ހަފްތާ ބަންދުގައި ރައީސްގެ އާއިލާގެ ފަރިއްކޮޅަށް ގެރިމަސް، ޝްރިމްޕް އަދި ކަންބަޅި މަސް، ބިލަށް 9 ހާސް
ރައީސުލްޖުމްހުރިއްޔާގެ އާއިލާގެ ހަފްތާ ބަންދުގެ ފަރިއްކޮޅު ހެދުމަށް ޓަކައި އަގުބޮޑު މަހުގެ ބާވަތްތަކުގެ ބިލަށް 9,849.87 ރުފިޔާ ހޭދަކޮށްފައިވޭ
ރައީސްގެ އާއިލާގެ ހަފްތާ ބަންދުގެ ކެއުމަށް ގެނެސްފައިވާ ސާމާނުތައް ފެންނަ ފޮޓޯއެއް
ރައީސުލްޖުމްހުރިއްޔާގެ އާއިލާގެ ހަފްތާ ބަންދުގެ ފަރިއްކޮޅު ހެދުމަށް ގަނެފައިވާ އަގުބޮޑު މަހުގެ ބާވަތްތަކުގެ ބިލަށް 9 ހާހަށްވުރެ ގިނަ ރުފިޔާ އަރާފައިވާކަން ހާމަވެއްޖެއެވެ.
ހަފްތާ ބަންދުގައި ރައީސްގެ އާއިލާއާއި، ރަޓެހިންނާއި، ވަޒީރުންގެ ކަންކަން ހަމަޖައްސާފައި އޮންނަނީ އާރަށުގައި ކަމަށް ބުނާ އަޑުތައް ފެތުރި، އާރަށުގައި ކުރާ ހަރަދުތައް ދޭން އެމްއެންޑީއެފުން ދެކޮޅު ހަދަމުން ދަނިކޮށް ލީކުކޮށްލާފައިވާ އިންވޮއިސްއެއްގައި ވަނީ މަހުގެ ބާވަތްތަކަށް އެކަނި ވެސް 9.849.87 ރުފިޔާ ހަރަދުކޮށްފައިވާ ކަމަށެވެ.
މި އިންވޮއިސްގައި ވާ ގޮތުން ގަނެފައިވަނީ ސްޕާޓާ ބީފް ކިއުބުގެ 10 ޕެކެޓާއި، އޭ ގްރޭޑުގެ ގަނޑުކުރި ޝްރިމްޕުގެ 10 ފެކެޓާއި ކަންބަޅި މަހުގެ 15 ޕެކެޓެކެވެ.
ސްޕާޓާ ބީފް ކިއުބްސް އަކީ އާންމުކޮށް ޝިން ނުވަތަ ޓޮޕްސައިޑުން ތައްޔާރުކުރާ ބޯންލެސް އަދި ބޯން އިން ދެ ބާވަތްތަކުގައި ވެސް ލިބެން ހުންނަ ޕްރީ-ކަޓް، ފްރޯޒެން ބީފް ޕްރޮޑަކްޓެކެވެ. މި ކިއުބްތަކަކީ ސްޓޫކުރުމާއި ގްރިލިން ނުވަތަ އެހެނިހެން ކަލިނަރީ ބޭނުންތަކަށް ބޭނުންކުރާ ކިއުބްތަކެކެވެ.
ކްލާސް އޭ ގެ ގޮތުގައި ގިންތިކޮށްފައިވާ ފްރޯޒެން ޝްރިމްޕްސް އަކީ ކޮލިޓީގެ މަތީ މިންގަނޑަކަށް ފެތޭ، ގިނަ ފަހަރަށް ކޯޑެކްސް އެލިމެންޓޭރިއަސް ފަދަ ޖަމިއްޔާތަކުގެ ވަކި ގައިޑްލައިންތަކަކަށް ހުންނަ އެއްޗެކެވެ. އޭގެ މާނައަކީ އާންމުގޮތެއްގައި އެތަކެތި އަވަހަށް ފްރީޒްކޮށް، ކޮލިޓީ ހިފެހެއްޓުމަށްޓަކައި ޑީޕް ފްރީޒްކޮށް ބެހެއްޓުމާއި، ނޮޅައި ސާފުކޮށް ހުންނަ އެއްޗެކެވެ. ކްލާސް އޭ ފްރޯޒެން ޝްރިމްޕް އަކީ ގިނަ ފަހަރަށް މަޝްހޫރު ސަޕްލަޔަރުންގެ އަތުން ހޯދާ، ވަރަށް ރަނގަޅަށް ކޮލިޓީ ޗެކްކުރާ އެއްޗެކެވެ.
ލެމްބް ޗޮޕްސް އަކީ ކަންބަޅީގެ މޭ ކަށިގަނޑުން ފެށިގެން މައިބަދަ ހިމެނޭހެން ނަގާފައި ހުންނަ އެއްޗެކެވެ. މި މަސް ނަގަނީ 1 އަހަރު ނުވާ ކަންބަޅި ކަތިލައިގެންނެވެ. މިއީ އަގޮބޮޑު އެއްޗެކެވެ.
ސްޕާޓާ ބީފް ކިއުބްސްގެ 10 ޕެކެޓަށް 2611.20 ރުފިޔާ ހޭދަކޮށްފައިވެއެވެ. އަދި ޝްރިމްޕް 10 ޕެކެޓަށް1564.90 ރުފިޔާ ހޭދަކޮށްފައިވާ އިރު، ކަންބަޅި މަހުގެ 15 ޕެކެޓަށް 4389 ރުފިޔާ ވަނީ ހޭދަކޮށްފައެވެ.
އިންވޮއިސް ހަދާފައިވަނީ މުލިއާގެ/އާރަށް ނަންމަތީގައެވެ. އަދި ތަކެތި ގަނެފައިވާ ތާރީހެއްގެ ގޮތުގައި އިނީ 10 އެޕްރީލް 2025 އެވެ.
އާންމު ގޮތެއްގައި ރައީސްގެ އާއިލާ ހަފްތާ ބަންދު ހޭދަކުރަނީ އާރަށުގައެވެ. މީގެ ކުރިންވެސް ކައިރި ރިސޯޓްތަކުން ފަސްޓްލޭޑީ އަގުބޮޑު ކާބޯތަކެތި އޯޑަރުކުރާކަމުގެ އަޑުތައް ފެތުރިފައިވާ އިރު، މައުލޫމާތު ލިބޭ ގޮތުގައި މިއީ އާރަށުގައި މި ހަފްތާ ބަންދުގައި ބޭނުންކުރުމަށް ގަނެފައިވާ ތަކެއްޗެވެ.
މި އިންވޮއިސްއާއެކު އާންމުންގެ ފާޑުކިއުންތައް އަމާޒުވެފައިވާ އިރު، ބައެއް ފަރާތްތަކުން ބުނެފައިވަނީ މުސާރައިން ރަނގަޅަށް 1 އިރުގެ ކެއުން ހަމަޖައްސާ ނުލެވޭއިރު، ރައީސް ފަރިއްކުޅުއްވަނީ ކަންބަޅީގެ މަސް ކަމަށެވެ. ފާޑުކިޔާ ފަރާތްތަކުން ވަނީ މިއީ ރައްޔިތުންނަށް ދޭންޖެހޭ މުސާރައިން ގަނެފައިވާ ތަކެތިތޯ ސުވާލުކޮށްފައެވެ.
