ޕްރިމިއާ ލީގުގެ ގަދަ ހަތަރެއްގެ ޖާގަ ޗެލްސީ، ޓޮޓެންހަމް ހޮޓްސްޕާ އަދި ލިވަޕޫލް އިން ކަށަވަރުކޮށްފި އެވެ.

އާދީއްތަ ދުވަހުގެ ރޭ ކުޅުނު މެޗުތަކަށް ފަހު، ޕްރިމިއާ ލީގުގެ ޕޮއިންޓް ތާވަލު މިހާރު އެތުރިފައިވާ ގޮތަށް ބަލާއިރު، އެއްވަނަ ލިބެނީ ޗެލްސީއަށެވެ. ދެވަނަ ޓޮޓެންހަމްއަށް ލިބޭއިރު، ތިންވަނަ ލިބެނީ ސިޓީއަށެވެ. އަދި ހަތަރުވަނަ ލިބުނީ ލިވަޕޫލްއަށެވެ.

އާދީއްތަ ދުވަހުގެ ރޭ ކުޅުނު މެޗުތަކަށް ބަލާއިރު، ލީގުގެ ޗެމްޕިއަން ޗެލްސީން 1-5 ގެ ތަފާތު ބޮޑު ނަތީޖާއަކުން ވަނީ ސަންޑަލޭންޑް ބަލިކޮށްފައެވެ. ދެވަނަ ހޯދި ޓޮޓެންހަމް އިން ހަލް ސިޓީއާ ވާދަކޮށް 1-7 ގެ ތަފާތުބޮޑު ނަތީޖާއަކުން މޮޅުވެފައިވާއިރު، ތިންވަނަ ހޯދި ސިޓީ ވެސް މޮޅުވީ ވަޓް ފޯޑްއާ ވާދަކޮށް 0-5 ގެ ތަފާތު ބޮޑު ނަތީޖާއަކުންނެވެ. އަދި ހަތަރުވަނަ ހޯދި ލިވަޕޫލް މޮޅުވީ މިޑިލްސްބްރާއާ ވާދަކޮށް 0-3 ގެ ނަތީޖާއަކުންނެވެ.

ހަތަރު ވަނަ ހޯދުމަށް އެންމެ ކައިރިން ވާދަކުރި އާސެނަލް ވަނީ އެކަކު މަދުކޮށް ކުޅެ އެވަޓަން އަތުން 2-1 އިން މޮޅުވެފައެވެ. 

ގަދަ ތިނެއްގައި ހިމެނުނު ޓީމުތައް ޗެމްޕިއަންސް ލީގަށް ކޮލިފައިވެފައިވާއިރު، ލިވަޕޫލް ޖެހޭނީ ކޮލިފައިން ކުޅޭށެވެ. މިފަހަރު މެންޗެސްޓާ ޔުނައިޓެޑް އަދި އާސެނަލް އަށް ޗެމްޕިއަންސް ލީގުން ފުރުސަތު ލިބިފައިނުވާއިރު، މި ދެޓީމު ވާދަކުރަންޖެހޭނީ ޔޫރޮޕާ ލީގުގަ އެވެ.

ޕްރިމިއާ ލީގުން މިފަހަރު ރެލިގޭޓްވެފައި ވަނީ ހަލް ސިޓީ، މިޑިލްސްބްރާ އަދި ސަންޑަލޭންޑެވެ. މީގެ އިތުރުން ޗެމްޕިއަންޝިޕް ނުވަތަ ދެ ވަނަ ޑިވިޝަންގެ ޗެމްޕިއަންކަން ހޯދައި ނިއުކާސަލް ވަނީ ޕްރިމިއާ ލީގަށް އެނބުރި އައިސްފައެވެ. 

މި ސީޒަނުގައި އެންމެ ފާހަކޮށްލަން ޖެހެނީ އެންމެ ފަހުގެ ޗެމްޕިއަން ލެސްޓާ ސިޓީއެވެ. ސީޒަން ނިމުނުއިރު، އެޓީމު އޮތީ 44 ޕޮއިންޓާއެކު ޕޮއިންޓް ތާވަލުގެ 12 ވަނައިގައެވެ. މީގެ އިތުރުން އެޓީމު ކުޅުނު 38 މެޗުގެ ތެރެއިން މޮޅުވެފައިވަނީ ވެސް އެންމެ 12 މެޗުންނެވެ.