ފަލަސްޠީނުގެ މައްސަލަ އަށް ޙައްލެއް ހޯދުމުގައި ދެ ދައުލަތުގެ ހައްލަކީ އެކަށީގެންވާ ގޮތެއް ނޫން ކަމަށް، އިރާނުގެ ފޮރިން މިނިސްޓަރު އައްބާސް އަރާގްޗީ ވިދާޅުވެއްޖެ އެވެ. 

ޖިއްދާ ގައި ބޭއްވުނު އޯގަނައިޒޭޝަން އޮފް އިސްލާމިކް ކޯޕަރޭޝަން (އޯއައިސީ)ގެ ކުއްލި ބައްދަލުވުމުގައި ވާހަކަފުޅު ދައްކަވަމުން، އަރާގްޗީ ވަނީ ފަލަސްތީނުގެ މައްސަލައިގައި އިރާނުގެ ސާބިތު ސިޔާސަތު ދަމެހެއްޓޭނެކަން އަލިއަޅުއްވައި ވާހަކަ ދައްކަވައިފަ އެވެ.

 "އިސްލާމިކް ރިޕަބްލިކް އޮފް އިރާނުގެ ސަރުކާރާއި ރައްޔިތުން ފަލަސްތީނުގެ މައްސަލައަށް ދެމުންގެންދާ ބަދަލުނުވާ އެއްބާރުލުމަކީ ޝައްކެއްވެސް އޮތް ކަމެއް ނޫން. އަދި އެއްވެސް ޙާލަތެއްގައި މިކަމަށް ބަދަލެއް ނާންނާނެ" އަރާގްޗީ ވިދާޅުވި އެވެ. 

ހައްދުފަހަނަ އެޅި އިސްރާއީލްގެ އަނިޔާވެރި އަސްކަރިއްޔާ އިން ޣައްޒާ ގައި ކުރިއަށް ގެންދާ ނަސްލު ނައްތާލުމުގެ ހަނގުރާމައިގެ ސަބަބުން 48,446 އަށް ވުރެ ގިނަ މީހުން ޝަހީދުވެފައި ވާކަން އަރާގްޗީ ވަނީ ފާހަގަ ކުރައްވައިފަ އެވެ. އދި އޭގެ ތެރެއިން ގިނަ އަދަދަކީ އަންހެނުންނާއި، ކުޑަކުދިން ކަމަށް ވެސް އެމަނިކުފާނު ވިދާޅުވި އެވެ.

މީގެ އިތުރުން އެމެރިކާއިން އިސްރާއީލަށް ދެމުންގެންދާ ހަނގުރާމަވެރި އެހީތެރިކަމާއި، މާލީ އެހީތެރިކަން އަދި ޑިޕްލޮމެޓިކް އެހީތެރިކަން އަރާގްޗީ ވަނީ ކުށްވެރި ކުރައްވައިފަ އެވެ.

މުޅި ފަލަސްޠީނުގެ އަސްލު ރައްޔިތުން ތަމްސީލުކުރާ އެއް ޑިމޮކްރެޓިކް ދައުލަތެއް ޤާއިމު ކުރުމަކީ އެންމެ އެކަށީގެންވާ ހައްލުކަމަށް އިރާނުން ދެކޭ ކަމަށް އަރާގްޗީ ވިދާޅުވި އެވެ. 

ހަމަ އެހެންމެ، ބައެއް އިސްލާމީ ޤައުމު ތަކުން ދެ ދައުލަތުގެ ޙައްލަށް ތާއީދު ކުރި ނަމަވެސް، އެއީ ފަލަސްޠީނު ރައްޔިތުންގެ ޙައްގުތައް ހޯދައި ދިނުމަށް އެކަށީގެންވާ ގޮތެއް ނޫން ކަމަށް އެމަނިކުފާނު ވިދާޅުވެފައިވެ އެވެ.

 އިސްރާއީލުން ހިންގަމުންދާ އިންސާނިއްޔަތާ ދެކޮޅު ކުށްތަކާއި، ހަނގުރާމައިގެ ކުށްތަކަށް ޖަވާބުދާރީވާން ޖެހޭނެ ކަމަށް އިރާނުން ވަނީ ގޮވާލައިފަ އެވެ. އަދި ބައިނަލްއަޤުވާމީ ޤާނޫނުތަކާ ޚިލާފަށް ކުރަމުންދާ އަމަލުތަކަށް އިސްރާއީލަށް އަދާ ހަމައަށް އެއްވެސް ފިޔަވަޅެއް އެޅިފައި ނުވާކަން ވެސް އަރާގްޗީ ފާހަގަކުރެއްވި އެވެ.