ޣައްޒާގައި އިސްރާއީލް އިން ހިނގަމުންދާ ހަނގުރާމަ ހުއްޓާލުމަށް ވެފައިވާ އެއްބަސްވުމާ ޚިލާފަށް، އަލުން ހނގުރާމަ ފަށާފައި ވަނީ ފަލަޞްޠީނުގެ މިނިވަން ކަމަށް މަސައްކަތް ކުރާ ހަމާސް ޖަމާއަތުގެ ސަބަބުން ކަމަށް، އެމެރިކާގެ ރައީސް ޑޮނަލްޑް ޓްރަމްޕްގެ ޚާއްސަ މަންދޫބު ސްޓީވް ވިކްޓޮފް ވިދާޅުވެއްޖެ އެވެ.

އޭނާ ވިދާޅުވީ "ޤަބޫލު ކުރެވޭ ފަދަ" އެއްބަސްވުމެއް ކުރިއަށް ގެންދިޔުމަށް ހަމާސް އިން އިންކާރު ކުރުމާ ގުޅިގެން ހަނގުރާމަ އަލުން ފެށީ ކަމަށާއި، އެކަމުގެ ފުރިހަމަ ޒިންމާ ހަމާސް ޖަމާއަތުން ނަގަން ޖެހޭނެ ކަމަށެވެ. 

ފޮކްސް ނިއުސް އަށް ދެއްވި އިންޓަވިއުއެއްގައި ވިޓްކޮފް ވިދާޅުވީ، މިހާރު ކަންތައް ވަމުން އެ ދަނީ ހަމާސް އިން އަމަލު ކޮށްފައިވާ ގޮތުގެ ސަބަބުން ކަމަށެވެ. އަދި އެމެރިކާ ދެމި އޮންނާނީ އިސްރާއީލްގެ ފަޅީގައި ކަމަށް ވެސް ވިކްޓޮފް ވިދާޅުވި އެވެ. އަދި، ހަމާސް އަށް "ހަތިޔާރު ދޫކޮށްލުމާއި، ބްރިޖިންގ ޕްރޮޕޯސަލް" ގަބޫލުކުރުމުގެ ފުރުސަތު ލިބުނު ކަމަށް އޭނާ ވިދާޅުވި އެވެ.

ޖެނުއަރީ މަހު ހނަގުރާމަ ހުއްޓާލުމަށް ވެވުނު އެއްބަސްވުމަށް ފަހު، ޣައްޒާގައި ނިސްބަތުން އަމާންކަން އޮތުމަށް ފަހު، އެ އެއްބަސްވުން އިތުރަށް ދެމެހެއްޓުމަށް ކުރެވުނު މަސައްކަތްތައް ނާކާމިޔާބުވުމާ ގުޅިގެން، އިސްރާއީލުން ވަނީ ވައިގެ މަގުން އަދި އެއްގަމު މަގުން ހަމަލާތައް ދޭން އަލުން ފަށާފައި އެވެ.

ފަލަސްތީނުގެ ސިއްހީ އިދާރާ ތަކުން ބުނާ ގޮތުގައި، އެންމެ ފަހުގެ ހަމަލާ ތަކުގައި ސަތޭކަ އަށްވުރެ ގިނަ މީހުން ވަނީ ޝަހީދުވެފައި އެވެ. މާޗު މަހު ހުށަހެޅި ވިޓްކޮފްގެ "ބްރިޖް" ޕްލޭންގެ މަގްސަދަކީ ރަމަޟާން މަހާއި، އޭގެ ފަހުން އަންނަ ދުވަސްތަކުގެ ތެރެއިން އޭޕްރިލް މަހާ ހަމައަށް ހުއްޓުން އިތުރުކޮށް، ދާއިމީ ހުއްޓުމަކަށް ވާހަކަ ދެއްކުމުގެ ވަގުތު ހޯދުމެވެ. 

2023 ވަނަ އަހަރުގެ އޮކްޓޫބަރު މަހުގެ ހަތް ވަނަ ދުވަހު،  ހަމާސް އިން ޣައްޒާ ވަށައިގެންވާ އިސްރާއީލްގެ އާބާދީތަކަށް ދިން ހަމަލާގައި އިސްރާއީލްގެ 1,200 މީހުން މަރުވެ، 251 މީހުން ރަހީނުންގެ ގޮތުގައި ގެންދެވުނެވެ.

ފަލަސްތީނުގެ ސިއްހީ ވުޒާރާގެ ބަޔާނެއްގައި ބުނެފައިވާ ގޮތުގައި، ހަނގުރާމަ ފެށުނީއްސުރެ މިހާތަނަށް ފަލަސްޠީނުގެ 50,021 މީހުން ޝަހީދުވެ، 113,274 މީހުންނަށް ވަނީ އެކިވަރުގެ ޒަޚަމުތައްވެފައި އެވެ.