މޯލްޑިވް ގޭސްއިން ފައިސާ ގެއްލުނުކަމަށް ބުނާ މައްސަލަ އޭސީސީ އިން ތަހުގީގުކުރަނީ

ރާއްޖެއަށް ގޭސް އެތެރެކުރާ ސަރުކާރުގެ ކުންފުނި، މޯލްޑިވް ގޭސްއިން ގޭހުގެ ޝިޕްމަންޓަކަށް ދެއްކި އެޑްވާންސް ފައިސާ ވީނުވީއެއް ނޭނގި ގެއްލިފައިވާކަން ހާމަވުމާއި އެކު މި މައްސަލަ އެންޓި ކޮރަޕްޝަން ކޮމިޝަން (އޭސީސީ) އިން ތަހުގީގުކުރަން ފަށައިފި އެވެ.

މޯލްޑިވް ގޭސްއިން ގޭހުގެ ޝިޕްމަންޓަކަށް ދެއްކި އެޑްވާންސް ފައިސާ ވީނުވީއެއް ނޭނގި ގެއްލިފައިވާކަން ހާމަކުރެއްވީ ރައްޔިތުންގެ މަޖިލީހުގެ މާލިއްޔަތު ކޮމިޓީ ބައްދަލުވުމުގައި، މަޖިލީހުގެ ނައިބު ރައީސް އަދި ދިއްގަރު ދާއިރާގެ މެންބަރު އަހުމަދު ނާޒިމެވެ.

މާލިއްޔަތު ކޮމިޓީގައި ބުދަ ދުވަހު ވާހަކަދައްކަވަމުން މަޖިލީހުގެ ނައިބު ރައީސް އަހްމަދު ނާޒިމް ވިދާޅުވީ މޯލްޑިވް ގޭސް އިން ގޭސް ގަތުމަށް ބޭރުގެ ކުންފުންޏަކަށް އެޑްވާންސްގެ ގޮތުގައި ދިން ފައިސާ ގެއްލިފައިވާ ކަމަށެވެ.

ނާޒިމް ވިދާޅުވީ، އެއީ ލިކުއިފައިޑް ޕެޓްރޯލިއަމް ގޭސް (އެލްޕީޖީ) ޝިޕްމަންޓަކަށް މިދިޔަ އަހަރުގެ އޮކްޓޯބަރު މަހުގެ ތެރޭގައި ދެއްކި ފައިސާ ކަމަށެވެ. ނަމަވެސް އެއީ ކިހާ އަދަދެއްގެ ފައިސާ ކަމެއް ނާޒިމް ހާމައެއް ނުކުރައްވައެވެ. އެހެން ނަމަވެސް ރާއްޖެ އެމްވީއަށް މައުލޫމާތު ލިބިފައިވާ ގޮތުގައި އެޑްވާންސަށް ދެއްކީ 250،000 ޑޮލަރެވެ. އެއީ ގާތްގަނޑަކަށް 3.85 މިލިއަން ރުފިޔާ އެވެ.

ވީނުވީއެއް ނޭނގި އެ ފައިސާ ގެއްލިފައިވާއިރު، ގޭސް ރާއްޖެއަށް އައިސްފައި ނެތްކަން ނާޒިމް ފާހަގަކުރެއްވިއެވެ. އަދި މިހާތަނަށް އެ ފައިސާ ހޯދުމުގައި އެއްވެސް ކާމިޔާބެއް ލިބިފައި ނެތްކަމަށް ވެސް ނާޒިމް ވިދާޅުވިއެވެ. އަދި ސަރުކާރުގެ ކުންފުނިތަކުން ޕްރޮކިޔުމެންޓްގެ ކަންތައްތައް ކުރިއަށްގެންދަނީ ކަނޑައެޅިފައިވާ ޕޮލިސީތަކާ އެއްގޮތަށްތޯ ކަށަވަރުކުރަންޖެހޭ ކަމަށް ވެސް ނާޒިމް ވިދާޅުވި އެވެ.

އިތުބާރުހުރި ފަރާތަކުން ރާއްޖެ އެމްވީއަށް ބުނީ މޯލްޑިވް ގޭސްއިން ގޭހުގެ ޝިޕްމަންޓަކަށް ދެއްކި އެޑްވާންސް ފައިސާ ގެއްލުނު މައްސަލަ އޭސީސީ އިން މިހާރު ތަހުގީގުކުރަން ފަށާފައިވާ ކަމަށެވެ.

ސޯޝަލް މީޑީއާގައި ދައުރުވަމުންދާ މައުލޫމާތުގައިވާ ގޮތުގައި މި ފައިސާ ދެއްކީ ކުރީގެ ސަޕްލަޔަރު ބަދަލުކޮށް، ފަހުން އެ މަސައްކަތް ހަވާލުކުރި ޑުބާއީގެ ކުންފުންޏަކަށެވެ. އެ ޝިޕްމަންޓަށް ފަހުން ވީނުވިއެއް ނޭނގެ އެވެ.

މޯލްޑިވްސް ގޭސްއަކީ ސްޓޭޓް ޓްރޭޑިން އޯގަނައިޒޭޝަން (އެސްޓީއޯ) އާއި ޗަމްޕާ ގޭސް އެންޑް އޮއިލް ކޮމްޕެނީގެ ހިއްސާ އޮންނަ ގޮތަށް އުފައްދާފައިވާ ކުންފުންޏެކެވެ. ބައެއް މީޑިއާތަކުން ރިޕޯޓުކޮށްފައިވާ ގޮތުގައި އެސްޓީއޯއިން ވަނީ ގޭސް ގަތުމުގެ ކަންކަން ސީދާ އެ ކުންފުނީގެ ބެލުމުގެ ދަށުން ކުރާ ގޮތަށް ބަދަލުކުރުމުގެ މަސައްކަތް ފަށާފަ އެވެ.

މޯލްޑިވްސް ގޭސްއަކީ މީގެ ކުރިން ވެސް ކޮރަޕްޝަންގެ ގިނަ ތުހުމަތުތަކެއް ކުރެވިފައިވާ ތަނެކެވެ. އެގޮތުން ނިމިދިޔަ އެމްޑީޕީ ސަރުކާރުގައި ވެސް އެ ކުންފުނީގެ ވެރިންނަށް ތިއްބެވި ބޭފުޅުން ކޮރަޕްޝަން ހިންގި ކަމަށް ތުހުމަތު ކުރެވޭ މައްސަލަތަކެއް ފެންމަތިވުމާއެކު އެކަން ބަލަން ފެށިއެވެ.

މިފަދަ ބޮޑު ޖަރީމާއެއް ހިންގިއިރު، އެންޓި ކޮރަޕްޝަން ކޮމިޝަނުން މި މައްސަލަ ނުބަލަ އެވެ. އަދި ރައީސް ޑރ. މުހައްމަދު މުއިއްޒަށް ވެސް މިކަން އެނގޭ ކަމަކަށް ނުވެ އެވެ. މި މައްސަލަ ބެލޭނެ އެއްވެސްގޮތެއް ނެތެވެ. މޯލްޑިވް ގޭސް އިން ދެ ލައްކައަށް ވުރެ ގިނަ ޑޮލަރު ގެއްލުނީ އެވެ.