300 ދުވަސް ފަހުން މަޖިލީހުގެ ކޮމިޓީން ނިންމީ، ފަލަސްތީނަށް ދޭ ހަމަލާތައް ހުއްޓާލަން ދެން އިސްރާއީލް ޕާސްޕޯޓް މަނާކުރަން
10 ޖޫން 2024 ގައި އެ ބިލު މަޖިލީހަށް ބަލައިގަތުމަށް ފާސް ކުރި
އިސްރާއީލް ޕާސްޕޯޓު
އިސްރާއީލުގެ ޕާސްޕޯޓްގައި ދިވެހިރާއްޖެ އެތެރެވުން ހުއްޓުވުމަށް ހުށަހަޅައިފައިވާ މައްސަލަ އާއި ގުޅިގެން ފަލަސްތީނަށް އިސްރާއީލުން ދެމުންގެންދާ ހަމަލާތައް ހުއްޓާލަންދެން އިސްރާއީލް ޕާސްޕޯޓުގައި ރާއްޖެ އެތެރެވުން މަނާކުރުމަށް ރައްޔިތުންގެ މަޖިލީހުގެ ސަލާމަތީ ޚިދުމަތްތަކާ ބެހޭ ކޮމިޓީ (241 ކޮމިޓީ)ން ނިންމައިފިއެވެ.
އެގޮތަށް ނިންމާފައި ވަނީ ހޯމަ ދުވަހު ބޭއްވި އެ ކޮމިޓީގެ ބައްދަލުވުމުގައި ކަމަށް ވާ އިރު މި ނިންމުން ނިންމާފައި މި ވަނީ އިޒްރޭލު ޕާސްޕޯޓު މަނާކުރަން ދިވެހި ސަރުކާރުން ނިންމާފައިވާ ކަމަށް ސަރުކާރުން އިއުލާނުކުރިތާ 316 ދުވަސް ފަހުންނެވެ.
ހޯމަ ދުވަހުގެ ކޮމިޓީގައި އެ ހުށަހެޅުއްވުން ހުށަހެޅުއްވީ ހުޅުދޫ ދާއިރާގެ މެންބަރު އަދި ޕީއެންސީގެ ޑެޕިއުޓީ ޕީޖީ ލީޑަރު މުހައްމަދު ޝާހިދުއެވެ. އޭނާ ހުށަހެޅުއްވީ އިސްރާއީލުން ފަލަސްތީނަށް ދޭ ހަމަލާތައް ހުއްޓާލަން ދެން އިސްރާއިލް ޕާސްޕޯޓުގައި ރާއްޖެ އެތެރެވުން މަނާކުރުމަށެވެ. ޝާހިދު ވަނީ މި ބިލުގައި އިޒްރޭލު މީހަކު އެހެން ގައުމެއްގެ ޕާސްޕޯޓުގައި ރާއްޖެ އެތެރެވުން މަނާ ކުރާ ގޮތަށް އޮތް ބައި އުނިކުރުމަށް ނިންމާފައެވެ.
މި ދެ އިސްލާހަށް ވެސް ތާއީދުކުރައްވާފައި ވަނީ ވިލިމާލޭ ދާއިރާގެ މެންބަރު އަދި ޕީއެންސީގެ ޑެޕިއުޓީ ޕީޖީ ލީޑަރު މުހައްމަދު އިސްމާއިލެވެ. ކޮމިޓީން ބިލް ފާސްކޮށްފައި ވަނީ މި އިސްލާހުތަކާއި އެކު ކޮމިޓީ މެމްބަރުންގެ އިއްތިފާގުންނެވެ.
މިފަދަ އިސްލާހެއް ކޮމިޓީ މަރުހަލާގައި ގެނެސްފައި ވާއިރު އިސްރާއީލު ޕާސްޕޯޓު މަނާކުރުމުގެ ބިލަށް އިމިގްރޭޝަނުން އިސްލާހެއް ހުށަހަޅާފައި ވަނިކޮށެވެ. މި ބިލުގައި ވަނީ އިސްރާއީލުގެ ޕާސްޕޯޓު ގެންގުޅޭ މީހުން ރާއްޖެ އަށް އެތެރެވުން މަނާކުރުމަށް ހިމަނާފައެވެ. އެހެންނަމަވެސް އިމިގްރޭޝަނުން ހުށަހަޅާފައިވާ އިސްލާހުގައި ބުނަނީ ރާއްޖެ އެތެރެވުމަށް ހަމައެކަނި އިސްރާއީލުގެ ޕާސްޕޯޓު ހުށަހަޅާ ފަރާތްތަކަށް އެތެރެވުން މަނާކުރުމަށެވެ.
