ޕީއެސްޖީގައި ހޭދަ ކުރި ދެ އަހަރުގައި އުފަލެއް ނުލިބޭ: މެސީ

ފްރާންސްގެ ގަދަ ބާރު، ޕެރިސް ސެއިންޓް ޖާމަން (ޕީއެސްޖީ)ގައި ހޭދަ ކުރި ދެ އަހަރުގެ ތެރޭގައި އުފަލެއް ނުލިބޭ ކަމަށް، އާޖެންޓީނާގެ ކެޕްޓަން ލިއޮނަލް މެސީ ބުނެފި އެވެ.

ސްޕެއިންގެ ބާސެލޯނާ ދޫކޮށްލުމަށްފަހު މެސީ ޕީއެސްޖީ އަށް ބަދަލުވީ 2021 ވަނަ އަހަރު އެވެ. އޭނާ ޕީއެސްޖީ އަށް ބަދަލުވާން ޖެހުނީ، ބާސެލޯނާ އާއެކު ސޮއި ކޮށްފައި އޮތް އެއްބަސްވުން އައު ނުކުރެވުމުގެ ސަބަބުންނެެވެ. އޭރު ބާސެލޯނާ އަށް ކުރިމަތިވެފައި އޮތް މާލީ ޙާލަތުގެ ސަބަބުން، އެ ޓީމަށް މެސީގެ އެއްބަސްވުން އައު ކުރުމުގައި ކުރިއަށް ދެވޭ ގޮތެއް ނުވި އެވެ.

އެހެންވެ މެސީ ވަނީ، ދެ އަހަރު ދުވަހުގެ އެއްބަސްވުމެއްގެ ދަށުން ޕީއެސްޖީ އަށް ބަދަލުވެފަ އެވެ. ޕީއެސްޖީގައި ހޭދަ ކުރި ދެ ސީޒަންގައި މެސީ ވަނީ އެ ކުލަބަށް ކުޅެދިން 75 މެޗުގައި 32 ލަނޑު ޖަހައިފަ އެވެ. އަދި ޕީއެސްޖީ އާއެކު އޭނާ ވަނީ، ތިން ތައްޓެއް ވެސް ކާމިޔާބު ކޮށްފަ އެވެ.

ޕީއެސްޖީ އާއެކު ސޮއި ކޮށްފައި އޮތް އެއްބަސްވުން ހަމަވުމުން، މެސީ ވަނީ އެ ކުލަބު ދޫކޮށްލަން ނިންމައިފަ އެވެ. ޕީއެސްޖީ ދޫކޮށްލުމަށްފަހު 2023 ވަނަ އަހަރު އޭނާ ބަދަލުވީ އެމެރިކާގެ އިންޓަރ މިއާމީ އަށެވެ. މެސީ ޕީއެސްޖީ ދޫކޮށްލިއިރު، އެ ކުލަބުން ވަނީ އޭނާގެ އެއްބަސްވުން އައު ކުރުމަށް އެކި ފަހަރުގެ މަތިން މަސައްކަތް ކޮށްފަ އެވެ. ނަމަވެސް އެކަން ކާމިޔާބުވާ ގޮތެއް ނުވި އެވެ.

ޕީއެސްޖީގައި ހޭދަކުރި ދުވަސްތަކާ ގުޅޭ ގޮތުން ދާދި ފަހުން ވާހަކަ ދައްކަމުން މެސީ ބުނީ، އެއްބަސްވުން އައު ނުކުރެވި އޭނާ އަށް ބާސެލޯނާ ދޫކޮށްލަން ޖެހުނީ ކަމަށާއި، ދެން ބަދަލުވާން ޖެހުނީ ޕީއެސްޖީ އަށް ކަމަށެވެ. އަދި ޕީއެސްޖީ ގައި ހޭދަ ކުރި ދެ އަހަރަކީ އުފާވެރިކަމެއް ނެތް އަހަރުތަކެއް ކަމަށް މެސީ ބުންޏެވެ.

މެސީ ބުނީ ޕީއެސްޖީގެ ވައްޓަފާޅި އާއި އެ ކުލަބުގެ ސިސްޓަނަށް ފިޓުވާން އޭނާ އަށް ވަރަށް އުނދަގޫވި ކަމަށެވެ. އެގޮތުން ޕީއެސްޖީގައި ހޭދަ ކުރަމުން ދިޔަ ކޮންމެ ދުވަހަކާއި، މެޗުތަކާއި، ފަރިތަކުރުންތަކުގައި ވެސް އުނދަގޫތަކާ ކުރިމަތިލާން ޖެހުނު ކަމަށް މެސީ ވަނީ ބުނެފަ އެވެ.

މިހާރު ކުޅެމުން އަންނަ މިއާމީ އަކީ މެސީގެ ސީނިއާ ކެރިއަރުގައި އޭނާ ކުޅޭ ތިން ވަނަ ކުލަބެވެ. ޕީއެސްޖީ ދޫކޮށް މިއާމީ އަށް ބަދަލުވެ، މެސީ އަންނަނީ އެ ކުލަބުގައި ވެސް މޮޅު ކުޅުމެއް ދައްކަމުންނެވެ. އެގޮތުން މިހާތަނަށް މިއާމީ އަށް ކުޅެދިން 42 މެޗުގައި މެސީ ވަނީ 36 ލަނޑު ޖަހައިފަ އެވެ. މެސީގެ ކެޕްޓަންކަމުގެ ދަށުން މިއާމީން ވަނީ ދެ ތައްޓެއް ވެސް ކާމިޔާބު ކޮށްފަ އެވެ.