އިސްރާއީލުން ޣައްޒާގެ ހޮސްޕިޓަލަކަށް ދިން ވައިގެ ހަމަލާއެއްގައި ސިއްހީ އެހީތެރިޔަކު ޝަހީދުކޮށްލައިފި

އިސްރާއީލުން ޣައްޒާގެ ފީލްޑް ހޮސްޕިޓަލެއްގެ އުތުރު ގޭޓަށް އަންގާރަ ދުވަހު ދިން ވައިގެ ހަމަލާއެއްގައި ސިއްހީ އެހީތެރިއަކު ޝަހީދުވެއް އިތުރު ނުވަ މީހަކު ޒަޚަމްވެފައިވާ ކަމަށް އެ ހޮސްޕިޓަލުގެ ތަރުޖަމާނު ވިދާޅުވެއްޖެ އެވެ.

މުވާސީ ސަރަހައްދުގައި ހުންނަ ކުވޭތުގެ ފީލްޑް ހޮސްޕިޓަލަށް ހަމަލާ އަމާޒު ކޮށްފައިވާއިރު، އެތަނަކީ އެތައް ހާސް ބަޔަކު ޓެންޓް ތަކުގައި ހިޔާވަހިކަން ހޯދަމުން ދިޔަ ސަރަހައްދެކެވެ. ޒަހަމްވި އެންމެންނަކީ ވެސް ބަލި މީހުންނާއި ބޭސްވެރިން ކަމަށާއި ހަމަލާއަށްފަހު އޭގެ ތެރެއިން ދެ މީހެއްގެ ހާލު ސީރިއަސް ކަމަށް ހޮސްޕިޓަލުގެ ތަރުޖަމާނު ސަބަރު މުހައްމަދު ވިދާޅުވި އެވެ.

މިކަމާ ގުޅިގެން އިސްރާއީލުގެ އަސްކަރިއްޔާ އިން ވަކި އެއްޗެއް ބުނެފައި ނުވެއެވެ.

18 މަސް ދުވަހުގެ ހަނގުރާމައިގެ ތެރޭގައި އަސްކަރިއްޔާއިން ވަނީ ހަމާސްގެ ހަނގުރާމަވެރިން އެތަންތަނުގައި ތިބޭ ކަމަށް ބުނެ ނުވަތަ އަސްކަރީ ބޭނުންތަކަށް ބޭނުންކުރާ ކަމަށް ބުނެ އެކި ފަހަރު މަތިން ހޮސްޕިޓަލްތަކަށް ހަމަލާދީފަ އެވެ. ހޮސްޕިޓަލުގެ މުވައްޒަފުން ވަނީ އެ ތުހުމަތުތައް ދޮގުކޮށް އިޒްރޭލުން ފަރުވާކުޑަކޮށް އާންމުންނަށް ނުރައްކާކޮށް އެ ސަރަހައްދުގެ ސިއްހީ ނިޒާމު ހަލާކުކޮށްލާ ކަމަށް ތުހުމަތުކޮށްފަ އެވެ.

މިދިޔަ އާދީއްތަ ދުވަހު އިސްރާއީލުން ވަނީ ޣައްޒާގެ އުތުރުގައި ކްރިޓިކަލް ކެއާ ފޯރުކޮށްދޭ އެންމެ ފަހު ބޮޑު ހޮސްޕިޓަލަށް ހަމަލާ ދީފައިވަނީ މީހުން ހުސްކުރަން އެންގުމަށް ފަހު އެވެ. އަދި އެ މީހުން ހުސްކުރުމުގެ ތެރޭގައި ބަލި މީހަކު މަރުވެފައިވާ ކަމަށާއި ހަމަލާގެ ސަބަބުން އެމަޖެންސީ ރޫމާއި ފާމަސީ އާއި ވަށައިގެންވާ އިމާރާތްތަކަށް ބޮޑެތި ގެއްލުންތަކެއް ލިބިފައިވާ ކަމަށް އަލްއަހްލީ ހޮސްޕިޓަލުން ބުނެފައިވެ އެވެ.

