މިފްކޯއަކީ ބަގުރޫޓްވެފައި އޮތް ކުންފުންޏެއް، ކުންފުނި ރަނގަޅު ކުރުމަށް ސަރުކާރުން އެއްވެސް މަސައްކަތެއް ނުކުރޭ: އަމްރު
މިހާރު އެ ކުންފުނި ހިންގަނީ ސަރުކާރުން ދޭ ފައިސާއިން
މިފްކޯއިން ހިންގާ ފެލިވަރު ފިޝަރީޒް ކޮމްޕްލެކްސް
މިފްކޯއަކީ މިހާރު ވެސް ބަގުރޫޓްވެފައި އޮތް ކުންފުންޏެއް ކަމަށާއި، ކުންފުނި ރަނގަޅު ކުރުމަށް ސަރުކާރުން އެއްވެސް މަސައްކަތެއް ނުކުރާ ކަމަށް ސްޓޭޓް ޓްރޭޑިން އޯގަނައިޒޭޝަން (އެސްޓީއޯ)ގެ ކުރީގެ މެނޭޖިން ޑިރެކްޓަރ ހުސެއިން އަމްރު ވިދާޅުވެއްޖެ އެވެ.
ރާއްޖެޓީވީގެ ''ޓީވީ ޓޯކް'' ޕްރޮގްރާމްގައި އަމްރު ވިދާޅުވީ މިފްކޯއަކީ ބަގުރޫޓް ވެފައިވާ ކުންފުންޏެއް ކަމަށާއި، މިހާރު އެ ކުންފުނި ހިންގަނީ ސަރުކާރުން ދޭ ފައިސާއިން ކަމަށެވެ.
މަސްވެރިންނަށް ފައިސާ ދޫކުރާކަން ފާހަގަކުރައްވައި އަމްރު ވިދާޅުވީ މަސްވެރިންނަށް ފައިސާ ދޫކުރަމުން ދަނީ ބޭންކް އޮފް މޯލްޑިވްސްއިން ނަގާފައިވާ 600 މިލިއަން ރުފިޔާގެ ލޯނުން ކަމަށެވެ. އަދި އެ ލޯނު ހުސްވުމުން މަސްވެރިންނަށް ފައިސާ ދޫނުކުރެވޭ ކަމަށާއި، ނަގާފައިވާ ލޯނަށް އަނބުރާ ފައިސާ ދެއްކޭނެ ގޮތެއް ވެސް ނެތް ކަމަށް އަމްރު ވިދާޅުވި އެވެ.
600 މިލިއަން ރުފިޔާގެ ލޯނެއް ނަގައިގެން އެ ދޫކުރަމުން ދޫކުރަމުން ގޮސް އެ ހުސްވާނެތާ. އެ ލޯނަށް އަނބުރާ ފައިސާ ނުދެއްކޭ. ފައިސާ ދެއްކޭނެ ގޮތެއް ވެސް މިފްކޯގައި ނެތް. އެހެންވީމަ 600 މިލިއަން ރުފިޔާ ހުސްވީމަ ދެން އަނެއްކާ ވެސް މަސްވެރިންނަށް ފައިސާއެއް ނުދެވޭނެ. ނުދެވޭތަނުގައި އަނެއްކާ ރައްޔިތުންގެ ބޭންކްގައި ހުރި ފައިސާކޮޅު އިތުރަށް މިތާށި ވީ. އެހެންވީމަ އެއީ ވެސް ހަގީގަތުގައި ވަށާ ޖެހޭ ގޮތަށް ކުރެވޭ ކަމެއް ނޫން. މިފްކޯ ރަނގަޅު ކުރުމަށްޓަކައި މަސައްކަތްތަކެއް ނެތް އަމަލީ ގޮތުން ކުރެވިފައެއް. އެކަމަކު އަމަލީ ގޮތުން އެބައިން އެއްކަން ކޮށްފައި. އެއީ ރާއްޖޭގެ ތިން ސަރަހައްދެއްގައި މަސްގަނޑުކުރާ ކާރުހާނާއާއެކު ހެދުމަށްޓަކައި އައިޑެންޓިފައި ކޮށްފައި އެކަމަށް އެ ޕްރޮޖެކްޓްތައް ބެލުމަށްޓަކައި މި މިނިސްޓްރީން އެބަހުރި ސްޓޭޓް މިނިސްޓަރަކު ލާފައި ހަމައެކަނި އެކަން ކުރުމަށްޓަކައި. އެކަމަކު އެއްވެސް ޕްރޮޖެކްޓެއް އެއްވެސް ގޮތަކަށް ނުހިނގާ. ފައިސާ ވެސް ހަމައެއް ނުޖެހޭއެސްޓީއޯގެ ކުރީގެ މެނޭޖިން ޑިރެކްޓަރ ހުސެއިން އަމްރު
މި ސަރުކާރުން ވަނީ މިފްކޯގެ ހިންގުން ރަނގަޅު ކުރުމަށް ކަމަށް ބުނެ، މިފްކޯގެ މެނޭޖިން ޑިރެކްޓަރު އަދި ޗީފް އެގްޒެކްޓިވް އޮފިސަރ ކަމުގެ މަގާމަށް ބޭރު ބޭފުޅެއް އައްޔަން ކުރައްވާފައެވެ. ޑރ. ވިޓާލީ ލިއުބިމޮވް ނަމަކަށް ކިޔާ އެބޭފުޅާ އައްޔަން ކުރެއްވުމާ ގުޅިގެން ވެސް ގިނަ ބަޔަކު ސަރުކާރަށް ފާޑުކިޔާފައިވެ އެވެ.
މި ކަމަށް އިޝާރާތް ކުރައްވައި އަމްރު ވިދާޅުވީ މިއީ ވެސް މިފްކޯއަށް ސަރުކާރުން ދީފައިވާ ގެއްލުމެއް ކަމަށާއި، އެބޭފުޅާ އައްޔަން ކުރެއްވިއިރު ވެސް ދިވެހިންނާ ގުޅުންހުރި ދިވެހި ކުންފުންޏެއް ބޭރުގެ ބޭފުޅަކަށް ރަނގަޅު ގޮތުގައި މެނޭޖްކުރެވިދާނެ ކަމާމެދު ސުވާލު އުފެއްދި ކަމަށެވެ. ނަމަވެސް ރައްޔިތުންގެ ކަންބޮޑުވުންތަކަށް ބެލުމެއް ނެތި ބޮޑު މުސާރާގައި އެބޭފުޅާ އައްޔަން ކުރެއްވި ކަމަށާއި، އެބޭފުޅާ މަގާމުން ދުރުކުރެއްވިއިރު ވެސް ކުންފުންޏަށް ލިބުނު ފައިދާއެއް ނެތް ކަމަށް އަމްރު ވިދާޅުވި އެވެ.
ޑރ. ވިޓާލީ އެ މަގާމަށް އައްޔަންކުރެއްވީ 2024 ވަނަ އަހަރުގެ ޑިސެމްބަރު މަހުގެ 9 ވަނަ ދުވަހުއެވެ. ވިޓާލީ އަކީ މިފްކޯއަށް އައްޔަންކުރެއްވި ބޭރުގެ ފުރަތަމަ މެނޭޖިން ޑިރެކްޓަރު ކަމަށްވާއިރު، އެމަގާމުން ކުއްލި ގޮތަކަށް ވަކި ކުރެއްވީ 3 މާރޗް 2025 ގައެވެ.
