ފްލިކް ބުނީ ފޯކަސް ގެއްލުވާލައިގެން ނުވާނެ ކަމަށް!

ޔުއެފާ ޗެމްޕިއަންސް ލީގުގެ ގަދަ 16 ވަނަ ބުރުގެ ދެ ވަނަ ލެގުގައި ބެންފީކާއާ ދެކޮޅަށް ނިކުންނައިރު، ބާސެލޯނާ އިން ފޯކަސް ގެއްލުވާލައިގެން ނުވާނެ ކަމަށް އެ ޓީމުގެ ކޯޗު ހަންސީ ފްލިކް ބުނެފި އެވެ.

ބެންފީކާގެ އަމިއްލަ ދަނޑުގައި މި ދެ ޓީމު ބައްދަލު ކުރި މެޗު ބާސެލޯނާ އިން ވަނީ 1-0 އިން ކާމިޔާބު ކޮށްފަ އެވެ. އެހެންކަމުން، ބާސެލޯނާގެ ދަނޑުގައި ކުޅޭ ދެ ވަނަ ލެގުން ބަލި ނުވެ ފަރުޖައްސާލައިގެން އެ ޓީމަށް މުބާރާތުގެ ކުއާޓާ ފައިނަލްގެ ފުރުސަތު ހޯދޭނެ އެވެ.

ދެ ވަނަ ލެގުގެ ކުރިން އޮތް ނޫސްވެރިންގެ ބައްދަލުވުމުގައި ވާހަކަ ދައްކަމުން ފްލިކް ބުނީ، ދެ ވަނަ ލެގުގައި ބެންފީކާ އަށް ޕްރެޝަރު ކުރުވަން ޖެހޭނެ ކަމަށެވެ. އެއާއެކު ޑިފެންސްގައި ވެސް ވަރަށް ބޮޑަށް ސަމާލުވާން ޖެހޭނެ ކަމަށް އޭނާ ފާހަގަ ކުރި އެވެ.

ޚާއްސަކޮށް ފުރަތަމަ ލެގުގައި ބެންފީކާ އިން ވަނީ އެ ޓީމަކީ ކައުންޓަރ އެޓޭކުގައި ނުރައްކާތެރި ޓީމެއްކަން ދައްކާފައި ކަމަށާއި، ބާސެލޯނާ އިން އެކަމާ މެދު ވަރަށް ބޮޑަށް ސަމާލުވާން ޖެހޭނެ ކަމަށް ފްލިކް ބުނެފައިވެ އެވެ.

މެޗުން މޮޅުވުމަށް ބާސެލޯނާ އިން ކުރަން ޖެހޭ އެންމެ ބޮޑު ކަމަކީ މެޗުގެ ފޯކަސް ގެއްލުވާ ނުލައި، ރަނގަޅު ކުޅުމެއް ދެއްކުން ކަމަށް އޭނާ ބުންޏެވެ. ދެ ވަނަ ލެގަށް ބާސެލޯނާ އިން ތައްޔާރުވީ ވަރަށް ރަނގަޅަށް ކަމަށާއި، ޓީމުގެ ފަރިތަކުރުންތައް ވެސް ދިޔައީ ހިތްހަމަ ޖެހޭ ގޮތުގައި ކަމަށް ފްލިކް ބުންޏެވެ.

ދެ ވަނަ ލެގަށް ނިކުންނައިރު މިއީ ބާސެލޯނާ އަށް ވަރަށް މުހިންމު ވަގުތެއްގެ ގޮތުގައި ފްލިކް ސިފަ ކުރި އެވެ. އޭނާ ބުނީ މުޅި ކުލަބު އޮތީ މޮޅެއް ހޯދައި، ކުރިއަށް ދާން ބޭނުންވެފައި ކަމަށެވެ. ބާސެލޯނާގެ ކުޅުންތެރިންނަށް އޭނާގެ ފުރިހަމަ އިތުބާރު އޮންނަ ކަމަށާއި، އެކަން ޙާސިލު ކުރެވޭނެ ކަމުގެ ފުރިހަމަ ޔަޤީންކަން އޮންނަ ކަމަށް ފްލިކް ބުންޏެވެ.

ބާސެލޯނާ އާއި ބެންފީކާ ބައްދަލު ކުރާ ދެ ވަނަ ލެގުގެ މެޗު ފަށާނީ އަންގާރަ ދުވަހުގެ ރޭ ރާއްޖެ ގަޑިން، 10:45 ގައެވެ.