އެ އިދާރާ އިން ބުނެފައި ވަނީ މި އިސްލާހު ހުށަހަޅަނީ ބިދޭސީން ރާއްޖެ އެތެރެވާ އިރު އެ މީހުން ނިސްބަތްވާ ޤައުމިއްޔަތު ދެނެގަތުމަށް ބަލަނީ، އެ ބިދޭސީން ހުށަހަޅާ ޕާސްޕޯޓު ކަމަށް ވެފައި، އެ މީހާ އަކީ ދެ ގައުމެއްގެ ޕާސްޕޯޓު އޮންނަ ޑުއަލް ސިޓިޒަނެއްކަން ކަށަވަރުކުރެވެން ނެތުގެ ސަބަބުން ކަމަށެވެ.
މީގެ ކުރިން ބަންޑާރަނައިބު އަހުމަދު އުޝާމް ވެސް ވަނީ އިސްރާއީލްގެ ޕާސްޕޯޓު އޮންނަ އެންމެންނަށް ރާއްޖެއަށް އެތެރެ ނުވެވޭ ގޮތަށް އޮތް އޮތުން ބަދަލުކުރުމަށް ވަކާލާތުކުރައްވާފައެވެ.
10 ޖޫން 2024 ގައި އެ ބިލު މަޖިލީހަށް ބަލައިގަތުމަށް ފާސްކޮށް، މަޖިލީހުގެ ސަލާމަތީ ޚިދުމަތްތަކާ ބެހޭ ކޮމިޓީއަށް ވަނީ ފޮނުވާފައެވެ. ނަމަވެސް މީގެ ކުރިން މި ބިލާ ގުޅިގެން ކޮމިޓީގެ ބައްދަލުވުމެއްވެސް ނުބާއްވާތީ އެކަމަށް މެމްބަރުން އައީ ފާޑުކިޔަމުންނެވެ.
މި ބިލު ރައްޔިތުންގެ މަޖިލީހުގެ ތެރޭގައި ހުއްޓުވައިފައި އޮންނަތާ 9 މަސް ދުވަސް ވުމަށް ފަހު ބިލުގެ މަސައްކަތް އަލުން ފަށާފައި މި ވަނީ މި މައްސަލަ އާއި މެދު އާއްމުން ނުރުހުންވެ އެއްވުންތަކާއި މުޒާހަރާތައް ބާއްވަމުންދަނިކޮށެވެ.
އެގޮތުން އާއްމުން ދަނީ މި ސަރުކާރުން އަދި މި ސަރުކާރުގެ ފުރިހަމަ އަގުލަބިއްޔަތު އޮންނަ މަޖިލީހަށް ހުށަހަޅަން ބޭނުންވާ އެތައް ބިލަކާއި އެހެނިހެން މަސައްކަތްތައް ހުށަހަޅައި، މަދު ގަޑިއިރެއްގެ ތެރޭގައި، ގިނަ ބިލުތަކެއް ފާސް ކުރާ އިރު މި ބިލާއި މެދު އަމަލުކުރާ ގޮތާއި މެދު ސުވާލު އުފައްދަމުންނެވެ.
މީގެ އިތުރުން 20 ނޮވެންބަރު 2024 ގައި މަޖިލީހުގައި ބޭއްވި ޖަލްސާއަށް އިޒްރޭލު ޕާސްޕޯޓުގައި ރާއްޖެއަށް މީހުން އައުން މަނާ ކުރުމަށް މަޖިލިހަށް ހުށަހަޅާފައިވާ ބިލުގެ މައްސަލަ އަވަސް ކުރުމަށް ގޮވާލާ މަޖިލީހަށް އިދިކޮޅު އެމްޑީޕީން ގަރާރެއް ހުށަހެޅުމުން އެ ގަރާރުވެސް ވަނީ ބޭރުކޮށްލާފައެވެ. އަދި ދާދި ފަހުން މި ކަމާއި ގުޅިގެން ހުށަހެޅި ކުއްލި މައްސަލަ ވެސް ބަލައިގަނެފަ އެއް ނުވެއެވެ.
