ހުޅުމާލޭގެ ސަފާރީއެއްގައި ބިދޭސީ ދެ އަންހެނުން ރޭޕް ކުރި މައްސަލައެއް ފެންމަތިވެއްޖެއެވެ.

އިތުބާރުހުރި ފަރާތަކުން ރާއްޖެއެމްވީއަށް ވިދާޅުވީ މިހާދިސާ ހިނގާފައިވަނީ މިދިޔަ ބުރާސްފަތި ދުވަހުގެ ފަތިހުގެ ވަގުތު ކަމަށެވެ. އޭނާ ވިދާޅުވީ ހުޅުމާލޭގެ ފަޅުގައި އޮތް ސަފާރީއެއްގައި ދެ ބިދޭސީ އަންހެނުން ރޭޕް ކުރި ކަމަށް އެދުވަހު ފުލުހުންނަށް ރިޕޯޓު ކޮށްފައިވާ ކަމަށާއި، ދެ އަންހެނުންނަށް އެކި ވަރުގެ އަނިޔާ ލިބިފައިވާ ކަމަށެވެ.

އޭނާ ވިދާޅުވީ އެތަނުން އެއް އަންހެނަކު ސަލާމަތްވުމަށް ފަޅަށް ފުއްމާލައިގެން އެހެން ސަފާރީއަކަށް އަރަން ދިޔަ ކަމަށާއި، އެ ސަފާރީީން އެމީހާއަށް އެހީތެރިކަން ފޯރުކޮށްދީފައިވާ ކަމަށެވެ. އެމީހުންގެ އެހީތެރިކަމާއެކު ފުލުހުންނަށް ގުޅައި، ފުލުހުން ސީންއަށް ދިޔަ ކަމަށާއި، އެ ހާދިސާ ހިނގި ސަފާރީގެ ފޮޓޯއާއި ވީޑީއޯ ވެސް ފުލުހުން ނެގި ކަމަށް އެބޭފުޅާ ވިދާޅުވިއެވެ.

މީގެ އިތުރުން އޭނާ ވިދާޅުވީ ތުހުމަތު ކުރަނީ ދިވެހި ދެ ފިރިހެނުންނަށް ކަމަށާއި، އެ ތަނުން އެއް ފިރިހެނެއްގެ ފަޔަށް ވެސް ބޮޑު ޒަހަމެއް ލިބިފައިވާ ކަމަށެވެ.

މި ހާދިސާއާ ގުޅޭގޮތުން ފުލުހުންގެ ބަހެއް ހޯދުމަށް ކުރި މަސައްކަތް ވަނީ ކާމިޔާބުވާ ގޮތް ނުވެފައެވެ.