"އާދަވެގެން ދަންވަރު ކަންކަން ނިންމުމުން އެނގެނީ ސަރުކާރުގެ ގޮތެއް ފޮތެއް ނެތް މިންވަރު"
އޭނާ ވިދާޅުވީ ސަރުކާރުން ކަންކަން ކުރުމުގައި ހަމަ އެއް ލަމަ އެއް ނެތް މިންވަރު ހަމައެކަނި މި އަމަލުން ވެސް ހާމަވާ ކަމަށް
ރައްޔިތުންގެ މަޖިލީހުގެ އިހަވަދޫ ދާއިރާގެ ކުރީގެ މެމްބަރު އަހުމަދު އަބްދުﷲ ރާއްޖެޓީވީގެ ފަލަސުރުޚީ ޕްރޮގްރާމުގައި ވާހަކަދައްކަވަނީ
އާދަވެގެން ދަންވަރު ކަންކަން ނިންމުމުގެ ސަޤާފަތެއް ސަރުކާރުގެ ކިބައިން ފެންނަމުންދާ ކަމަށާއި އެކަމުން އެނގެނީ ސަރުކާރުގެ ގޮތެއް ފޮތެއް ނެތް މިންވަރު ކަމަށް ރައްޔިތުންގެ މަޖިލީހުގެ އިހަވަންދޫ ދާއިރާގެ ކުރީގެ މެމްބަރު އަހުމަދު އަބްދުﷲ ވިދާޅުވެއްޖެއެވެ.
އޭނާ އެހެން ވިދާޅުވީ ރާއްޖެޓީވީގެ ފަލަސުރުޚީ ޕްރޮގްރާމުގައި ވާހަކަދައްކަވަމުންނެވެ.
އޭނާ ވަނީ ކުރީގެ އިމިގްރޭޝަން ކޮންޓްރޯލަރ ވަކިކޮށް ރައީސުލްޖުމްހޫރިއްޔާ ޑރ. މުޙައްމަދު މުއިއްޒު، ކޮންޓްރޯލަރ ޖެނެރަލް އޮފް އިމިގްރޭޝަންގެ މަޤާމަށް، މ. ދިއްގަލި، ކޮމިޝަނަރ އޮފް ޕޮލިސް (ރިޓަޔަރޑް) އަޙްމަދު ފަޞީޙް ޢައްޔަންކުރައްވާކަން އިއުލާންކުރެއްވީ ވެސް ދަންވަރު ކަމަށެވެ. އެފަދަ ކިތަންމެ ކަމެއް މި ސަރުކާރުގެ ކިބައިން ފެންނަ ކަަމަށް އޭނާ ވަނީ ވިދާޅުވެފައެވެ.
އޭނާ ވިދާޅުވީ ސަރުކާރުން ކަންކަން ކުރުމުގައި ހަމަ އެއް ލަމަ އެއް ނެތް މިންވަރު ހަމައެކަނި މި އަމަލުން ވެސް ހާމަވާ ކަމަށެވެ. ދަންވަރު ސަރުކާރަކުން ބޮޑެތި ނިންމުންތައް ނިންމުމަކީ ތަރުތީބުވުން ކަމަށް ދެއްކުމަށް މި ސަރުކާރުން މަސައްކަތް ކުރިއަސް ހަގީގަތަކީ އެއީ ނޫން ކަމަށް އޭނާ ވަނީ ވިދާޅުވެފައެވެ. މީގެ އިތުރުން ސަރުކާރެއް ހިނގަންވާ ގޮތަށް މި ސަރުކާރު ނުހިނގާކަން ވަރަށް ސާފުކޮށް ފެންނަން އޮތް ކަމަށް އޭނާ ވިދާޅުވިއެވެ.
ފެނިގެން ދަނީ އަނިޔާ ދިނުމަށް ފަހު ދަންވަރެއްގައި ވެރިން ވަކިކުރާތަން. ވަކިކޮށްފަ އެތަނަށް ދެން ހުންނަ މީހާ ލަނީ ވެސް ދަންވަރު. ދެން އައްޔަން ކުރާ މީހާ އަށް ވެސް އަނިޔާ ދޭނެ ގޮތް ރޭވިފައި ކަންނޭނގެ އޮންނާނީ.ރައްޔިތުންގެ މަޖިލީހުގެ އިހަވަދޫ ދާއިރާގެ ކުރީގެ މެމްބަރު އަހުމަދު އަބްދުﷲ
އޭނާ އިތުރަށް ވިދާޅުވީ ސަރުކާރެއްގެ ހައިބަތާއި ކަރާމާތް ނުހިފަހެއްޓޭ ކަމަށެވެ.
ޤާނޫނުގެ ކުރިމަތީގައި އެންމެން ހަމަހަމަ ކަމަށް ޤާނޫނުއަސާސީގައި އޮތް ނަމަވެސް އެއިން އެއްވެސް ކަމެއް ސަރުކާރުގެ ކިބައިން ނުފެންނަ ކަމަށް އޭނާ ވިދާޅުވިއެވެ. ސަރުކާރުގެ އެއްވެސް މިސްރާބެއް ނެތުމުގެ ސަބަބުން ގައުމުގެ މިސްރާބު ގެއްލެމުންދާ ކަމަށް އޭނާ ވިދާޅުވިއެވެ. މީގެ އިތުރުން ސަރުކާރުން ބޭނުންހާ ގޮތަކަށް ކަންކަން ކުރަމުން ދާއިރު އެއީ ނުވާކަމަކަށް ހަދައިގެން، ބައެއް މަޤާމުތަކުގައި މީހުން ތިބި ކަމަށް ފާހަގަކުރައްވާ އޭނާ ވަނީ އެކަމަށް ފާޑު ވިދާޅުވެފައެވެ. ރައްޔިތުންނަށް ލިބެންޖެހޭ ޚިދުމަތް ނުދީ ރައްޔިތުންގެ ފައިސާ އިން މުސާރަ ނެގުމަކީ ލަދުވެތިކަމެއް ކަމަށް ވެސް އޭނާ ވިދާޅުވިއެވެ.