ޑަބްލިއުއެޗްއޯގެ ވެރިޔާ ޓެޑްރޯސް އަދަނޮމް ގެބްރިޔޭސުސް އެކްސްގައި ވިދާޅުވީ ޣައްޒާގެ އުތުރުގައި ހުންނަ އަލް އަހްލީ ހޮސްޕިޓަލަށް ދިން ހަމަލާއަށްފަހު ފަރުވާ ނުލިބުމުގެ ސަބަބުން ކުޑަކުއްޖަކު ޝަހީދުވެފައިވާ ކަމަށެވެ.

އަދި އިމަޖެންސީ ރޫމާއި ލެބޯޓްރީ އާއި އިމަޖެންސީ ރޫމްގެ އެކްސްރޭ މެޝިނާއި ފާމަސީ ހަލާކުވެފައިވާ ކަމަށް އޭނާ ވިދާޅުވި އެވެ. މި ހަމަލާއާއި ގުޅިގެން 50 ބަލިމީހުން އެހެން ހޮސްޕިޓަލްތަކަށް ގެންދަން މަޖުބޫރުވި އިރު، ކްރިޓިކަލް 40 ޕޭޝަންޓުން ގެންދެވޭ ގޮތެއް ނުވިކަމށް ޓެޑްރޯސް ވިދާޅުވިއެވެ.

ހޮސްޕިޓަލް ހިންގާ ގުދުސްގެ އެޕިސްކޯޕަލް ޑައިއޯސިސް އިން ވަނީ މި ހަމަލާ ކުށްވެރިކޮށްފަ އެވެ.

އިޒްރޭލުން ބުނީ އެ ފެސިލިޓީގެ ތެރޭގައި ހުންނަ ހަމާސް ކޮމާންޑް އެންޑް ކޮންޓްރޯލް ސެންޓަރަކަށް ހަމަލާދިން ކަމަށެވެ. ނަމަވެސް ހަމާސް އިން ވަނީ އެ ތުހުމަތުތައް ދޮގުކޮށްފަ އެވެ. ޣައްޒާގެ މަދަނީ ދިފާއީ އިދާރާއިން ބުނީ މި ހަމަލާ ދީފައިވަނީ އިޒްރޭލުގެ އަސްކަރިއްޔާއިން އެތަނުން ފޭބުމަށް އިންޒާރު ދިންތާ މިނެޓެއް ފަހުން ކަމަށެވެ.

ހަނގުރާމަ ފެށުނީ 2023 ވަނަ އަހަރުގެ އޮކްޓޯބަރު މަހުގެ 7 ވަނަ ދުވަހު ހަމާސް ޖަމާއަތުން އިސްރާއީލުގެ ދެކުނުގެ ސަރަހައްދަށް ދިން ހަމަލާގައި 1200 އެއްހާ މީހުން މަރުވެ، 251 މީހުން ރަހީނުކުރުމުންނެވެ. ޣައްޒާގައި 59 މީހުން އަދިވެސް ތިބިއިރު، އޭގެ ތެރެއިން 24 މީހުން ދިރިތިބި ކަމަށް ބެލެވޭ އިރު، ބާކީ ތިބި ގިނަ މީހުން ހަނގުރާމަ ހުއްޓާލުމުގެ އެއްބަސްވުންތަކުގައި ނުވަތަ އެހެނިހެން އެއްބަސްވުންތަކުގައި ދޫކޮށްލި އެވެ.

ޣައްޒާގެ ޞިއްޙަތާބެހޭ ވުޒާރާއިން އަންގާރަ ދުވަހު އާންމުކުރި އަޕްޑޭޓް ކޮށްފައިވާ ތަފާސް ހިސާބުތައް ދައްކާގޮތުން އިޒްރޭލުން ބަދަލުހިފުމުގެ ޙަމަލާތަކުގައި މިހާތަނަށް 51،000 އަށްވުރެ ގިނަ މީހުން ވަނީ ޝަހީދުކޮށްލާފައެވެ. އޭގެ ތެރޭގައި އިސްރާއީލުން ހަނގުރާމަ ހުއްޓާލި ފަހުން ޝަހީދުކޮށްލި 1600 އަށް ވުރެ ގިނަ މީހުން ހިމެނެއެވެ. އަދި އެއްބަސްވުމަށް ގެނައި ބަދަލުތައް ބަލައިގަތުމަށް ހަމާސް އަށް ޕްރެޝަރު ކުރުމުގެ ގޮތުން މިދިޔަ މަހު އަލުން އިޒްރޭލުން ވަނީ ހަމަލާތައް ދޭން ފަށާފަ އެވެ.