އައްޑޫ ބިޔުރޯ

މާލޭގައި ހުންނަ ކެފޭއެއް ބަލައި ފާސްކޮށް، ގަވައިދާ ހިލާފަށް އުޅެމުންދިއަ 11 ބިދޭސީއެއް އިމިގްރޭޝަންގެ ބެލުމުގެ ދަށަށް ގެނެސްފައިވާ ކަމަށް މޯލްޑިވްސް އިމިގްރޭޝަނުން ބުނެފި އެވެ.

ގަވައިދާ ހިލާފަށް ރާއްޖޭގައި އުޅޭ ބިދޭސީންނަށް އަމާޒުކޮށް ޓާސްކު ފޯހުން ކުރިއަށްގެންދާ ރެއިޑު އޮޕަރޭޝަންތަކުގައި، ހުކުރު ދުވަހުގެ ރޭ މި ބިދޭސީންތައް ހައްޔަރުކޮށްފައިވަނީ، އާންމު ސިއްހަތަށް ނުރައްކާވާ ގޮތަށް ހިންގަމުންދިއަ މި ކެފޭއަކުން ކަމަށް މައުލޫމާތުލިބިފައިވެ އެވެ.

އިމިގްރޭޝަނުން ހިއްސާކޮށްފައިވާ ވީޑިއޯއިން ފެންނަ ގޮތުގައި މި ކެފޭގެ ބަދިގެ ތެރޭގައި އެއްވެސް ތަރުތީބެއް ނެތި އެއްޗެހި އަތުރާފައިވާ މަންޒަރު ފެނެވެ. އަދި ބަދިގޭގައި އެެއްވެސް ކަހަލަ ސާފުތާހިރު ކަމެއް ނެތެވެ.

އެ ކެފޭގައި ކާބޯތަކެތި ތައްޔާރު ކުރަމުން ދިޔައީ ސާފުތާހިރުކަމުގެ މިންގަނޑުތަކާ ޚިލާފަށް ވަރަށް ހަޑިކޮށްކަން ވެސް ވީޑިއޯއިން ފެންނަން ހުރެއެވެ.

ގަވައިދާ ޚިލާފަށް އުޅޭ ބިދޭސީންގެ މައްސަލަ ހައްލުކުރަން ކުރަމުންދާ މަސައްކަތުގެ ދަށުން، އެތަން ބަލައި ފާސްކޮށް، އިމިގްރޭޝަނުން ވަނީ ގަވައިދާ ޚިލާފަށް އުޅޭ ބިދޭސީން އިމިގްރޭޝަންގެ ބެލުމުގެ ދަށަށް ގެންގޮސްފައެވެ.

މޯލްޑިވްސް އިމިގްރޭޝަނާއި، ކަމާގުޅުން ހުރި މުއައްސަސާތަކުން ކުރިއަށް ގެންދާ ޚާއްސަ އޮޕަރޭޝަންގެ ތެރެއިން މިހާތަނަށް ގަވައިދާ ހިލާފަށް ރާއްޖޭގައި ދިރިއުޅެމުންދިޔަ 6000ށް ވުރެ ގިނަ ބިދޭސީން ވަނީ ޑީޕޯޓުކޮށްލައިފަ އެވެ.

ހޯމް މިނިސްޓްރީ އާއި ދިވެހި ފުލުހުންގެ ޚިދުމަތް ގުޅިގެން މިހާތަނަށް ކުރެވުނު މަސައްކަތްތަކާއި ގުޅޭގޮތުން އިމިގްރޭޝަނުން ބުނީ ކާމިޔާބު މަސައްކަތްތަކެއް ކުރެވޭ ކަމަށާއި، އާއްމު ރައްޔިތުންގެ އެއްބާރުލުމާއެކު ގިނަ އަދަދެއްގެ ބިދޭސީން އަތުލައިގެނެވިފައިވާ ކަމަށެވެ.

ރާއްޖޭގެ ގާނޫނުތަކާއި ޚިލާފަށް ވިޔަފާރިތަކުގެ ތެރޭގައްޔާއި އެހެނިހެން ކަންކަމުގައި ހަރަކާތްތެރިވަމުންދާ ބިދޭސީންނަށް އިތުރު ފުރުސަތެއް ދިނުމެއް ނެތި ޑީޕޯޓުކުރުމުގެ މަސައްކަތް ކުރަމުންދާކަން ފާހަގަކޮށް އިމިގްރޭޝަނުން ބުނީ މިހާތަނަށް 6076 އަށްވުރެ ގިނަ ބިދޭސީން ވަނީ އަނބުރާ އެމީހުން ނިސްބަތްވާ ގައުމުތަކަށް ފޮނުވާލާފައިވާ ކަމަށެވެ.

ގަވައިދާ ހިލާފަށް އުޅޭ ބިދޭސީންނާ ގުޅޭ މައްސަލަތައް ހުށައެޅުމަށް "އިމިގްރޭޝަން ވޮޗް"ގެ ނަމުގައި އޮންލައިން ޕްލެޓް ފޯމެއްވެސް ވަނީ ގާއިމްކޮށްފައެވެ.

ރާއްޖޭގައި ގަވައިދާ ޚިލާފަށް ދިރިއުޅެމުންދާ ބިދޭސީ މަސައްކަތްތެރިންގެ މައްސަލައަށް ދާއިމީ ހައްލެއް ހޯދުމަށް ބިދޭސީންގެ މަޢުލޫމާތު އެއްކުރުމަށް އޮޕަރޭޝަން ކުރަނގީގެ ނަމުގައިވެސް ހަރަކާތެއްދަނީ ހިންގަމުންނެވެ. އެގޮތުން މިހާތަނަށް ރާއްޖޭގެ އެކި ކަންކޮޅުތަކުން 77ހާސް ބިދޭސީންގެ މައުލޫމާތު ވަނީ ނަގާފައެވެ.