ޖަރުމަނު ލީގުގައި ސްޓަޓްގާޓާ ދެކޮޅަށް ކުޅުނު މެޗުން މޮޅުވެ، ބަޔާން މިއުނިކުން އެއް ވަަނައިގައި ލީޑު ފުޅާ ކޮށްފި އެެވެ.

ސްޓަޓްގާޓްގެ އަމިއްލަ ދަނޑުގައި ހުކުރު ދުވަހުގެ ރޭ އެ ޓީމާ ދެކޮޅަށް ކުޅުނު މެޗު ބަޔާން އިން ކާމިޔާބު ކުރީ 3-1 އިންނެވެ. މެޗުގައި ސްޓަޓްގާޓް އިން ލަނޑު ޖަހައި ކުރި ހޯދާފައި ވަނިކޮށް، ބަޔާނުން ވަނީ ފަހަތުން އަރައި ތިން ލަނޑު ޖަހައިގެން މެޗުން މޮޅުވެފަ އެވެ.

މެޗުގެ ފުރަތަމަ ހާފުގެ 34 ވަނަ މިނެޓުގައި ސްޓަޓްގާޓަށް ކުރި ހޯދައިދިނީ އަންގެލޯ ސްޓިލާ އެވެ. އެއީ ޔޯޝާ ވަގްނޮމެން ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ. ނަމަވެސް މެޗުގެ ފުރަތަމަ ހާފު ނިމުމުގެ ކުރިން ބަޔާނުން ވަނީ ލަނޑު ޖަަހައި ނަތީޖާ ހަމަހަމަ ކޮށްފަ އެވެ. ފުރަތަމަ ހާފުގެ ފަހު ވަގުތުގައި ބަޔާނަށް ނަތީޖާ ހަމަހަމަ ކޮށްދިނީ މައިކަލް އޮލައިސޭ އެވެ. އެއީ ލެރޯއީ ސާނޭ ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ.

މެޗުގެ ދެ ވަނަ ހާފުގައި ބަޔާނުން ވަނީ އިތުރު ދެ ލަނޑު ޖަހައިގެން މެޗުން މޮޅުވެފަ އެވެ. މެޗުގެ 64 ވަނަ މިނެޓުގައި ބަޔާނަށް ލީޑު ނަގައިދިނީ ލިއޯން ގޮރެޓްޒްކާ އެވެ. އޭގެ ފަހުން މެޗުގެ ފަހު ވަގުތުގައި ބަޔާންގެ ތިން ވަނަ ލަނޑު ޖަހައި އިތުރަށް ލީޑު ފުޅާ ކޮށްދިނީ ކިންގްސްލީ ކޯމަން އެވެ.

މޮޅާއެކު ބަޔާނުން ވަނީ އެއް ވަނައިގައި ލީޑު 11 ޕޮއިންޓުގެ ލީޑެއް ނަގައިފަ އެވެ. މިހާތަނަށް ލީގުގައި ކުޅެފައިވާ 24 މެޗުން ބަޔާނަށް ލިބެނީ 61 ޕޮއިންޓެވެ. ބަޔާނަށް ވުރެ އެއް މެޗު މަދުން ކުޅެގެން ދެ ވަނައިގައި އޮތް އެންމެ ފަހުގެ ޗެމްޕިއަން ބަޔާ ލެވަކޫސަނަށް ލިބެނީ 50 ޕޮއިންޓެވެ.