އިސްރާއީލްގެ އަސްކަރިއްޔާ އިން ފަލަސްތީނުގެ ޣައްޒާ އަށް އަލުން ހަމަލާ ދޭން ފަށާފައިވާއިރު، ބުރާސްފަތި ދުވަހު ދިން ހަމަލާތަކުގައި ފަަލަސްތީނުގެ 85 މީހަކު ޝަހީދު ކޮށްލައިފި އެވެ.

އިސްރާއީލުން ވަނީ ޣައްޒާގެ އުތުރުގެ ސަރަހައްދު އަދި މެދު ތެރޭގެ ސަރަހައްދުތަކަަށް އަމާޒުކޮށް ވައިގެ މަގުން އަދި އެއްގަމު މަގުން ވެސް ހަމަލާތައް ދީފަ އެވެ. 

އިސްރާއީލުގެ ސިފައިން ބުރާސްފަތި ދުވަހު ބައިތު ލަހިޔާ ސަރަހައްދުގައި ވަނީ އެއްގަމުގެ އޮޕަރޭޝަންތައް ފުޅާ ކޮށްފަ އެވެ.

ހަނގުރާމަ ހުއްޓާލުމަށް މިއަހަރުގެ ޖަނަވަރީ މަހުގެ ތެރޭގައި ވެފައިވާ އެއްބަސްވުމާ ޚިލާފަށް އިސްރާއީލުން މި ފަހުން ދިން ހަމަލާތަކުގައި ހަމާސް ޖަމާއަތުގެ އިސް އޮފިޝަލުން ތަކެއް ވެސް ޝަހީދު ވެފައިވާ ކަމަށް ރިޕޯޓުތައް ބުނެ އެވެ. 

އޭގެ ތެރޭގައި ޣައްޒާގެ ވެރިކަމުގެ އިސްވެރިޔާ އާއި، ސެކިއުރިޓީ ސަރވިސްގެ އިސްވެރިޔާ އާއި، އޭނާގެ އެހީތެރިޔާ އަދި ޖަސްޓިސް މިނިސްޓްރީގެ ޑެޕިއުޓީ މިނިސްޓަރު ހިމެނެ އެވެ.

ހަމާސް އިން ވަނީ އިސްރާއީލަށް އަމާޒުކޮށް ރޮކެޓު ތަކެއް ފޮނުވާލައިފަ އެވެ. އެއާއެކު، އިސްރާއީލުގެ މެދު ތެރޭގެ ސަރަހައްދުގައި ސައިރަން އަޅަފައިވާ ކަމަށް މީޑިއާ ތަކުގައި ބުނެފައިވެ އެވެ.

މިއީ ހަނގުރާމަ ހުއްޓާލަން އެއްބަސްވީ ފަހުން، ހަމާސް ޖަމާއަތުން ދިން ފުރަތަމަ ހަމަލާ އެވެ. އިސްރާއީލުން ނެޓްޒަރިމް ކޮރިޑޯގައި ބަފަރ ޒޯނެއް ގާއިމު ކުރުމަށް މަސައްކަތް ކުރަމުން ދާއިރު، ޣައްޒާގެ އުތުރާއި ދެކުނު ގުޅުވައިދޭ މައި މަގު ކަމަށްވާ، ސަލާހުއްދީން މަގު ބޭނުން ނުކުރުމަށް ރައްޔިތުންނަށް އަންގާފައިވެ އެވެ.

ވޭތުވެ ދިޔަ ތިން ދުވަހުގެ ތެރޭގައި 510 ފަލަސްތީނު ރައްޔިތުން ޝަހީދު ވެފައިވާ އިރު، އޭގެ ދެބައި ކުޅަ އެއްބަޔަކީ އަންހެނުންނާއި ކުޑަކުދިންނެވެ. ހަމާސް އިން މެދުވެރިންނަށް ގޮވާލާފައި ވަނީ ހަނގުރާމަ ހުއްޓުމުގެ އެއްބަސްވުމާ އެއްގޮތަށް އަމަލު ކުރުމަށެވެ.

ނަމަވެސް، އިސްރާއީލުން ބުނެފައި ވަނީ ހަނގުރާމަ ހުއްޓުވުމުގެ ދެވަނަ ފިޔަވަހި ފެށުމުގެ ކުރިން ބާކީ ތިބި ހަނގުރާމައިގެ ރަހީނުން ދޫކުރުމަށް ހަމާސް އަށް މަޖުބޫރު ކުރުމަށް ހަނގުރާމަ ކުރިއަށް ގެންދާނެ ކަމަށެވެ.