ކޯޓުތަކާއި، މަޖިލިސް މިނިވަންކަމާއެކު ހިނގަންޖެހޭ: މެންބަރު އަނާރާ

ދިވެހިރާއްޖޭގެ ކޯޓުތަކާއި ރައްޔިތުންގެ މަޖިލިސް މިނިވަންކަމާއެކު ހިނގަންޖެހޭ ކަމަށް ރައްޔިތުންގެ މަޖިލީހުގެ ހުރާ ދާއިރާގެ މެންބަރު ޑރ. އަނާރާ ނައީމް ވިދާޅުވެއްޖެއެވެ.

ރައްޔިތުން މަޖިލީހުން ފާސްކޮށް، ދިވެހިރާއްޖޭގެ ޖުމްހޫރިއްޔާގެ ގާނޫނުއަސާސޫގެ 91 ވަނަ މާއްދާގެ (ހ)ގެ ދަށުން ތަސްތީގު ކުރެއްވުމަށް ރައީސުލްޖުމްހޫރިއްޔާގެ އަރިހަށް ފޮނުވުނު ދިވެހިރާއްޖޭގެ ކޯޓުތަކުގެ ގާނޫނަށް 5 ވަނަ އިސްލާހު ގެނައުމުގެ ބިލާމެދު އަލުން ވިސްނެވުމަށް ރައީސުލްޖުމްހޫރިއްޔާ ފޮނުއްވި މައްސަލައަށް ބަހުސް ކުރައްވަމުން މެންބަރު އަނާރާ ވިދާޅުވީ ރައްޔިތުންގެ މަޖިލީހަށް ހުށަހަޅޭ ބިލްތަކަށް އިތުރުވަގުތު އެބަ ދޭންޖެހޭ ކަމަށާއި، މާ އަވަހަށް، އަވަސް އަރުވާލައިގެން ބިލުތައް ފާސްކުރުމުގެ ނަތީޖާ ރަނގަޅު ނޫން ކަމަށެވެ.

ގާނޫނު އަސާސީއަށް އިޝާރާތް ކުރައްވައި މެންބަރު އަނާރާ ވިދާޅުވީ މި ގާނޫނު އަސާސީއަކީ ވަރަށް ގިނަ ދިރާސާތަކަކަށްފަހު ގެނެސްފައިވާ ގާނޫނު އަސާސީއެއް ކަމަށާއި، ވަރަށް ގިނަ ހައްގުތަކެއް އެކުލެވިގެންވާ ގާނޫނު އަސާސީއެއް ކަމަށެވެ. މިއީ އަމިއްލަ ރައްޔުކަން ފާހަގަކުރައްވައި މެންބަރު އަނާރާ ވިދާޅުވީ ޖުޑީޝަރީއަކީ މިނިވަން މުސްތަގިއްލު ތަނެއްގެ ގޮތުގައި އަބަދުވެސް އޮންނަންޖެހޭ ކަމަށެވެ. އަދި މިކަން ޕީޖީ ބައްދަލުވުމުގެ އިތުރުން މަޖިލީހުގެ ކޮމެޓީގައި ވެސް ފާހަގަ ކުރެއްވި ކަމަށް މެންބަރު އަނާރާ ވިދާޅުވިއެވެ.

މީގެ އިތުރުން މެންބަރު އަނާރާ ވިދާޅުވީ ކޯޓުތަކާއި، ރައްޔިތުންގެ މަޖިލިސް މިނިވަންކަމާއެކު ހިނގަންޖެހޭ ކަމަށެވެ.

އަޅުގަނޑު ގަބޫލުރަނީ ހަގީގަތުގައި މަޖިލީހުގައި މަސައްކަތްތައް މިހާރަށް ވުރެ މަޝްވަރާއާއި، އަދި ރައްޔިތުންގެ ހިޔާލު ހޯދުމާއި، މިހުރިހާ ކަންތައްތަކެއް އެކުލެވެންޖެހޭ ކަމަށް. އެއީ އަޅުގަނޑުމެން މި ގާނޫނު އަސާސީ ގެނެސްފައި މިވަނީ ވަރަށް މާތް މަގުސަދެއްގައި. ބާރުތައް ބެހިގެންވާ ގޮތަށް އަމަލު ކުރުމަށް. ހަމަ އެގޮތަށް ރަނގަޅު ނިޒާމެއްގެ ދަށުން ހުރިހާ ކަންތައްތަކެއް ވެސް ހިނގަމުންްދާ ގޮތް ހަމަޖެއްސުމަށް. އަޅުގަނޑަށް ފާހަގަވީ އެދުވަހު ވަރަށް އަވަސް އަރުވާލައިގެން އެބިލު ފާސްކުރުމުގެ ސަބަބުން ރައީސުލްޖުމްހޫރިއްޔާ އަނބުރާ މިބިލު ފޮނުވާލައްވާފައި މިވަނީ. އެކަމަށް ވެސް މަރުހަބާ ދަންނަވަން. ރައީސް އަނބުރާ ފޮނުއްވާލެއްވީތީ މިފަދަ ބިލެއް. ހަގީގަތުގައި ކޯޓުތަކަކީ ވެސް ވަރަށް މިނިވަންކަމާއެކު ހިނގަންޖެހޭ ތަނަކަށް ވާންޖެހޭ. ރައްޔިތުންގެ މަޖިލިސް ވެސް ވަރަށް މިނިވަންކަމާއެކު ހިނގަންޖެހޭ ތަނަކަށްވާންޖެހޭ.

ރައްޔިތުންގެ މަޖިލީހުގެ ހުރާ ދާއިރާގެ މެންބަރު ޑރ. އަނާރާ ނައީމް

މެންބަރު އަނާރާ ވިދާޅުވީ ކުރިއަށް އޮތްތަނުގައި އަވަސް އަރުވާލައިގެން ބިލްތައް ފާސްނުކުރުމާއި، މިފަދަ މައްސަލަތައް ތަކުރާރުނުވާނެ ގޮތަކަށް މަސައްކަތް ކުރާނެ ކަމަށް އުންމީދު ކުރާ ކަމަށެވެ.