ވިކްޓްރީ އަކީ ލީގުގައި އެންމެ ވަރުގަދަ އެއް ޓީމު، ދެޓީމަށްވެސް ފަސޭހައެއްނުވާނެ: ސެކުލޮވްސްކީ

ވިކްޓްރީ ސްޕޯޓްސް ކްލަބް އަކީ މާލޭ ލީގުގައި ކުޅޭ އެންމެ ވަރުގަދަ އެއް ކްލަބް ކަމަށާއި، މި މެޗަކީ ދެޓީމަށްވެސް އުނދަގޫވާނެ މެޗެއްކަމަށް މާޒިޔާ ސްޕޯޓްސް އެންޑް ރިކްރިއޭޝަންގެ ކޯޗު ސެކުލޮވްސްކީ ބުނެފިއެވެ.

މެޗުގެ ކުރިން އެފްއޭއެމް ހައުސްގައި ބޭއްވި ނޫސްވެރިންގެ ބައްދަލުވުމުގައި ވާހަކަދައްކަމުން ސެކުލޮވްސްކީ ބުނީ އޭނާ ދެކޭގޮތުގައި ވިކްޓްރީ އަކީ ލީގުގައި ވާދަކުރާ އެންމެ ވަރުގަދަ ކްލަބް ކަމަށެވެ.

އެގޮތުން އޭނާ ބުނީ ވިކްޓްރީ ޕޮއިންޓް ތާވަލުގައި އޮތް މަގާމަކީ އެޓީމުގެ ފެންވަރަށް ބަލާއިރު، އަސްލެއް ނޫން ކަމަށާއި، އެޓީމުގައި ރަނގަޅު ކުޅުންތެރިންނާއި ރާއްޖޭގައި ހުރި އެންމެ ރަނގަޅު އެއް ކޯޗު އެބަހުރި ކަމަށެވެ.

ސެކުލޮވްސްކީ ބުނީ މާލޭ ލީގުގައި މި ސީޒަނުގައި ކުޅުނު އެއްވެސް މެޗަކީ ފަސޭހަ މެޗެއް ނޫން ކަމަށެވެ. އެހެންނަމަވެސް އޭނާ ބުނީ ދެޓީމަށްވެސް މި މެޗު އުނދަގޫވާނެ ކަމަށާއި، ހުރިހާ ޓީމެއްގެ ޓާގެޓަކީ މާލޭ ލީގުގެ ގަދަ ހަތަރެއްގައި ހިމެނި ދިވެހި ޕްރިމިއާ ލީގަށް ކޮލިފައިވުން ކަމަށެވެ.

މެޗުގައި ކުޅުންތެރިން އެންމެ ފަހުވަގުތާ ޖެހެންދެންވެސް މަސައްކަތްކުރަންޖެހޭ ކަން ފާހަގަކުރަމުން ސެކުލޮވްސްކީ ބުނީ ކުޅުންތެރިން ރަނގަޅު ކުޅުމެއް މެޗުގައި ދައްކައިފިނަމަ އަބަދުވެސް އުފާކުރާ ކަމަށެވެ. އެގޮތުން މާޒިޔާ ޓީމުގެ ޓީމްވޯކް ރަނގަޅުކަން ސެކުލޮވްސްކީ ވަނީ ފާހަގަކޮށްފައެވެ.

ކުޅުންތެރިން ރަނގަޅުކުރަންޖެހޭ ބައިވަރުކަންތައްތައް ހުރިކަން ފާހަގަކުރަމުން ސެކުލޮވްސްކީ ބުނީ ޓީމު ރިކަވާންވެސް ލިބެނީ މަދު ދުވަސްކޮޅެއް ކަމަށާއި، ބައެއް ފަހަރު ހަފްތާއަކު ދެ މެޗު ކުޅެންޖޭ ކަމަށެވެ. އެގޮތުން އޭގެ ތެރެއިން އެއް މެޗަކީ އޭއެފްސީ ކަޕްގެ މެޗަށްވުމުން ދަތިތަކާ ގިނަ ފަހަރު ކުރިމަތިލާންޖެހޭ ކަމަށްވެސް އޭނާ ވަނީ ބުނެފައެވެ.

މާޒިޔާ ވަނީ މާލޭ ލީގުގައި ކުޅުނު ތިން މެޗުވެސް ކާމިޔާބުކޮށްފައެވެ. އެޓީމު އޮތީ ނުވަ ޕޮއިންޓާއެކު ޕޮއިންޓް ތާވަލުގެ ތިންވަނައިގައެވެ.