ގެވެށި އަނިޔާ ހުއްޓުވުމުގެ ޤާނޫނަށް އިސްލާހު ގެނައުމުގެ މަސައްކަތުގެ ވެލިޑޭޝަން މަރުހަލާ ނިންމާލައިފި
ފެމިލީ ޕްރޮޓެކްޝަން އޮތޯރިޓީ މިނިވަން މުއައްސަސާ އެއްގެ ގޮތުގައި ބަދަލުވުން
ގެވެށި އަނިޔާ ހުއްޓުވުމުގެ ޤާނޫނަށް އިސްލާހު ގެނައުމުގެ މަސައްކަތުގެ ވެލިޑޭޝަން މަރުހަލާ ނިންމާލުމުގެ ތެރެއިން 03-03-2025
2012 ވަނަ އަހަރު ޤާނޫނު ނަންބަރު 3/2012 ގެވެށި އަނިޔާ ހުއްޓުވުމުގެ ޤާނޫނަށް އިސްލާހު ގެނައުމުގެ މަސައްކަތުގެ ވެލިޑޭޝަން މަރުހަލާ ނިންމާލައިފިއެވެ.
ގެވެށި އަނިޔާ ހުއްޓުވުމުގެ ޤާނޫނު ތަސްދީގުވެ ޤާނޫނަށް އަމަލުކުރަން ފެށިފަހުން މިހާރު 12 އަހަރަށްވުރެ ގިނަ ދުވަސް ފާއިތުވެފައިވާއިރު، މިފާއިތުވެދިޔަ އަހަރުތަކުގައި، ދިވެހިރާއްޖޭގައި ހިނގަމުންދާ ގެވެށި އަނިޔާގެ މައްސަލަތައް ދިރާސާ ކުރުމުގެ ތެރެއިން ޤާނޫނުގައި ހިމެނިފައިނުވާ އައު ބާވަތް ބާވަތުގެ މައްސަލަތައް މިހާރު ރިޕޯޓުކުރެވެމުންދާކަން ފާހަގަކުރެވިފައިވާ ކަމަށް ފެމިލީ ޕްރޮޓެކްޝަން އޮތޯރިޓީން ވަނީ ބުނެފައެވެ.
އެހެންނަމަވެސް، މިހާރު ގާނޫނު ފަރުމާ ކުރެވިފައި އޮތްގޮތުން، އަލަށް ފާހަގަކުރެވިފައިވާ މައްސަލަތަކާއި ޓްރެންޑްސްތަކާއި ގުޅިގެން ހިދުމަތް ފޯރުކޮށްދިނުމުގައި މުއައްސަސާތަކަށް ގޮންޖެހުންތަކާއި ކުރިމަތިވަމުންދާކަންވެސް ފާހަގަކުރެވިފާއިރު، މިއީ އަނިޔާ ލިބޭ ފަރާތްތަކަށް ބޭނުންވާ ރައްކާތެރިކަން އެންމެ އެކަށިގެންވާ ގޮތުގައި ފޯރުކޮށްދިނުމަށް ހުރި ހުރަހެއް ކަމަށް އެފްޕީއޭއިން ބުންޏެއެވެ.
ގެވެށި އަނިޔާގެ މައްސަލަތަކުގައި މަސައްކަތްކުރާ މުއައްސަސާތަކުގެ ދައުރު ޤާނޫނުގައި ކަނޑައެޅިފައިވީނަމަވެސް، މުއައްސަސާތަކުގެ މަސްއޫލިއްޔަތުތަކާއި ޒިންމާތަކުގެ ފުށުއެރުންތަކެއް ހުރުމާއެކު މުއައްސަސާތަކުން ގުޅިގެން މަސައްކަތްކުރުމަށް ދަތިތައް ހުރުމުން، ގެވެށި އަނިޔާގެ މައްސަލަތަކުގައި މަސައްކަތްކުރާ ނިޒާމު ޤާނޫނުގެ ތެރެއިން ހަރުދަނާކުރުމުގެ ބޭނުމުގައި ގެވެށި އަނިޔާ ހުއްޓުވުމުގެ ޤާނޫނު އިސްލާހުކުރުމުގެ މަސައްކަތްތައް މިނިސްޓްރީ އޮފް ސޯޝަލް އެންޑް ފެމިލީ ޑިވެލޮޕްމަންޓްއާއި ފެމިލީ ޕްރޮޓެކްޝަން އޮތީރިޓީއިން ގުޅިގެން 2024 ވަނަ އަހަރުން ފެށިގެން ދަނީ ކުރިޔަށްގެންދަމުންދެއެވެ.
