އައިސީސީގެ އަމުރެއްގެ ދަށުން، ފިލިޕީންސްގެ ކުރީގެ ރައީސް ޑުޓާޓީ ހައްޔަރު ކޮށްފި

ފިލިޕީންސް ކުރީގެ ރައީސް ރޮޑްރިގޯ ޑުޓާޓީ، އިންޓަނޭޝަނަލް ކްރިމިނަލް ކޯޓް (އައި.ސީ.ސީ)ގެ އަމުރެއްގެ ދަށުން ހައްޔަރު ކޮށްފި އެވެ. 

އުމުރުފުޅުން މިހާރު 79 ވަނަ އަހަރުވެފައިވާ ޑުޓާޓީ އަންގާރަ ދުވަހުގެ ވަގުތެއްގައި ހައްޔަރު ކޮށްފައިވާކަން ފިލިޕީންސްގެ ރައީސުލްޖުމްހޫރިއްޔާގެ އޮފީހުން ވަނީ ހާމަކޮށްފަ އެވެ.

ޑުޓާޓީ ހައްޔަރު ކޮށްފައި ވަނީ އޭނާގެ ވެރިކަމުގައި މަސްތުވާތަކެއްޗާ ދެކޮޅު ހަނގުރާމައިގައި އިންސާނިއްޔަތާ ދެކޮޅު ކުށްތަކެއް ކުރިކަމުގެ ދައުވާތަކާ ގުޅިގެންނެވެ. 

ޑުޓާޓީ ހައްޔަރު ކުރި ފަހުން އެ ޤައުމުގެ ރައީސުލްޖުމްހޫރިއްޔާގެ އޮފީހުން ނެރުނު ބަޔާނުގައި ބުނެފައި ވަނީ. މިހާރު ޑުޓާޓީ ހުންނެވީ ފުލުހުންގެ ބެލުމުގެ ދަށުގައި ކަމަށެވެ. 

 ހޮންކޮންގަށް ކުރެއްވި ކުރު ދަތުރުފުޅަކަށްފަހު، ޑުޓާޓީ އެނބުރި ޤައުމަށް ވަޑައިގެންނެވުމާ އެކު، މެނިލާ އެއާޕޯޓުން ވަނީ އޭނާ ހައްޔަރު ކޮށްފަ އެވެ.

ޑުޓާޓީގެ ވެރިކަމުގައި ހިންގުނު މަސްތުވާތަކެއްޗާ ދެކޮޅު ހަނގުރާމައިގައި، ނިކަމެތި ފަންތީގެ ދިހަހާށްވުރެ ގިނަ ފިރިހެނުން މަރާލެވުނު ކަމަށް އިންސާނީ ޙައްޤުތަކުގެ ޖަމާޢަތްތަކުން ލަފާކުރެ އެވެ.

މީގެ ތެރެއިން ގިނަ މީހުންނަކީ މަސްތުވާތަކެއްޗާ ގުޅުން ހުރިކަން ސާބިތުނުވާ މީހުންނެވެ. 2019 ގައި ފިލިޕީންސް، އައިސީސީން ވަކިވި ނަމަވެސް، އެ ކޯޓުން ބުނެފައި ވަނީ ވަކިވުމުގެ ކުރިން ހިނގި މަރުތަކާއި، ޑުޓާޓީ ދަވާއޯގެ މޭޔަރު ކަމުގައި ހުރިއިރު ހިނގި މަރުތަކުގެ މައްޗަށް އުމުރު ކުރުމުގެ ބާރު އެ ކޯޓަށް ލިބިގެންވާ ކަމަށެވެ.

މިހާރުގެ ރައީސް ފަރްޑިނަންޑް މާކޯސްގެ ސަރުކާރުން އައިސީސީގެ ތަޙުޤީޤުތަކާ އެކު މަސައްކަތް ނުކުރާނެ ކަމަށް ބުނެފައިވީ ނަމަވެސް، ރައީސް އޮފީހުގެ އަންޑާ ސެކްރެޓަރީ ކްލެއަރ ކާސްޓްރޯ ވަނީ އިންޓަޕޯލްގެ އެހީތެރިކަމަށް އެދިއްޖެ ނަމަ، އެއަށް އިޖާބަ ދޭން ޖެހޭނެ ކަމަށް ބުނެފަ އެވެ.

ޑުޓާޓީ އަކީ މިހާރު ވެސް ފިލިޕީންސްގެ ރައްޔިތުންގެ މެދުގައި ވަރަށް މަޤުބޫލު ސިޔާސީ ލީޑަރެކެވެ. އަދި އޭނާ ވަނީ މިއަހަރުގެ މެއި މަހުގައި ބޭއްވުމަށް ހަމަޖެހިފައިވާ މެދު ތެރޭގެ އިންތިޚާބުގައި ދަވާއޯގެ މޭޔަރު ކަމަށް ކުރިމަތި ލައްްވައިފަ އެވެ.