ރައްޔިތުން މަޖިލީހުގެ ޖަލްސާތައް ނުބާއްވާތީ، ގިނަ ބައެއްގެ ފާޑުކިޔުން ސަރުކާރަށް އަމާޒުވެއްޖެއެވެ.

ރަމަޟާން މަހުގެ ފަހު 10ގެ ބަންދާއި، އީދު ބަންދަށްފަހު މަޖިލީހުގެ ޖަލްސާތައް ފަށާފައިވަނީ 7 އޭޕްރީލް 2025ވީ ހޯމަ ދުވަހު އެވެ.

އެ ދުވަހު ރިޔާސަތުގައި އިންނަވައި ދިއްގަރު ދާއިރާގެ މެންބަރު އަހުމަދު ނާޒިމް ވިދާޅުވީ މަޖިލީހުގެ ޖަލްސާއެއް ދެން ބާއްވާނެ ދުވަސް ފަހުން އިއުލާނު ކުރާނެ ކަމަށެވެ.

އާއްމުކޮށް، އަންގާރަ އަދި ބުދަ ދުވަހު ޖަލްސާތައް ކުރިއަށް ގެންދިޔަ ނަމަވެސް މިދިޔަ އަންގާރަ ދުވަހާއި ބުދަ ދުވަހު ޖަލްސާތައް ކުރިއަށް ގެންގޮސްފައިނުވެއެވެ. އަދި ޖަލްސާ ނުބާއްވަން ނިންމި ސަބަބެއް ރިޔާސަތުން އާއްމުކޮށްފައިނުވެއެވެ.

ރައްޔިތުން މަޖިލީހުގެ ޖަލްސާތައް ކުރިއަށް ނުގެންދިޔަ ނަމަވެސް ބައެއް ކޮމިޓީތަކުގެ މަސައްކަތް އަންގާރަ ދުވަހު ކުރިއަށް ގެންގޮސްފައިވެއެވެ. އަދި ބުދަ ދުވަހަށް ވެސް ތާވަލުކޮށްފައިވެއެވެ.

މި މައްސަލައާ ގުޅިގެން ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެމްބަރު މީކާއިލް ނަސީމް ވިދާޅުވީ ޖަލްސާތައް ކުރިއަށް ނުގެންދަނީ ރައްޔިތުންގެ މަޖިލިސް މުލިއާގޭ ކައުންޓަރަށް ބަދަލުވެފައިވާތީ ކަމަށެވެ.

މަޖިލީހުގެ މަސައްކަތްތަކަށް އިޝާރާތް ކުރައްވައި މެންބަރު މީކާއިލް ވިދާޅުވީ ވާޒިރުން ހާޒިރުކުރުމުގެ ނޯޓިސްތައް ފުނިޖެހިފައިވާ ކަމަށާއި، ޖަލްސާތައް ކުރިއަށް ނުގެންދާ ސަބަބު ނާނގާ ކަމަށެވެ. އަދި ޖަލްސާ ނުބާއްވަނީ ސީދާ ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ އަމުރުފުޅާ ގުޅިގެން ކަމަށް މެންބަރު މީކާއިލް ތުހުމަތު ކުރެއްވިއެވެ.

ރައްޔިތުން މަޖިލީހުގެ ޖަލްސާތައް ނުބާއްވާތީ، ގިނަ ބައެއްގެ ފާޑުކިޔުން ސަރުކާރަށް އަމާޒުވުމާ ގުޅިގެން ބައެއް މީޑިއާތަކަށް ސަރުކާރު މައި ޕާޓީ ޕީއެންސީގެ ޕީޖީ ލީޑަރު އަދި އިނގުރައިދޫ ދާއިރާގެ މެންބަރު އިބްރާހީމް ފަލާހު ވިދާޅުވީ ޖަލްސާ ނެތް ނަމަވެސް މަސައްކަތްތައް މަޖިލީހުގައި ކުރަމުންދާ ކަމަށެވެ. އަދި މެންބަރުން ޗުއްޓީގައި ތިއްބަވައިގެން ވެސް ބައެއް ހާލަތްތަކުގައި މަޖިލީހުގެ މަސައްކަތްތައް ކުރައްވާ ކަމަށް މެންބަރު ފަލާހު ވިދާޅުވެފައިވެއެވެ.

ރައްޔިތުންގެ މަޖިލީހުގެ ގަވާއިދުގެ 47 ވަނަ މާއްދާގައި ބުނެފައިވާ ގޮތުން އެ މަޖިލީހުގެ ޖަލްސާއެއް މަދުވެގެން ހަފުތާއެކު ތިން ދުވަހު ބާއްވަންޖެހެ އެވެ.