މިގޮތުން، ފާއިތުވެދިޔަ އަހަރު ތެރޭގައި ޤާނޫނު އިސްލާހުކުރުމުގެ މަސައްކަތުގެ ތެރެއިން ކަމާގުޅުންހުރި މުއައްސަސާތަކާއި، މިފަދަ މައްސަލަތަކުގައި މަސައްކަތްކުރާ މަދަނީ ޖަމިއްޔާތަކާއި މަޝްވަރާކޮށް އެފަރާތްތަކުގެ ޚިޔާލު ވަނީ ހޯދާފައެވެ. އަދި، އެފަރާތްތަކުގެ ޚިޔާލާއި މަޝްވަރާތަކުގެ މައްޗަށް ބިނާކޮށް އިސްލާހުކުރެވޭ ޤާނޫނުގެ ފުރަތަމަ ޑްރާފްޓް އެއް އެކުލަވާލާ 7 ނޮވެމްބަރ 2024 ވަނަ ދުވަހު ފުރަތަމަ ވެލިޑޭޝަން ހިންގުނެވެ.
މި ވެލިޑޭޝަންގައި ގެވެށި އަނިޔާ ހުއްޓުވުމުގައި މަސައްކަތްކުރާ މުއައްސަސާތަކުގެ އިތުރުން، މަދަނީ ޖަމިއްޔާތަކުންވެސް ބައިވެރިވެފައިވެއެވެ. އަދި، މި ވެލިޑޭޝަންގައި ޤާނޫނަށް ގެންނަން ފެންނަ ބަދަލުތައް ބައިވެރިންނާއި ވަނީ ހިއްސާކޮށްފައެވެ.
އެގޮތުން، ޤާނޫނަށް ގެންނަން ހުށަހަޅާ މައިގަނޑު ބަދަލުތަކުގެ ތެރޭގައި؛
- ގެވެށި ގުޅުންތަކާއި ގެވެށި އަނިޔާގެ އަމަލުތައް މުރާޖާކޮށް މާނަކުރުން
- ގާނޫނު ޖިނާއީ ގާނޫނަކަށް ބަދަލުވެ، ގާނޫނުގެ ދަށުން ޖިނާއީ ކުށްތަށް ކަނޑައެޅި ކުށްތަކަށް އެކަށީގެންވާ އަދަބު ކަނޑައެޅުން
- ގެވެށި އަނިޔާގެ މައްސަލަތަކުގައި ކުރީ ސަފުގައި މަސައްކަތްކުރާ މުއައްސަސާތަކުގެ ދައުރުތައް އިތުރަށް ތަފްސީލުކުރުން
- ގާނޫނުން ލިބެންހުރި މަދަނީ ފަރުވާތައް ހޯދުމުގައި އަމަލުކުރަންޖެހޭ އިޖުރާއަތުތައް ހަރުދަނާކުރުން
- ފެމިލީ ޕްރޮޓެކްޝަން އޮތޯރިޓީ މިނިވަން މުއައްސަސާ އެއްގެ ގޮތުގައި ބަދަލުވުން، ހިމެނެއެވެ.
ޤާނޫނު އިސްލާހުކުރުމުގެ މަސައްކަތުގެ ތެރެއިން ބޭއްވި ފުރަތަމަ ވެލިޑޭޝަން އަށްފަހު، ބައިވެރިންގެ ފަރާތުން ލިބިފައިވާ އިތުރު ހުށަހެޅުންތައް ވަޒަންކޮށް، ދެވަނަ ޑްރާފްޓެއް އެކުލަވާލުމަށްފަހު، 25 ފެބްރުއަރީ 2025 ގައި ވަނީ ފަހު ވެލިޑޭޝަން ބާއްވާފައެވެ.
މިވެލިޑޭޝަން އަށްފަހު، އިސްލާހުކުރެވޭ ޤާނޫނުގެ ފައިނަލް ޑްރާފްޓް ބަންޑާރަ ނައިބުގެ ލަފާ ހޯދުމުގެ ގޮތުން ބަންޑާރަ ނައިބުގެ އޮފީހަށް ފޮނުވުމުގެ މަސައްކަތްތައް މިހާރު ދަނީ ކުރަމުން ކަމަށް އެފްޕީއޭއިން ވަނީ ބުނެފައެވެ.
