އިންޑިއާ އިން ރާއްޖެ ބަލިކޮށްފި

ބައިނަލްއަޤުވާމީ ރަޙުމަތްތެރި ކަމުގައި އަވައްޓެރި އިންޑިއާއާ ދެކޮޅަށް ކުޅުނު މެޗުން ދިވެހި ރާއްޖެ ބަލިވެއްޖެ އެވެ.

އިންޑިއާގެ ޝިލޯންގައި ހުންނަ ޖަވާހަރުލާލު ނެހްރޫ ސްޓޭޑިއަމްގައި ކުޅުނު މެޗުގައި އިންޑިއާ އިން ރާއްޖޭގެ މައްޗަށް ކުރި ހޯދީ 3-0 އިންނެވެ. މެޗުގެ ފުރަތަމަ ހާފުގައި އިންޑިއާ އިން އެއް ލަނޑު ޖެހިއިރު، ދެ ވަނަ ހާފުގައި އެ ޓީމުން ވަނީ ދެ ލަނޑު ޖަހައިފަ އެވެ.

މެޗުގެ ފުރަތަމަ ހާފުގެ 34 ވަނަ މިނެޓުގައި އިންޑިއާ އަށް ލީޑު ނަގައިދިނީ ރާހޫލް ބޭކާ އެވެ. އެއީ އިންޑިއާ އަށް ލިބުނު ކޯނަރެއްގައި ހުރަސްވި ބޯޅަ ގޯލަށް ވައްދާލައިގެން އޭނާ ޖެހި ލަނޑެކެވެ.

އޭގެ ފަހުން ވެސް އިންޑިއާ އިން ވަނީ މެޗުގައި ލަނޑު ޖެހުމަށް ފުރުސަތު ތަކެއް ތަނަވަސްކޮށްފަ އެވެ. މެޗުގެ 66 ވަނަ މިނެޓުގައި އިންޑިއާގެ ދެ ވަނަ ލަނޑު ޖަހައި ލީޑު ފުޅާ ކޮށްދިނީ ލިސްޓަން ކޮލާކޯ އެވެ.

އޭގެ ދިހަ މިނެޓު ފަހުން އިންޑިއާގެ ކެޕްޓަން ސުނިލް ޗެތުރީ ވަނީ އެ ޓީމުގެ ތިން ވަނަ ލަނޑު ޖަހައި އިތުރަށް ލީޑު ފުޅާ ކޮށްފަ އެވެ. މިއީ ޤައުމީ ޓީމަށް ކުޅުން ހުއްޓާލަން ނިންމައި ރިޓަޔާ ކުރި ފަހުން، އަލުން އެނބުރި އައިސް ޗެތުރީ ކުޅުނު ފުރަތަމަ މެޗެވެ.

މިއީ މި މަހު ފަށާ އޭޝިއަން ކަޕް ކޮލިފިކޭޝަން އަށް ތައްޔާރުވުމުގެ ގޮތުން ޤައުމީ ފުޓުބޯޅަ ޓީމުން ކުޅުނު މެޗެކެވެ. އަނެއްކޮޅުން މިއީ އިންޑިއާ އިން ރާއްޖޭގެ މަޗަށް ހޯދި 16 ވަނަ މޮޅެވެ. އިންޑިއާ އަތުން ރާއްޖެ މޮޅުވެފައި ވަނީ ހަތަރު މެޗުންނެވެ. ދެ މެޗެއް ވަނީ އެއްވަރުވެފަ އެވެ.