ޔޫއެފާ ޗެމްޕިއަންސް ލީގުގެ ކުއާޓާ ފައިނަލް ފުރަތަމަ ލެގުގައި އާސެނަލުން ތަފާތު ބޮޑުކޮށް ރެއާލް މެޑްރިޑް ބަލިކޮށްފި އެވެ.

ރޭ އާސެނަލުން އަމިއްލަ ދަނޑުގައި ރެއާލް ބަލިކުރީ 3-0 ގެ ނަތީޖާއަކުންނެވެ. އެ ނަތީޖާއަކީ އާސެނަލުން މިހާތަނަށް ޗެމްޕިއަންސް ލީގުގައި ނެރުނު އެންމެ ބޮޑު އެއް ނަތީޖާއެވެ.

ރެކޯޑު ޗެމްޕިއަން ރެއާލަށް ރޭ އާސެނަލް ކައިރީގައި ކުޅެގަންނަންވެސް އުނދަގޫވެފައިވާ އިރު، އާސެނަލް ފެނުނީ މާ ބޮޑަށްވެސް ވަރުގަދަ ކޮށް އޮތްތަނެވެ. މިކޭލް އާޓެޓާގެ އިރުޝާދާ އެއްގޮތަށް އާސެނަލް ސަޕޯޓަރުން ކުރިއާލާ ދަނޑަށް ވަދެ، ފޯރިއާއެކު ސަޕޯޓް ކޮށްފައިވާ އިރު، ފުރަތަމަ ވިއްސަކަށް މިނެޓްގައި ޑޮމިނޭޓް ކުރީ އާސެނަލުންނެވެ.

އޭރިއާ ތެރެއަށް ނުރައްކާކޮށް އާސެނަލުން ތަފާތު ދެއްކި އިރު، 20 ވަނަ މިނެޓުގައި ރެއާލަށް ލިބުނު ފުރަތަމަ ފުރުސަތުގައި ވިނީޝިއަސް ޖޫނިއާ ފޮނުވާލި ބޯޅަ ދިޔައީ ބޭރަށެވެ.

ދެވަނަ ހާފަށް ނުކުމެ، އާސެނަލުން މެޗުގެ ކޮންޓްރޯލް ނަގައި ރަނގަޅަށް ކުޅުނުއިރު، ޑެކްލަން ރައިސްގެ ހިތްގައިމު ދެ ހިލޭ ޖެހުމުން މުޅި އެމިރޭޓް ސްޓޭޑިއަމް ކައްކުވާލިއެވެ. އޭނާގެ ފުރަތަމަ ހިލޭ ޖެހުން 58 ވަނަ މިނެޓުގައި ގޯލުގެ ކަނަށް އަމާޒުކޮށްލި އިރު، ދެން ޖެހި ހިލޭ ޖެހުން މާ ފުރިހަމައެވެ. ދެ ހިލޭ ޖެހުންވެސް އަމާޒުކޮށްލީ ސީދާ ކަނަށެވެ.

އާސެނަލުން ދެވަނަ ހާފުގައިވެސް އިތުރަށް ނުރައްކާ ކުރި އިރު، ދެ ހަމަލާއެއް ރެއާލްގެ ޑިފެންޑަރުން ރޮނގުމަތިންވެސް ބޭރުކޮށްލިއެވެ. އާސެނަލްގެ ތިންވަނަ ގޯލު ޖެހީ މިކޭލް މެރީނޯ އެވެ.

މި މެޗުގައި އާސެނަލްގެ ބުކަޔޯ ސަކާއާއި ރައިސްއަށް އަނިޔާވެ ބާލަން ޖެހުނުއިރު، ރެއާލް އިން މެޗު ނިންމާލީ 10 ކުޅުންތެރިންނާ އެކުގައެވެ. އެއީ ފަހުވަގުތު އެޑުއާޑޯ ކަމަވިންގާއަށް ރަތް ކާޑު ދެއްކުމުންނެވެ.