ރަޝިޔާ އާއި ޔުކްރެއިންއާ ދެމެދު ކުރިއަށްދާ ހަނގުރާމަ ހުއްޓާލުމުގެ އެއްބަސްވުމުގެ ދަށުން، ވަގުތީ ހުއްޓުމެއް ގެނައުމުގެ ކުރިން ރަޝިޔާ އިން ބޭނުން ވަނީ އިތުރު ބާރުތަކެއް ހޯދަން ކަމަށް، ޔުކްރެއިންގެ ރައީސް ވުލެޑިމިއަރ ޒެލެންސްކީ ވިދާޅުވެއްޖެ އެވެ. 

ޒެލެންސްކީ ވިދާޅުވެފައި ވަނީ ވަގުތީ ގޮތުން ހަނގުރާމަ ހުއްޓާލުމަށް އެއްބަސްވުމުގެ ކުރިން، ރަޝިޔާ އިން ބޭނުން ވަނީ އަސްކަރީ ގޮތުން އިތުރު ކުރިއެރުން ތަކެއް ހޯދަން ކަމަށެވެ.

މިދިޔަ ހަފުތާގައި އެމެރިކާ އިން ހުށަހެޅި 30 ދުވަހުގެ ހަނގުރާމަ ހުއްޓާލުމުގެ ހުށަހެޅުމަށް ރަޝިޔާގެ ރައީސް ވުލެޑިމިއަރ ޕުޓިން މިހާތަނަށް އެއްވެސް ޖަވާބެއް ދެއްވާއި ނުވެ އެވެ. ނަމަވެސް، ޒެލެންސްކީ ވަނީ އެ ހުށަހެޅުން ޤަބޫލު ކުރައްވައި، ހަނގުރާމަ ހުއްޓާލުމަށް އެެއްބަސްވެ ވަޑައިގެންފަ އެވެ.

ޔުކްރެއިންގެ ކީވް ގައި ބޭއްވުނު ނޫސްވެރިންގެ ބައްދަލުވުމެއްގައި ޒެލެންސްކީ ވިދާޅުވީ، ރަޝިޔާ އިން އެއްބަސްވުން ލަސްކުރުމުގެ މަޤްޞަދަކީ ހަނގުރާމައިގެ މައިދާނުގައި އިތުރު ކުރިއެރުން ތަކެއް ހޯދުން ކަމަށެވެ.

މި ހުށަހެޅުން އައިސްފައި ވަނީ ހަނގުރާމަ ފެށިތާ ތިން އަހަރު ފަހުން، ޔުކްރެއިންގެ ގިނަ ސަރަޙައްދުތަކެއް ގައި ރަޝިޔާ އަށް ކުރިއެރުން ތަކެއް ލިބެމުންދާ ދަނޑިވަޅެއްގަ އެވެ.

މީގެ އިތުރުން، ކާސްކް ސަރަޙައްދުން ޔުކްރެއިންގެ ސިފައިން ފަހަތަށް ޖެހުމަށް ޕުޓިން ވަނީ މަޖުބޫރު ކޮށްފަ އެވެ. އަދި އެ ސަރަހައްދުން ޔުކްރެއިންގެ ސިފައިން ބޭލުމުގެ އަމުރެއް ވެސް ޕުޓިން ކުރައްވާފައިވެ އެވެ.

 ޒެލެންސްކީ ވިދާޅުވީ، 30 ދުވަހުގެ ހުއްޓުމަކުން ދިގު މުއްދަތުގެ ސުލްޙައަކަށް މަގު ފަހިވާނެ ކަމަށް ޤަބޫލު ކުރައްވާ ކަމަށެވެ. ނަމަވެސް، އެއްވެސް ޙާލެއްގައި ރަޝިޔާ އަށް ސަރަޙައްދެއް ދޫކޮށްލުމަށް ތައްޔާރު ނޫން ކަމަށް ވެސް ވިދާޅުވި އެވެ.

މިހާރު ރަޝިޔާ އިން ވަނީ ޔުކްރެއިންގެ ދެކުނާއި އިރުމަތީ ސަރަޙައްދުތަކެއް އަތުލައިގަނެ، ހަތަރު ސަރަޙައްދެއް އެ ޤައުމުގެ ބައެއްގެ ގޮތުގައި އިޢުލާން ކޮށްފަ އެވެ.