ރީވްސް ވަކި ކުރުމަކީ، ސްޓާމާ އަމިއްލަ އަށް ހަލާކުވުން: ކްވަޓެންގ

ޗާންސެލަރ ރަޗޭލް ރީވްސް މަގާމުން ވަކި ކުރުމަކީ، އިނގިރޭސި ބޮޑު ވަޒީރު ކިއާ ސްޓާމާ، އޭނާގެ ސިޔާސީ ޙަޔާތް އަމިއްލަ އަށް ހަލާކުގެ ތެރެއަށް އެއްލާލުން ކަމަށް ވިދާޅުވެ، ކުރީގެ ޗާންސެލަރ ކްވަސީ ކްވަޓެންގް ފާޑު ވިދާޅުވެއްޖެ އެވެ.

ކްވަޓެންގް މިހެން ވިދާޅުވީ އަލް ޢަރަބިއްޔާ އަށް އޭނާ ދެއްވި ޚާއްސަ އިންޓަވިޔުއެއްގަ އެވެ. 

ކުރީގެ ބޮޑު ވަޒީރު ލިޒް ޓްރަސްގެ ދައުރުގައި އެންމެ 44 ދުވަހުގެ މުއްދަތަކަށް ޗާންސެލަރގެ މަގާމުން އަދާ ކުރި ކްވަޓެންގް ވަނީ އޭނާ މަގާމުން ވަކި ކުރުމާއި، މިހާރުގެ ޗާންސެލަރ ރީވްސް މަގާމުން ވަކި ކުރާ ޙާލަތާ އަޅައި ކިޔައިފަ އެވެ.

ކްވަޓެންގް ވަނީ އޭނާ  ވަކި ކުރުމަށްފަހު، ޓްރަސްގެ ވެރިކަން ވެއްޓުނު ގޮތް ފާހަގަ ކުރައްވާފައި އެވެ. ކްވަޓެންގް ވިދާޅުވީ އޭނާގެ ތަޖުރިބާ އިން އެނގޭ ގޮތުގައި، އެފަދަ ފިޔަވަޅެއް ބޮޑު ވަޒީރު އަޅުއްވައިފި ނަމަ. އެއީ ވަރަށް ބޮޑު ނުރައްކަލެއް ކަމަށެވެ. އަދި ޓްރަސްގެ ދައުރުގައި އޭނާ ވަކި ކުރުމަށް ފަހު، ބޮޑު ވަޒީރު ކަމުގައި ޓްރަސް އަށް ހުރެވުނީ އެންމެ ހަ ދުވަހުކަން ވެސް ފާހަގަ ކުރެއްވި އެވެ. 

 ލޭބަރ ޕާޓީގެ ޗާންސެލަރ ރީވްސް އަށް މިވަގުތު ވަނީ ގިނަ ފާޑު ކިޔުންތަކެއް އަމާޒުވެފަ އެވެ. އިނގިރޭސިވިލާތުގެ އިޤްތިޞާދީ ހާލަތު ދަށަށް ދިޔުމާ އެކު، ސަރުކާރުގެ ޚަރަދު ކުޑަކުރުމާއި، ޓެކްސް އިތުރު ކުރުމުގެ ސިޔާސަތު ތަކަށް ވަނީ ފާޑު ކިޔުން އަމާޒުވެފަ އެވެ.

ރީވްސްގެ އަންނަން އޮތް އިޤްތިޞާދީ ބަޔާނުގައި އިތުރު ޚަރަދު ކުޑަ ކުރުމުގެ ފިޔަވަޅުތަކެއް ހިމެނޭނެ ކަމަށް ލަފާ ކުރެވެ އެވެ.

އޭގެ ތެރޭގައި 10 ބިލިއަން ޕައުންޑުގެ ޚަރަދު ކުޑަ ކުރުން ހިމެނޭނެ ކަމަށް ބެލެވެ އެވެ. ލޭބަރ ޕާޓީގެ މުސްތަޤުބަލާމެދު ވާހަކަ ދައްކަވަމުން ކްވަޓެންގް ވިދާޅުވީ، އެއްވެސް ސިޔާސީ ޕާޓީއަކަށް ދާއިމީ ގޮތެއްގައި ދެމި އޮތުމުގެ ޔަޤީން ކަމެއް ނޯންނާނެ ކަމަށެވެ.

ސިޔާސީ މައިދާނަކީ ވާދަވެރި ތަނެއް ކަމަށާއި، ރައްޔިތުން ބޭނުންވާ ގޮތަށް ކަންކަން ނުކުރެވޭ ނަމަ، އެ ޕާޓީއެއްގެ އުމުރު ކުރުވާނެ ކަމަށް ވެސް އޭނާ ވިދާޅުވި އެވެ.