އޭއެފްސީ ޗެލެންޖު ލީގުގައި ރާއްޖޭގެ މާޒިޔާ ސްޕޯޓްސް އެންޑް ރެކްރިއޭޝަން އިން ކުޅުނު ތިން ވަނަ މެޗުގައި ކިރްގިސްތާންގެ އަބްޑީޝް އަތުން ވެސް ބަލިވެއްޖެ އެވެ.

ލީގުގައި މާޒިޔާގެ ފުރަތަމަ މެޗުގައި އެ ޓީމު ނިކުތީ ތުރުކެމިނިސްތާންގެ އަރްކަޑަގްއާ ދެކޮޅަށެވެ. އެ މެޗުން މާޒިޔާ ބަލިވެފައި ވަނީ 2-1 ގެ ނަތީޖާ އަކުންނެވެ. އެއީ މެޗުގައި މާޒިޔާ އިނ ފުރަތަމަ ލަނޑު ޖަހައި ކުރި ވެސް ހޯދާފައި ވަނިކޮށް، އަރްކަޑަގް އިން ފަހަތުން އަރައި ދެ ލަނޑު ޖަަހައިގެންނެވެ. ދެ ވަނަ މެޗުގައި އަލް އަރަބީ އަތުން މާޒިޔާ ބަލިވެފައި ވަނީ 2-0 އިންނެވެ.

ފަހު މެޗުގައި ހުކުރު ދުވަހުގެ ރޭ މާޒިޔާ ނިކުތީ އަބްޑީޝްއާ ދެކޮޅަށެވެ. އެ މެޗާ ކުރިމަތިލީއިރު ވެސް މާޒިޔާ އަށް ވަނީ މުބާރާތް ނިމިފަ އެވެ. އެ މެޗުގައި އަބްޑީޝް އިން މާޒިޔާގެ މައްޗަށް ކުރި ހޯދީ 3-0 އިންނެވެ. މެޗު ފަށައިގެން ނުވަ ވަނަ މިނެޓުގައި އަބްޑީޝް އިން ވަނީ މާޒިޔާ ކޮޅަށް ލަނޑު ޖަަހައި ލީޑު ނަގައިފަ އެވެ. އެ ލަނޑު އެ ޓީމަށް ޖަހައިދިނީ ކީރާތު ޒީރަލްބެކް އެވެ. މެޗުގައި އަބްޑީޝްގެ ފަހު ދެ ލަނޑު އެ ޓީމުން ޖެހީ ފަހު ހާފުގަ އެވެ.

އެގޮތުން އެ ޓީމުގެ ދެ ވަނަ ލަނޑު، މެޗުގެ 63 ވަނަ މިނެޓުގައި ޖެހީ އަޓާއީ ޒުމަޝެވް އެވެ. އަދި މެޗުގައި އަބްޑީޝްގެ ތިން ވަނަ ލަނޑު، 80 ވަނަ މިނެޓުގައި ޖެހީ އެމައުލް ޔަގާ އެވެ. މި ދެ ކުޅުންތެރިން ވެސް މެޗުގައި ކުޅެން ނިކުމެފައި ވަނީ ބަދަލު ކުޅުންތެރިންގެ ގޮތުގަ އެވެ.

ބައްޔާއެކު މާޒިޔާ ދިޔައީ މި ގުރޫޕުގެ އެންމެ ފުލަށެވެ. މި ގުރޫޕުން ކުއާޓާ ފައިނަލްގެ ފުރުސަތު ހޯދީ އަރްކަޑަގް އަދި އަލް އަރަބީ އެވެ. މާޒިޔާ އަތުން ހޯދި މޮޅާ އެކު ވެސް، އަބްޑީޝް އަށް މުބާރާތުގައި ކުރިއަށް ދެވޭ ގޮތެެއް ނުވި އެވެ.