ޕުޓިން އަކީ ނުބަައި މީހެއް ނޫން: ވިކްޓޮފް
އޭނާ އަކީ ހަނގުރާމަ ނިންމުމަށް މަސައްކަތް ކުރައްވާ "މޮޅު" ލީޑަރެއް ކަމަށް ވެސް ވިކްޓޮފް ބުނެފައިވެއެވެ.
ޔުނައިޓެޑް ރަޝިޔާގެ 22 ވަނަ ކޮންގްރެސްގައި ރަޝިޔާގެ ރައީސް ޕުޓިން ވާހަކަ ދައްކަވަނީ
ރަޝިޔާގެ ރައީސް ވްލަޑިމިއާ ޕުޓިން އަކީ ގޯސް ނުވަތަ ނުބައި މީހެއް ނޫން ކަމަށާއި، އޭނާ އަކީ އެމެރިކާގެ ރައީސް ޑޮނަލްޑް ޓްރަމްޕްގެ "ރަޙުމަތްތެރިއެއް" ކަމަށް، ޓްރަމްޕްގެ ޚާއްސަ މަންދޫބު ސްޓީވް ވިކްޓޮފް ބުނެފި އެވެ.
މީގެ ކުރިން ޕުޓިންއާ ބައްދަލު ކުރައްވާފައިވާ ވިކްޓޮފް ބުނި ގޮތުގައި އޭނާ އަކީ އިތުބާރު ހުރި ލީޑަރެކެވެ. އަދި ޕުޓިން އަކީ ޓްރަމްޕްގެ ވަރަށް ގާތް އެކުވެރިއެއް ކަމަށް ވެސް އޭނާ ބުނެފައިވެ އެވެ.
މީގެ އިތުރުން ވިކްޓޮފް ބުނީ، ޕުޓިން އާއެކު ކުރިއަށް ގެންދެވުނު މަޝްވަރާ ތަކުގައި، ޔުކްރެއިން ހަނގުރާމަ ނިންމުމަށް މަގެއް ހޯދުމާ މެދު މަޝްވަރާ ކުރެވުނު ކަމަށެވެ.
ވިކްޓޮފް ދެއްވި އިންޓަވިޔުގައި އޭނާ ބުނީ، ޕުޓިން އަކީ އެއްވެސް ޙާލަތެއްގައި "ނުބައި ނުވަތަ ގޯސް" މީހެއް ނޫން ކަމަށެވެ. އަދި އޭނާ އަކީ ހަނގުރާމަ ނިންމުމަށް މަސައްކަތް ކުރައްވާ "މޮޅު" ލީޑަރެއް ކަމަށް ވެސް ވިކްޓޮފް ބުނެފައިވެ އެވެ.
މީގެ އިތުރުން ވިކްޓޮފް ބުނީ 2024 ވަނަ އަހަރު އޮތް އެމެރިކާގެ ރިޔާސީ އިންތިޚާބުގެ ކެމްޕެއިންގެ ތެރޭގައި، ޓްރަމްޕަށް އަމާޒުކޮށް ދެވުނު ހަމަލާއާ ގުޅިގެން، ޕުޓިން ވަނީ ޓްރަމްޕަށް ދުއާކޮށް، އަވަސް ޝިފާ އަކަށް އެދިފައި ކަމަށެވެ.
ހަމައެހެންމެ، ރަޝިޔާގެ ފަންނާނެއް ލައްވައި ޓްރަމްޕްގެ ކުރެހުމެއް ކުރަހައި، އެ ކުރެހުން ޓްރަމްޕަަށް ފޮނުއްވާފައި ކަމަށް ވެސް ވިކްޓޮފް ހާމަ ކުރި އެވެ.
ޔުކްރެއިންގެ ރައީސް ވުލެޑިމިއަރ ޒެލެންސްކީގެ ވާހަކަ ދައްކަމުން ވިކްޓޮފް ބުނީ، މިހާރު އެންމެ ރަނގަޅު ގޮތަކީ ރަޝިޔާ އާއެކު އެއްބަސްވުމަކަށް އާދެވޭތޯ މަސައްކަތް ކުރުން ކަމަށެވެ.
އެހެނީ، ނިއުކުލިއަރ ބާރަކާ ދެކޮޅަށް ދެމި ހުރުމަކީ ޔުކްރެއިިން އަށް ދަތި ކަމަކަށް ވާނެ ކަމަށް ވެސް އޭނާ ބުންޏެވެ.
