ނެޝަނަލް ތެލަސީމިއާ ސެންޓަރަށް ރަމަޟާން މަހުގެ ދުވާލު ވަގުތު ރައީސް ޑރ.މުހައްމަދު މުއިއްޒު ޒިޔާރަތް ކުރެއްވި ނަމަވެސް ހާލަތު އެނގިވަޑައިނުގަންނަވާނެ ކަަމަށް ތެލަސީމިއާގެ ގިނަ ޕޭޝަންޓުން ބުނެފިއެވެ.

މޯލްޑިވްސް ބްލަޑް ސަރވިސްއަށް ލިބިފައިހުރި ފިލްޓަރތަކުގެ މައްސަލައެއް ދިމާވެ، ލޭ އަޅާ މީހުންގެ ލޭތައް އުކާލަން ޖެހޭ މައްސަލަ ބޮޑުވެ އިހްތިޖާޖްކޮށްފައިވާއިރު، ރައީސް މުއިއްޒު އާދިއްތަ ދުވަހުގެ މެންދުރުގެ ވަގުތެއްގައި ތެލަސީމިއާ ސެންޓަރުގެ ހާލަތު ބައްލަވާލެއްވުމަށް އެސެންޓަރަށް ޒިޔާރަތްކުރެއްވުމާއި ގުޅިގެން، ރާއްޖެއެމްވީއަށް ތެލަސީމިއާގެ ބައެއް ޕޭޝަންޓުން ބުނީ ތެލަސީމިއާ ސެންޓަރަށް ރަމަޟާން މަހުގެ ދުވާލު ވަގުތު ރައީސް މުއިއްޒު ޒިޔާރަތް ކުރެއްވި ނަމަވެސް ހާލަތު އެނގިވަޑައިނުގަންނަވާނެ ކަމަށާއި، ރޯދަ މަހުގެ ދުވާލުގެ ވަގުތު ލޭ އަޅާނީ 12 އަހަރުން ދަށުގެ ކުދިންނަށް ކަމަށެވެ. ބޮޑެތި ހުރިހާ އެންމެން ވެސް ލޭ އަޅަމުންދާނީ ރޭގަނޑުގެ ވަގުތު ކަމަށާއި، ކަންބޮޑުވުންތައް ކުޑަ ކުދިންނަށް ކިޔައިދޭން ނޭނގޭނެ ކަމަށް ޕޭޝަންޓުން ބުނެއެވެ.

ރައީސްގެ މި ޒިޔާރާތް ކުރެއްވުމުގައި އެމަނިކުފާނު ވަނީ އެ ވަގުތު ލޭއަޅަން ސެންޓަރުގައި ތިއްބެވި ޕޭޝަންޓުންނާއި، ބައްދަލުކުރައްވައި އެފަރާތްތަކުގެ ކަންބޮޑުވުންތައް ބައްލަވާފައިވާ ކަމަށް ރައީސް އޮފީހުން ބުނެއެވެ. އަދި އެމަނިކުފާނު ވަނީ އެކަންކަމަށް އެންމެ އެދެވޭ އަވަސް ހައްލު ހޯދައިދެއްވުމަށް ކުރެވެންހުރި ކަންކަން އޮޅުންފިލުއްވައި ސަރުކާރުން އެކަންކަން ހައްލު ހޯދުމަށް މަސައްކަތް ކުރައްވާނެ ކަމުގެ ޔަގީންކަން ދެއްވާފަ އެވެ.

މީގެ އިތުރުން ރައީސް ވަނީ ތަނުގެ މުވައްޒަފުންނާއި ބައްދަލުކުރައްވައި ތަނުގެ ހާލަތު ބައްލަވައިލައްވައިލައްވާފައެވެ. އަދި މި ބައްދަލުކުރެއްވުމަށްފަހު އެމަނިކުފާނު ވަނީ ކަމާގުޅޭ އިދާރާތަކުގެ އިސްވެރިންނަށް މިހާރުން މިހާރަށް އެޅަންޖެހޭ ފިޔަވަޅުތައް ވީ އެންމެ އަވަސްކޮށް އެޅުއްވުމަށް އިރުޝާދުދެއްވާފައެވެ.

ރަމަޟާން މަސް ފެށުނު ފަހުން މިމައްސަލަ ބޮޑުވެ ހައްލު ނުލިބުމުން ހޮނިހިރު ދުވަހުގެ ރޭ އެ ސެންޓަރުގެ ތެރޭގައި އަދި ބޭރުގައި ގިނަ ތެލަސީމިއާ ޕޭޝަންޓުން ހިމެނޭ ގޮތަށް ގިނަ އަދަދެއްގެ ބެލެނިވެރިން ނުރުހުން ފާޅުކޮށް މުޒާހަރާކޮށްފަވެއެވެ. އަދި ނެޝަނަލް ތެލަސީމިއާ ސެންޓަރުގެ މެނޭޖްމަންޓު އިސްތިއުފާއަށް ގޮވާލާފައިވެ އެވެ.

ނެޝަނަލް ތެލަސީމިއާ ސެންޓަރުގެ މިހާރުގެ މެނޭޖްމަންޓާއި ބައްދަލުކޮށްގެން ހައްލު ނުލިބޭނެ ކަމަށާއި، ހާލަތު މިހައި ބޮޑަށް ދަށްވެގެން ދިޔައީ ވެސް އެމެނޭޖްމަންޓުގެ އިހުމާލުން ކަމަށް ވެސް ލޭ އަޅާ ޕޭޝަންޓުން ބުނެއެވެ. އަދި ރައީސް މުއިއްޒާ ބައްދަލުކޮށް، ކަންބޮޑުވުންތައް ހިއްސާ ކުރަން ބޭނުންވާ ކަމަށް އެމީހުން ބުނެއެވެ.

ރައީސް މުއިއްޒު ދުވާލުގެ ވަގުތު ތެލަސީމިއާ ސެންޓަރަށް ޒިޔާރަތް ކުރެއްވުމާއި ގުޅިގެން ގިނަ އަދަދެއްގެ ލޭ އަޅާ ޕޭޝަންޓުން ދަނީ ސޯޝަލް މީޑިއާގައި ވެސް ކަންބޮޑުވުން ފާޅު ކުރަމުންނެވެ.