އިސްރާއިލުން ރަފަހް އިތުރަށް ސުންނާފަތިކޮށް، އާއްމުން އެ ސަރަހައްދު ދޫކޮށް ދާން މަޖުބޫރު ކުރަނީ
ފާއިތުވި 10 ދުވަހުގެ ތެރޭގައި ހިންގި އޮޕަރޭޝަންތަކުގައި ދިހަވަރަކަށް ޓެރަރިސްޓުން މަރާލާފައިވާ ކަމަށް އިސްރާއީލުން ބުނޭ
އިސްރާއީލުގެ ސިފައިން ރަފާހުގެ ތާލް އަސް-ސުލްތާން ސަރަހައްދުގައި އޮޕަރޭޝަނާއި އެކު ކުރިއަށް ދަނީ - އޭޕްރީލް 2، 2025
އިސްރާއިލުން ފަލަސްތީނުގެ ރަފަހް އިތުރަށް ސުންނާފަތިކޮށް، އާއްމުން އެ ސަރަހައްދު ދޫކޮށް ދާން މަޖުބޫރު ކުރަން ފަށައިފި އެވެ.
ޣައްޒާގެ ދެކުނުގައި އިންފްރާސްޓްރަކްޗަރ ހަލާކުކޮށް، ފުރިހަމަ ކޮންޓްރޯލް ހޯދުމަށް ކުރިއަށްދާ އޮޕަރޭޝަންތަކުގެ ތަސްވީރުތަކާއި ފޫޓޭޖްތައް އިސްރާއީލު ސިފައިން ވަނީ އާއްމުކޮށްފަ އެވެ. އިންފްރާސްޓްރަކްޗަރ ހަލާކުކުރުމާއި އެކު ފަލަސްތީނުގެ އާއްމުން މަރަމުންދާ މަންޒަރު ފެންނަމުންދާ ކަމަށް މީޑިއާޓަކުން ވަނީ ރިޕޯޓްކޮށްފަ އެވެ. އަދި މީޑިއާ ފުޓޭޖްތަކުން އިސްރާއީލް ސިފައިންގެ ޓޭންކްތަކާއި އާމަރޑް ވެހިކަލްތައް ކުރިއަށްދާ މަންޒަރު ވެސް ފެނެއެވެ. އެހެންކަމުން އެ ސަރަހައްދުތަކުގައި ބިރުވެރިކަން ފެތުރިފައިވާ މިންވަރު އެ ވީޑިއޯތަކުން ހާމަވެ އެވެ.
ފަލަސްޠީނުގެ ޣައްޒާގެ އެންމެ ދެކުނުގައި އޮތް ރަފަޙް އެހެން ސަރަހައްދުތަކާއި ވަކިކޮށް އެ ސަރަހައްދު އިސްރާއީލް ސިފައިން ވަނީ އެކަހެރިކޮށްފައި ކަމަށް މީޑިއާ ރިޕޯޓްތައް ބުނެއެވެ. އަދި ޔަހޫދީ ފައުޖުން ވަނީ ރަފަޙާއި ޣައްޒާގެ އެހެން ރަށްތަކާ ގުޅޭ ރޮނގު ވެސް އެއްކޮށް އިސްރާއިލުގެ ބާރުގެ ދަށަށް ގެންގޮސްފައެވެ. މީގެ އިތުރުން ސިފައިންނާއި ބަރު ހަތިޔާރު ބޭނުން ކޮށްގެން އެ ސަރަހައްދުގައި ހުރަހެއް ވަނީ ޤާއިމްކޮށްފަ އެވެ.
އައިޑީއެފުން ނެރުނު ބަޔާނެއްގައި ބުނެފައިވަނީ ފާއިތުވި 10 ދުވަހުގެ ތެރޭގައި ހިންގި އޮޕަރޭޝަންތަކުގައި "ދިހަވަރަކަށް ޓެރަރިސްޓުން މަރާލައި، ބިމުގެ އަޑީގައި ހުރި ޓަނަލް ރޫޓުތަކާއި ހަމާސްގެ ޓެރަރިސްޓް އިންފްރާސްޓްރަކްޗަރ ރޫޅާލައި، ރަފަޙް ވަށާލުން ނިންމާފައިވާ" ކަމަށެވެ.
މިއީ ހަމާސް އަށް ޕްރެޝަރކޮށް ހުރިހާ ރަހީނުން މިނިވަންކުރުމަށް ކުރާ ކަމެއް ކަމަށް އައިޑީއެފުން ބުނެއެވެ. އަދި ވަރަށް އަވަހަށް އައިޑީއެފް އިން ޣައްޒާގެ ބޮޑު ބައެއްގައި އޮޕަރޭޝަންތައް ވަރުގަދަ ކުރާނެ ކަމަށް އިސްރާއީލްގެ ޑިފެންސް މިނިސްޓަރު އިސްރާއީލް ކަޓްޒް ނެރުނު ބަޔާނެއްގައި ވިދާޅުވި އެވެ.
