"ސުޕްރީމް ކޯޓުގެ ފަނޑިޔާރުންގެ އަދަދު މަދުކުރީ ސީދާ ރައީސް ބޭނުންވި ގޮތަށް، ތަންފީޒްކުރަން ނުކެރުނީ އާއްމުންގެ ފާޑުކިޔުމުގެ ސަބަބުން"
މި ވެރިކަން އައިފަހުން މުޅި ނިޒާމް ހުއްޓިފައިވާ ކަމަށާއި އޭގެ އަނިޔާ ލިބެނީ އާއްމުންނަށް ކަމަށް އޭނާ ވިދާޅުވި
ހޯމް މިނިސްޓްރީގެ ކުރީގެ ސްޓޭޓް މިނިސްޓަރު އަހުމަދު ސަލީމް (މާޒް ސަލީމް)
ސުޕްރީމްކޯޓުގެ ފަނޑިޔާރުންގެ އަދަދު މަދުކުރުމަށް މަޖިލިސް މެދުވެރިކޮށް ކުރި މަސައްކަތްވެސް ކުރީ ސީދާ ރައީސް ޑރ.މުހައްމަދު މުއިއްޒު ބޭނުންފުޅު ވީ ގޮތަށް ކަމަށާއި ފަހުން އެ ޤާނޫނު ތަސްދީގު ނުކުރެއްވީ އާއްމުންގެ ޕްރެޝަރ ބޮޑުވުމުން ކަމަށް ހޯމް މިނިސްޓްރީގެ ކުރީގެ ޑެޕިއުޓީ މިނިސްޓަރު އަހުމަދު ސަލީމް (މާޒް ސަލީމް) ވިދާޅުވެއްޖެ އެވެ.
އޭނާ އެފަދައިން ވިދާޅުވި ރާއްޖެޓީވީގެ ފަލަ ސުރުހީ ޕްރޮގްރާމްގައި ވާހަކަދައްކަވަމުންނެވެ.
ރައީސްކުރެއްވި ކަމަކީ ޤާނޫނު އަސާސީ އެއް ފަރާތްކޮށް އަމިއްލަ އަތްޕުޅަށް ހުރިހާ ބާރެއް ނަންގަވަން ކަމަށް އޭނާ ވިދާޅުވި އެވެ.
ރައްޔިތުންގެ މަޖިލީހުގެ ބާރުތައް ކަނޑުވާލާ، ރައްޔިތުންގެ މެމްބަރުން ވަކިކުރުމުގެ ބާރު ޕާޓީގައި އޮތް 3 މީހުން ހިމެނޭ ކޮމިޓީ އަކަށް ލިބޭ ގޮތަށް ޤާނޫނުއަސާސީ ފުރޮޅާލާފައިވާ ކަމަށް އޭނާ ވިދާޅުވިއެވެ. އެހެންނަމަވެސް ރައްޔިތުންގެ މަޖިލީހުގެ މެމްބަރުންނަށް އެގޮތަށް ބާރު ނުފޯރުވޭނެކަން އެއީ ޤާނޫނުއަސާސީން ވަރަށް ސާފުކޮށް ފެންނަން އޮތް ކަމެއް ކަމަށް ސަލީމް ވިދާޅުވި އެވެ.
އެކަމާއި ދެކޮޅަށް ސުޕްރީމް ކޯޓަށް ދިއަ ހިސާބުން ރައީސް މުއިއްޒު ބޭނުންފުޅު ނުވާ ގޮތަށް ސުޕްރީމް ކޯޓުން ރައުޔު ނެރޭނެކަމަށް އެ މަނިކުފާނަށް ޤަބޫލުކުރެއްވުނު ކަމަށް ސަލީމް ވިދާޅުވި އެވެ. އެ ހިސާބުން ސުޕްރީމް ކޯޓުގެ ފަނޑިޔާރުން ސަސްޕެންޑްކޮށް، އެ ކޯޓުގެ ބާރުތައް އަތްޕުޅަށް ނަންގަވާފައިވާ ކަމަށް ސަލީމް ވިދާޅުވި އެވެ. އެ ހިސާބުން ސުޕްރީމް ކޯޓަށް އަތް ބާނާ ސުޕްރީމްކޯޓުގެ ފަނޑިޔާރުންނަށް ނުފޫޒު ފޯރުވި ކަމަށް އޭނާ ވިދާޅުވި އެވެ.
މި ވެރިކަން އައިފަހުން މުޅި ނިޒާމް ހުއްޓިފައިވާ ކަމަށާއި އޭގެ އަނިޔާ ލިބެނީ އާއްމުންނަށް ކަމަށް އޭނާ ވިދާޅުވި އެވެ. މީގެ އިތުރުން ރާއްޖެ އާއި ރާއްޖެއިން ބޭރާއި އޮތް ގުޅުން ވެސް މި ސަރުކާރުން އިންތިހާ އަށް ހީނަރުކޮށްލާފައިވާ ކަމަށް އޭނާ ވިދާޅުވި އެވެ. އެއްވެސް ދިމާލެއްގައި ހިންގުމުގެ ހަރުދަނާކަމެއް ނުފެންނަ ކަމަށް އޭނާ ވިދާޅުވި އެވެ.
