"ފަނޑިޔާރުންގެ އަދަދު މަދުކުރުމުގެ ބިލް އަނބުރާ ފޮނުވާލެއްވީ، ސުޕްރީމް ކޯޓުގައި ތަޅު އަޅުވާނެ އެހެން ފޯމިއުލާ އެއް ފެނުމުން"
ސުޕްރީމް ކޯޓުގައި މަރުތަޅު އެޅުވިފައިވާ ކަމަށާއި ޤާނޫނީ ވެރިކަމެއް މިއަދު ނެތް ކަމަށް އޭނާ ވިދާޅުވި
ހުޅުމާލެ ދެކުނު ދާއިރާގެ މެމްބަރު ޑރ. އަހްމަދު ޝަމްހީދު
ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު، ޤާނޫނު ނަންބަރު، 2010/22 (ދިވެހިރާއްޖޭގެ ކޯޓުތަކުގެ ޤާނޫނު) އަށް 5 ވަނަ އިސްލާޙް ގެނައުމުގެ ބިލު މަޖިލީހަށް އަނބުރާ ފޮނުވާލެއްވީ ސުޕްރީމްކޯޓުގައި ތަޅު އަޅުވާނެ އިތުރު ފޯމިއުލާ އެއް ފެނުމުން ކަމަށް ރައްޔިތުންގެ މަޖިލީހުގެ ހުޅުމާލެ ދެކުނު ދާއިރާގެ މެމްބަރު އަހުމަދު ޝަމްހީދު ވިދާޅުވެއްޖެއެވެ.
މި އަހަރުގެ ފެބްރުއަރީ 26 ވީ ބުދަ ދުވަހު ބޭއްވެވި ރައްޔިތުންގެ މަޖިލީހުގެ 2025 ވަނަ އަހަރުގެ ފުރަތަމަ ދައުރުގެ 9 ވަނަ ޖަލްސާގައި ފާސްކުރައްވައި، ރައީސުލްޖުމްހޫރިއްޔާގެ އޮފީހަށް، ތަޞްދީޤުކުރެއްވުމަށް މި ބިލު ފޮނުވުމުން ރައީސް ވަނީ އެ ބިލާއި މެދު އަލުން ވިސްނާވަޑައިގަތުމަށް އެދިވަޑައިގެން އަނބުރާ ފޮނުވާލައްވާފައެވެ.
އެ މައްސަލަ އަށް ބަހުސްކުރަން ލިބުނު ފުރުސަތުގައި ވާހަކަދައްކަވަމުން ޑރ.ޝަމްހީދު ވަނީ ސަރުކާރުން މަސައްކަތް ކުރަނީ އެއްގޮތުން ނުވިއްޔާ އަނެއް ގޮތުން ސުޕްރީމް ކޯޓުގައި ތަޅު އަޅުވަން ކަމަށް ވިދާޅުވެފައެވެ. ސުޕްރީމް ކޯޓުގައި މަރުތަޅު އެޅުވިފައިވާ ކަމަށާއި ޤާނޫނީ ވެރިކަމެއް މިއަދު ނެތް ކަމަށް އޭނާ ވިދާޅުވިއެވެ.
މިކަމާއި ގުޅިގެން ނުތަވަސްކަން އުފެދި އެމްޑީޕީން މަގުމައްޗަށް ނުކުތުމުން ޚާއްސަކޮށް އަންހެނުންނަށް އަނިޔާ ކުރާތަން ފެންނަނީ. މިއީ ވަރަށް ބޮޑަށް ވިސްނަން ޖެހޭ ކަމެއް. އެމްޑީޕީން މަގުމައްޗަށް ނުކުތީމަ އެކަމާއި ދެކޮޅަށް ކުރާ ލާއިންސާނީ ކަންކަން މިއީ.ރައްޔިތުންގެ މަޖިލީހުގެ ހުޅުމާލެ ދެކުނު ދާއިރާގެ މެމްބަރު އަހުމަދު ޝަމްހީދު
މި ބިލު މީގެ ކުރިން ވެސް ފާސްކުރެއްވީ އެ ބިލާއި މެދު އެމްޑީޕީން ކަންބޮޑުވުން ފާޅުކުރަމުން ދަނިކޮށެވެ. ކައުންސެލް ޖެނެރަލްވެސް މި ބިލާއި މެދު ކަންބޮޑުވުންތައް ފާޅުކުރައްވާފައިވާތީ އެ ކަންބޮޑުވުންތަކަށް ގޮތެއް ނިންމުމަށްފަހު، ބިލުގެ ބަހުސް ކުރިއަށް ގެންދިއުމަށް އޭރުވެސް އެދިފަ އެވެ. ނަމަވެސް ރިޔާސަތުން ވަނީ ކައުންސެލް ޖެނެރަލް ކަންބޮޑުވުން ފޮނުއްވަން ޖެހޭނީ ކޮމެޓީ އަށް ކަމަށާއި، އެކަމަށް ގޮތެއް ނިންމަން ޖެހޭނީ ކޮމެޓީން ކަމަށް ވިދާޅުވެ، ބިިލުގެ ވޯޓަށް އެހުމުގެ މަސައްކަތް ކުރިއަށް ގެންދަން ނިންމައިފަ އެވެ.
މިހާރު އެ ބިލު އަނބުރާ ފޮނުވާލެއްވީ ސުޕްރީމް ކޯޓުގެ ފަނޑިޔާރުން ސަސްޕެންޑްކޮށް ސުޕްރީމް ކޯޓު ހުއްޓުމަކަށް ގެނައުމަށް ފަހުގައި ކަމަށް އިދިކޮޅު ފަރާތްތަކުން ދަނީ ބުނަމުންނެވެ. ހޯމަ ދުވަހުގެ ޖަލްސާގައި، 57 މެމްބަރުންގެ ވޯޓާއި އެކު އެ ބިލު އިތުރަށް ދިރާސާކުރުމަށް ޖުޑީޝަރީ ކޮމިޓީ އަށް ވަނީ ފޮނުވާފައެވެ.
