހަލާ ކުރިއަށް ގެންދިޔައީ ކޮަރަޕްޝަންގެ ބޮޑެތި އަމަލުތަކެއް އޭގައި ހިމެނޭ ގޮތަށް ކަމަށް ވެސް ވަނީ ބުނެފަ އެވެ. އެގޮތުން މި މަޝްރޫޢު އަށް ބިޑް ހުށަހެޅި އެހެން 4 ޕާޓީއަކުން ކުއްލިއަކަށް އަގު ދަށްކޮށްފައިވާތީ އެކަމާއި މެދު ވަނީ ސުވާލު އުފެދިފަ އެވެ. އަދި މި ކުންފުންޏާއި ޓްރަކް ގެންނަން ހަވާލުކުރީ ނައިބު ރައީސް ހުސެއިން މުހައްމަދު ލަތީފްގެ ލަފާގެ މަތިން ކަމަށް ވަނީ އަޑު ފެތުރިފަ އެވެ. މި ޕްރޮޖެކްޓް ކޯޓް ކުރީ ދިވެހި ފައިސާ އިން ކަމަށް ވީ ނަމަވެސް އެމްއޭސީއެލް އިން ފައިސާ ދައްކާފައި ވަނީ އެމެރިކާ ޑޮލަރުން ކަމަށް ވަނީ މައުލޫމާތު ލިބިފަ އެވެ.

މިކަމާއި ގުޅޭ ގޮތުން ރަސްމީ އިދާރާ އެއްގެ ބަހެއް ވަނީ ލިބޭ ގޮތް ނުވެފަ އެވެ.

އެހެންނަމަވެސް މި މަޝްރޫޢު އެ ކުންފުންނާއި ހަވާލުކުރުމާއި އެކު 2020 ވަނަ އަހަރު އެ ކުންފުނި ހިމެނޭ ބިލްޑިން ބަލާ ފާސްކުރަން ނެރެފައިވާ ކޯޓު އަމުރެއް އެއާއި އެކު ވަނީ ދައުރުވާން ފަށާފަ އެވެ. އެ ކޯޓު އަމުރަކީ ހ.ފެންނާގޭގައި ހުންނަ ކެއިރެޓްސޫ ޕްރައިވެޓް ލިމިޓެޑާއި އެ ކުންފުންޏާއި ގުޅިފައިވާ އެ ގޭގެ ހުރިހާ ތަނެއް ފާސްކުރުމަށް ދީފައިވާ ކޯޓު އަމުރެކެވެ. އެ ލިޔުންތަކުން އެނގޭ ގޮތުން އެ ކުންފުންޏާއި، އެމްއެމްޕީއާރްސީ އަދި އަމީން އެވެނިއު ހިމެނޭހެން މަނީ ލައުންޑަރކުރިކަމުގެ ހެކި ވަނީ ލިބިފަ އެވެ.

އެ ކޯޓު އަމުރުގައި ބުނެފައިވާ ގޮތުން އެ ގެ އާއި އޮފީސް ފާސްކުރަން ކޯޓު އަމުރު ނެރެދިން ސަބަބުތަކުގެ ތެރޭގައި މޯލްޑިވްސް މާކެޓިކް އެންޑް ޕަބްލިކް ރިލޭޝަންސް ކޯޕަރޭޝަން ( އެމްއެމްޕީއާރްސީ ) މެދުވެރިކޮށް ރިސޯޓް ތަރައްޤީކުރުމަށް ރާއްޖޭގެ ފަޅުތަކާއި ރަށްތައް ކޮރަޕްޝަންގެ އަމަލުތަކެއް ހިމެނޭ ގޮތަށް އެކި ފަރާތްތަކަށް ކުއްޔަށް ދޫކުރުމުގައި އިކުއިޒިޝަންގެ ގޮތުގައި ލިބުނު ފައިސާ އާއި ކޮރަޕްޝަންގެ އަމަލުތައް ހިމެނޭ ގޮތަށް ބޭރު ފައިސާ ގަނެދިނުމުގެ ނަމުގައި ދައުލަތުގެ ކުންފުނިތަކުން އެމްއެމްޕީއާރްސީ އަށް ފައިސާ ހޯދުމަށް ފަހު އެ ފައިސާ އަށް ޚިޔާނާތްތެރިވެ، އެ ފައިސާ ލައުންޑަރ ކޮށްފައިވާ ކަމަށް ތުހުމަތު ކުރެވޭ މައްސަލައިގައި އެ ފައިސާ އިން މާލީ މަންފާ ލިބޭ ފަރާތްތަޖާއު ކުންފުނިތަކުން ކުށްކޮށްގެން ލިބުނު ފައިސާ އިންވެސްޓްކޮށްގެން މުދަލަށް ބަދަލުކުރި ކަމަށް އެ ކުންފުނީގެ މައްޗަށް ވަނީ ތުހުމަތު ކުރެވިފަ އެވެ.

މީގެ އިތުރުން ދައުލަތުގެ އިދާރާތަކުން ހިންގާފަިއވާ ޕްރޮޖެކްޓްތަކާއި ގުޅިގެން މަޤާމުގެ ނުފޫޒު ބޭނުންކޮށްގެން ހިންގާފަިއވާ ކޮރަޕްޝަނާއި ޚިޔާނާތުގައި ބައިވެރިވާ ކަމަށް ތުހުމަތު ކުރެވުމާއި ރިޝްވަރު ދިނުމާއި، ރިޝްވަތު ދިނުމުގައި މެދުވެރި އެއްގެ ދައުރު އަދާކުރާ ކަމަށް ވެސް ވަނީ ތުހުމަތު ކުރެވިފައި ކަމަށް މި މައްސަލައިގެ ކޯޓު އަމުރުގައި ވަނީ ބުނެފަ އެވެ.