މިއަހަރުގެ ސަރަހައްދީ ފުޓުބޯޅަ މުބާރާތް (ސާފް) ޗެމްޕިއަންޝިޕް ސްރީ ލަންކާގައި ބާއްވަން ނިންމައިފި އެވެ.

މިއަހަރުގެ މުބާރާތް ސްރީ ލަންކާގައި ބާއްވަން ނިންމާފައި ވަނީ ޖޫން މަހުގެ 22 ވަނަ ދުވަހުން ފެށިގެން، ޖުލައި މަހުގެ ފަސް ވަނަ ދުވަހުގެ ނިޔަލަށެވެ.

އެންމެ ފަހުން ސްރީ ލަންކާގައި ސާފް ޗެމްޕިއަންޝިޕް ބާއްވާފައި ވަނީ 2008 ވަނަ އަހަރު އެވެ. އެއަހަރުގެ މުބާރާތް ކުރިއަށް ގެންދިޔައީ ލަންކާގެ އިތުރުން، ރާއްޖެ ގުޅިގެން ކޯ ހޯސްޓު ކުރާ ގޮތަށެވެ. އެ ފަހަރުގެ މުބާރާތުގެ ފައިނަލްގައި އިންޑިއާ ބަލިކޮށް ރާއްޖެ އިން ވަނީ ޗެމްޕިއަންކަން ހޯދައިފި އެވެ.

ސްރީ ލަންކާގައި މިއަހަރުގެ ސާފް ޗެމްޕިއަންޝިޕް ބާއްވަން ނިންމާފައި ވަނީ ނޭޕާލްގެ ކަތަމަންޑޫގައި އަންގާރަ ދުވަހު އޮތް ސާފްގެ ހިންގާ ކޮމެޓީގެ ބައްދަލުވުމުގަ އެވެ.

އެންމެ ފަހުން ސާފް ޗެމްޕިއަންޝިޕް ބާއްވާފައި ވަނީ 2023 ވަނަ އަހަރު އެވެ. އިންޑިއާގެ ބެންގަލޫރުގައި ކުރިއަށް ގެންދިޔަ އެ މުބާރާތް ކާމިޔާބު ކުރީ ވެސް އިންޑިއާ އިންނެވެ.

އެ އަހަރުގެ މުބާރާތުގައި ސްރީ ލަންކާ ވާދަކޮށްފައެއް ނުވެ އެވެ. އެއީ ދުނިޔޭގެ ފުޓުބޯޅައިގެ މައި އިދާރާ (ފީފާ) އިން ސްރީ ލަންކާގެ ފުޓުބޯޅަ ފެޑެރޭޝަން ސަސްޕެންޑު ކޮށްފައި އޮތުމުންނެވެ.

މިއަހަރުގެ ސާފް ޗެމްޕިއަންޝިޕްގެ ފޯމެޓު ހޯމް އެންޑް އަވޭ އުސޫލުން ކުޅެން ނިންމިކަން މީގެ ކުރިން ސާފް އިން ވަނީ އިއުލާން ކޮށްފަ އެވެ. ނަމަވެސް، އެކަށީގެންވާ މިންވަރަށް ތައްޔާރުވެވިފައި ނުވާތީ، އައު ފޯމެޓަށް މުބާރާތް ކުރިއަށް ގެންދެވޭ ގޮތެއް ނުވި އެވެ.

މިއަހަރުގެ ސާފް ޗެމްޕިއަންޝިޕާ ކުރިމަތިލާއިރު، ފީފާ އިން ވަނީ ދިވެހި ރާއްޖެ ނޯމަލައިޒް ކޮށްފަ އެވެ. ނަމަވެސް ގިނަ ދުވަސްތަކަކަށްފަހު، ރާއްޖޭގެ ސީނިއާ ޤައުމީ ޓީމުގެ ފަރިތަކުރުންތަށް ވަނީ ފަށައިފަ އެވެ. އެއީ މި މަހު ކުޅޭ ބައިނަލްއަޤުވާމީ ރަޙުމަތްތެެރިކަމުގެ މެޗު އަދި އޭޝިއަން ކަޕް ކޮލިފިކޭޝަންގެ މެޗުތަކަށް ތައްޔާރުވުމުގެ ގޮތުންނެވެ.