ޔުއެފާ ޗެމްޕިއަންސް ލީގުގެ ގަދަ 16 ވަނަ ބުރުގެ ފުރަތަމަ ލެގުގައި އެތުލެޓިކޯ މެޑްރިޑާ ދެކޮޅަށް ކުޅުނު މެޗުން، އެންމެ ފަހުގެ ޗެމްޕިއަން ރެއާލް މެޑްރިޑު މޮޅުވެއްޖެ އެވެ.

ރެއާލްގެ އަމިއްލަ ދަނޑުގައި އަންގާރަ ދުވަހުގެ ރޭ ކުޅުނު މެޗު އެ ޓީމުން ކާމިޔާބު ކުރީ 2-1 އިންނެވެ. މެޗުގައި ރެއާލް އިން ލަނޑު ޖަހައި ކުރި ހޯދާފައި ވަނިކޮށް، އެތުލެޓިކޯ އިން ނަތީޖާ ހަމަހަމަ ވެސް ކުރި އެވެ. ނަމަވެސް ދެ ވަނަ ހާފުގައި ދެ ވަނަ ލަނޑެއް ޖަހައިގެން ރެއާލް ވަނީ މެޗުން މޮޅުވެފަ އެވެ.

މެޗު ފަށައިގެން ހަތަރު ވަނަ މިނެޓުގައި ރެއާލް އިން ލަނޑު ޖަހައި ލީޑު ނެގި އެވެ. ފެޑެރިކޯ ވަލްވާޑޭ ތަނަވަސްކޮށްދިން ފުރުސަތެއްގައި، ރެއާލަށް ލީޑު ނަގައިދިނީ ބްރެޒިލްގެ ރޮޑްރީގޯ އެވެ.

މެޗުގެ ފުރަތަމަ ހާފު ނިމުމުގެ ކުރިން އެތުލެޓިކޯ އިން ވަނީ ލަނޑު ޖަހައި ނަތީޖާ ހަމަހަމަ ކޮށްފަ އެވެ. ފުރަތަމަ ހާފުގެ 32 ވަނަ މިނެޓުގައި އެ ޓީމަށް ނަތީޖާ ހަމަހަމަ ކޮށްދިނީ އާޖެންޓީނާގެ ޒުވާން ކުޅުންތެރިޔާ ހޫލިއަން އަލްވަރޭޒް އެވެ.

ދެ ވަނަ ހާފުގެ ކުޅުން ފަށައިގެން ދިހަ ވަނަ މިނެޓުގައި ރެއާލުން ވަނީ ދެ ވަނަ ލަނޑެއް ޖަަހައި، މެޗުގެ ލީޑު ނަގައިފަ އެވެ. އެ ލަނޑު ރެއާލަށް ޖަހައިދިނީ ބްރަހިމް ޑިއާޒް އެވެ. އޭނާ އެ ލަނޑު ޖަހަން ފުރުސަތު ތަނަވަސްކޮށްދިނީ ފާލަންޑް މެންޑީ އެވެ.

ގަދަ 16 ވަނަ ބުރުގެ ފުރަތަމަ ލެގު ރެއާލް އިން ކާމިޔާބު ކޮށްފައިވާއިރު، ދެ ވަނަ ލެގު އޮންނާނީ އެތުލެޓިކޯގެ އަމިއްލަ ދަނޑުގަ އެވެ. މާޗު މަހުގެ 13 ވަނަ ދުވަހު ކުޅޭ އެ މެޗުން ބަލި ނުވެ ފަރުޖައްސާލައިގެން، ރެއާލަށް މުބާރާތުގެ ކުއާޓާ ފައިނަލްގެ ޖާގަ ހޯދޭނެ އެވެ.