ރައީސް މުއިއްޒު ވެވަޑައިގެންނެވި ވައުދުފުޅުތައް ނުފުއްދަވާ ދަނީ ރައްޔިތުންނަށް އަނިޔާވެރިވަމުން: މަންދީ

ރައީސް ޑރ.މުހައްމަދު މުއިއްޒު ވެވަޑައިގެންނެވި ވައުދުފުޅުތައް ނުފުއްދަވާ ދަނީ ރައްޔިތުންނަށް އަނިޔާވެރިވަމުން ކަމަށް ދިވެހި ރައްޔިތުންގެ ޑިމޮކްރަޓިކް ޕާޓީ (އެމްޑީޕީ)ގެ ސިޔާސީ ހަރަކާތްތަކުގައި އިސްކޮށް އުޅޭ މަރިޔަމް ޒުބައިރު (މަންދީ) ބުނެފިއެވެ.

އާދިއްތަ ދުވަހުގެ މެންދުރުފަހު 1:30ގައި މަންދީ ވަނީ ސާޖަންޓް އާދަމް ޚަލީމް ކްރިމިނަލް އިންވެސްޓިގޭޝަން ބިލްޑިންގއަށް ހާޒިރުވެފައެވެ. އެ ސަރަހައްދުގައި ހުރެ ރާއްޖެއެމްވީއަށް މަންދީ ބުނީ ރައީސް މުއިއްޒު ވެރިކަމަށް ވަޑައިގެންނެވީ ގިނަ ވައުދުފުޅުތަކާއެކު ކަމަށާއި، ނަމަވެސް އެ ވައުދުފުޅުތައް ނުފުއްދަވާ ރައްޔިތުންނަށް އަނިޔާވެރި ވަމުންދާ ކަމަށެވެ.

މާލޭގެ ރައްޔިތުންނާއި މާލޭގައި ގިނަ ދުވަހު ދިރިއުޅުނު ރައްޔިތުންނަށް ކުރީ ސަރުކާރުން ދިން ގޯއްޗާއި، ފްލެޓުތައް ވެސް މިސަރުކާރުން އަތުލާފައިވާކަން މަންދީ ފާހަގަކުރި އެވެ. އަދި ވެރިކަމަށް ވަޑައިގެންނެވީ ގޯއްޗާއި، ފްލެޓު އަތުނުލާނެކަމުގެ ވައުދުފުޅާ އެކު ކަމަށެވެ.

އެއަށްފަހު އެވައުދުތައް ތަކުރާރު ކުރެއްވީ ރައްޔިތުން މަޖިލީހުގެ އިންތިޚާބުގެ ތެރޭގައި. އެއީ އެބޭފުޅުންނަށް ސުޕަ މެޖޯރިޓީ ވެސް ރައްޔިތުން ދެއްވީ މިކަންކަމަށްޓަކައި. އެކަމަކު އޭގެން އެއްވެސް ވައުދަކަށް ކަމޭ ނުހިއްތަވާ ރައްޔިތުންނަށް އަނިޔާވެރިވަމުން މިދަނީ. ދެން އޭގެ އިތުރަށް އެބޭފުޅާ ވަރަށް ވައުދުވި ވަޒީފާތަކުން މީހުން ނުކަނޑާނެ ކަމަށާއި، ސިޔާސީ ފިކުރަށް ނިސްބަތްވާތީ ވަޒީފާ ނުދާނެ ކަމާއި. އެކަމަކު ވެރިކަމަށް ވަޑައިގެން އެތައް ސަތޭކަ ރައްޔިތުންނެއްގެ ވަޒީފާ ދުއްވާލައިފި.

އެމްޑީޕީގެ ސިޔާސީ ހަރަކާތްތަކުގައި އިސްކޮށް އުޅޭ މަރިޔަމް ޒުބައިރު (މަންދީ)

މަންދީ ބުނީ އެމްޑީޕީއަކީ އަބަދުވެސް ރައްޔިތުންގެ ހައްގުގައި ނުކުންނަ ޕާޓީއެއް ކަމަށާއި، ރައްޔިތުންނަށްޓަކައި އަބަދުވެސް މަސައްކަތް ކުރާނެ ކަމަށެވެ. ހައްގުތަކަކީ ވަކި ބަޔަކަށް އޮންނަ އެއްޗެއް ނޫން ކަމަށާއި، ގާނޫނު އަސާސީން ކޮންމެ ރައްޔިތަކަށް ވެސް ހައްގުތައް ކަށަވަރުކޮށްދޭ ކަމަށް އޭނާ ބުންޏެވެ.

މަންދީ ބުނީ ފުލުހަށް ހާޒިރުކޮށް، ބިރު ދެއްކުމަށް މަސައްކަތް ކުރި ނަމަވެސް އެކަން ކާމިޔާބު ނުވާނެ ކަމަށާއި، ފަހަތަށް ނުޖެހޭނެ ކަމަށެވެ.