އިސްރާއީލު ސިފައިން ބަޑިޖަހައި ފަލަސްޠީނުގެ ކުޑަކުއްޖަކު މަރާލައިފި
ބަޑި ޖަހާފައިވަނީ ޔޫސުފްގެ މެޔަށް
އުމުރުން 14 އަހަރުގެ ޔޫސުފް އަލް ދަޔާގެ ޖަނާޒާ
ހުކުރު ދުވަހު ހުކުރު ނަމާދަށްފަހު އިސްރާއީލާއި ގައްޒާ ގުޅޭ ބޯޑަރު ކައިރީގައި މުޒާހަރާކުރި ފަލަސްޠީނުގެ ކުޑަކުއްޖެއްގެ ގަޔަށް އިސްރާއީލު ސިފައިން ބަޑިޖަހައި އެކުއްޖާ މަރާލައިފިއެވެ.
ގައްޒާގެ ހެލްތު މިނިސްތްރީން ބުނީ އުމުރުން 14 އަހަރުގެ ޔޫސުފް އަލް ދަޔާ މަރާލާފައިވަނީ ގައްޒާގެ އިރުމަތީގައި އިސްރާއީލު ސިފައިން އޭނާގެ މެޔަށް ބަޑި ޖަހައި ކަމަށެވެ.
ހުކުރު ދުވަހު ގުދުސްގައި ހަމަނުޖެހުންތައް ހިނގާނެ ކަމަށްބަލައި، ހުކުރު ނަމާދު ކުރިއަށްދިޔަ ވަގުތުގައި ގިނަ އަދަދެއްގެ އިސްރާއީލު ސިފައިން ވަނީ މަސްޖިދުލް އަޤްޞާގައި ފޯރިމަރާފައެވެ. އަދި ހަމަނުޖެހުން ހިންގާނެ ކަމަށް ތުހުމަތުކޮށް އިސްރައީލު ސިފައިން ވަނީ ހުކުރު ނަމާދުގެ ކުރިން 60 މީހަކު ހައްޔަރުކޮށްފައެވެ.
ވޭތުވެދިޔަ މަސްތަކުގައި އިސްރާއީލު ސިފައިން ދިން ހަމަލާތަކުގައި ފަލަސްޠީނުގެ ބައެއް ރައްޔިތުން މަރުވެ، ގިނަ ބަޔަކު ވަނީ ޒަޚަމްވެފައެވެ.
