ރައްޔިތުންގެ މަޖިލީހުގެ 12 މެމްބަރަކަށް އެއްފަހަރާ ކުރިއަށްގެންދާ ޝަރީއަތްތަކަކީ މެމްބަރުންނަށް ބިރުދައްކަން ކުރާ ކަމެއް ކަމަށާއި ރައީސް އަބްދުﷲ ޔާމިން ކިތަންމެ ބިރުދެއްކެވިޔަސް ކުޑަކަކޫ ނުޖަހާނެ ކަމަށް ކިނބިދޫ ދާއިރާގެ މެމްބަރު އަބްދުﷲ ރިޔާޒު ވިދާޅުވެއްޖެ އެވެ.
ކްރިމިނަލް ކޯޓު ސަރަހައްދުގައި ހުންނަވައި މީޑިޔާތަކާ ވާހަކަދައްކަވަމުން ރިޔާޒް ވިދާޅުވީ މެމްބަރުންނަށް ބިރު ދައްކާ، ކުރަމުންގެންދާ މަސައްކަތަކީ އިދިކޮޅު ފަރާތްތަކުން ކުރަމުންގެންދާ ކަންކަން ހުއްޓުވުމަށް ކުރާ ކަމެއް ކަމަށާއި އެހެން ނަމަވެސް އެއްވެސް މެމްބަރަކު ފަހަތަށް ނުހެޖޭނެ ކަމަށެވެ. އަދި އެފަރާތްތަކުން ކުރަމުންގެންދާ އެއްވެސް މަސައްކަތަކަށް ކުޑަވެސް މަޑު ޖެހުމެއް ނާންނާނެ ކަމަށް ރިޔާޒް ވިދާޅުވިއެވެ.
ސަރުކާރުން ހިންގާ ކޮރަޕްޝަނާއި ސިޔާސީ ފަރާތްތަކަށް ހިންގަމުންދާ ޝަރީއަތްތަކާއި ކުރަމުންގެންދާ ނުހައްގު ދައުވާ ތަކަކީ ފޮރުވިފައި އޮންނަންވާނެ ކަންކަން ނޫން ކަމަށާއި ހާއްސަކޮށް ކޮރަޕްޝަންގެ ކަންތައް ހުއްޓުވުމާއި ސަރުކާރު ހަމަމަގަށް އެޅުވުމަށް އެފަރާތްތަކުން ހުއްޓާނުލައި މަސައްކަތް ކުރާނެ ކަމަށް ރިޔާޒް ވިދާޅުވިއެވެ.
އިދިކޮޅު ސިޔާސީ ޕާޓީތަކަށް ނިސްބަތްވާ ރައްޔިތުންގެ މަޖިލީހުގެ 12 މެންބަރެއްގެ މައްޗަށް ވަނީ ދައުވާ އުފުލާފައެވެ.
މެންބަރުންގެ މައްޗަށް ކޮށްފައިވަނީ ގާނޫނު ތަންފީޒް ކުރާ މުވައްޒަފެއްގެ މަސައްކަތަށް ގަސްދުގައި ހުރަސް އެޅުމުގެ ދައުވާ އެވެ. ދައުވާ ކޮށްފައިވަނީ މިދިޔަ ބުރާސްފަތި ދުވަހު އެވެ.
މެންބަރުންގެ މައްޗަށް ދައުވާ ކުރަން ފޮނުވާފައިވަނީ ޖުލައި މަހުގެ 24 ވަނަ ދުވަހު ރައްޔިތުންގެ މަޖިލީހަށް ވަން މައްސަލައާ ގުޅިގެންނެވެ. އެ މައްސަލައާ ގުޅިގެން ގިނަ އަދަދެއްގެ މެންބަރުން ފުލުސް އޮފީހަށް ހާޒިރުކޮށް ތަހުގީގު ހިންގާފައި ވެއެވެ.
މެންބަރުން ބުނަމުންދަނީ ރައްޔިތުންގެ މަޖިލީހަށް މެންބަރުން ވަނުމަށް އެއްވެސް ފަރާތަކަށް މަނާ ނުކުރެވޭނެ ކަމަށާއި އަދި ފުލުހުންނަށް އެ ތުހުމަތު ކުރެވިދާނެ ކަމަށް ވެސް ގަބޫލުނުކުރާ ކަމަށެވެ.
