ޖަމާއަތްތެރިންނަށް ދެމުން އައި "ގަބުރުސްތާން އެލަވަންސް" ސަރުކާރުން އުނިކުރުމުން ސިޓީ ކައުންސިލުން އެ އެލަވަންސް ދޭން ނިންމައިފި
13 މާރިޗު 2025 | ބުރާސްފަތި 06:57ޖަމާއަތްތެރިންނަށް ދެމުން އައި "ގަބުރުސްތާން އެލަވަންސް" ސަރުކާރުން އުނިކުރީ މިމަހުގެ 10 ވަނަ ދުވަހު
މޭޔަރ އާދަމް ޢާޒިމް، އާސަހަރާގަޔާއި ހުޅުމާލެ ސަހަރާގައި މަސައްކަތް ކުރައްވާ ޖަމާއަތްތެރިންނާ ބައްދަލުކުރައްވަނީ
ޖަމާއަތްތެރިންނަށް ދެމުން އައި "ގަބުރުސްތާން އެލަވަންސް" ސަރުކާރުން އުނިކުރުމުން މާލެ ސިޓީގެ ޖަމާއަތްތެރިންނަށް ސިޓީ ކައުންސިލުން އެ އެލަވަންސްދޭން ނިންމައިފިއެވެ.
ކައުންސިލްތަކުގެ ސެކެރެޓަރީ ޖެނެރަލުންނަށް މިދިޔަ ބުރާސްފަތި ދުވަހު ސީއެސްސީން ނެރުނު ސާކިއުލާއެއްގައިވަނީ، މަރުވާ މީހުން ވަޅުމުގެ މަސައްކަތްކުރާ މީހުންނަށްދޭ "ޖަމާއަތްތެރިންނާއި ގަބުރުސްތާނު އެލަވަންސް" މި މަހުގެ 10 ވަނަ ދުވަހުން ފެށިގެން އުވާލައިފައިވާ ކަމަށެވެ. މި ސާކިއުލާގައި ބުނެފައިވަނީ އެ އެލަވަންސް ދިނުމުގައި މާލިއްޔަތު ގަވައިދާ ފުށުނާރާ ގޮތަށް، ކައުންސިލްގެ ފުދުންތެރިކަމަށް ރިއާޔަތްކޮށް ކައުންސިލުން ކަނޑައަޅާ ގޮތަށް އަމަލު ކުރުމަށް އެދޭ ކަމަށެވެ.
ނަމަވެސް މާލެ ސިޓީގައި މަސައްކަތް ކުރާ ޖަމާއަތްތެރިންގެ އެލަވަންސް އެ ކައުންސިލުން ދިނުމަށް ވަނީ ނިންމާފައެވެ. މި އެލަވަންސް ދިނުމަށް ކައުންސިލުން ނިންމީ، ބުދަ ދުވަހު އޮތް ކައުންސިލްގެ 4 ވަނަ ދައުރުގެ 187 ވަނަ ރަސްމީ ޢާއްމު ޖަލްސާގައި ބައިވެރިވެވަޑައިގެންނެވި ހުރިހާ މެމްބަރުންގެ އިއްތިފާގުންނެވެ.
ޖަލްސާއަށް މިކަން ހުށަހަޅައިދެއްވާއި ވާހަކަ ދައްކަވަމުން މާލެ ސިޓީގެ މޭޔަރ އާދަމް ޢާޒިމް ވިދާޅުވީ، ޖަމާޢަތްތެރިންނަކީ މުހިންމު އަދި މާތް މަސައްކަތްތަކެއް ކުރާ ބައެއް ކަމަށާއި ކުއްލިއަކަށް ވަކި ސަބަބެއް ބަޔާން ކުރެއްވުމެއް ނެތި، ޖަމާއަތްތެރިންގެ އެލަވަންސް ކާޑާލުމަކީ އެއްވެސް އިންސާފުވެރިކަމެއް ނެތި ކުރައްވާފައިވާ ކަމެއްކަމަށެވެ. ޖަމާއަތްތެރިންނަށް ގަބުރުސްތާނު އެލަވަންސްގެ ގޮތުގައި ދެނީ ދުވާލަކަށް 50 ރުފިޔާއެވެ.
މޭޔަރ ޢާޒިމް ވިދާޅުވީ، ޖަމާޢަތްތެރިންގެ މުސާރައިން އުނިކުރި 1500 ރުފިޔާ ދެމުން ދެން ދާނީ ކައުންސިލްގެ ބަޖެޓުން ކަމަށެވެ. އަދި މި ކަން ކުރުމަށް އެއްވެސް ދަތިކަމެއް ނެތް ކަމަށް ވެސް މޭޔަރ ޢާޒިމް ފާހަގަ ކުރެއްވިއެވެ.
މޭޔަރ ޢާޒިމްގެ އިތުރުން ޖަމާއަތްތެރިންގެ ހައްޤުގައި، ގަލޮޅު އުތުރު ދާއިރާގެ ކައުންސިލަރު މުހައްމަދު ސައިފް ފާތިހު ވާހަކަ ދައްކަވަމުން ވިދާޅުވީ، ބަރަކާތްތެރި ރަމަޟާން މަހެއްގައި ވަކި ސަބަބެއް ބަޔާން ނުކުރައްވައި ޖަމާއަތްތެރިންގެ އެލަވަންސް ކަނޑާލުމަކީ ބަލައިގަނެވޭނެ ކަމެއް ނޫން ކަމަށާއި މިގޮތަށް އެލަވަންސް ކަނޑާ ކަމަށް ވާނަމަ ޖަމާޢަތްތެރިން ނޫނަސް، ސިވިލްސާވިސްގެ އެހެން މުވައްޒަފުންގެ އެލަވަންސް ވެސް ކަނޑާލަފާނެކަމުގެ ބިރު އޮތް ކަމަށެވެ.
ސިވިލް ސާވިސް ކޮމިޝަނުން ހުރިހާ ސިޓީ، އަތޮޅު އަދި ރަށު ކައުންސިލެއްގެ ސެކްރެޓަރީ ޖެނެރަލުންނަށް ފޮނުވި ސާކިއުލާއެއްގައި ބުނީ، އެ އެލަވަންސް ދިނުމުގައި މާލިއްޔަތު ގަވާޢިދާ ފުށުނާރާ ގޮތަށް، ކައުންސިލްގެ ފުދުންތެރިކަމަށް ރިއާޔަތްކޮށް ކައުންސިލުން ކަނޑައަޅާ ގޮތަށް ޢަމަލު ކުރުމަށް އެދޭ ކަމަށެވެ. ނަމަވެސް އެ އެލަވަންސް ސިވިލް ސާވިސް ކޮމިޝަނުން އުވައިލި ސަބަބެއް މިހާތަނަށް ހާމަ ނުކުރެއެވެ.
ދާދީ ފަހުން މޭޔަރ ޢާޒިމް ވަނީ އާސަހަރާގަޔާއި ހުޅުމާލެ ސަހަރާގައި މަސައްކަތް ކުރައްވާ ޖަމާއަތް ތެރިންނާ ބައްދަލުކުރައްވައިފައެވެ.
