ދެ ވަނަ ލެގުން ވެސް މޮޅުވެ މިއާމީ އަނެއް ބުރަށް

ކޮންކާކަފް ޗެމްޕިއަންސް ކަޕްގެ ފުރަތަމަ ބުރުގެ ދެ ވަނަ ލެގުގައި ވެސް ސްޕޯޓިން ކޭސީއާ ދެކޮޅަށް ކުޅުނު މެޗުން މޮޅުވެ، އިންޓަރ މިއާމީން މުބާރާތުގެ ގަދަ 16 ވަނަ ބުރުން ޖާގަ ހޯދައިފި އެވެ.

ބުދަ ދުވަހުގެ ފަތިހު ކުޅުނު ފުރަތަމަ ބުރުގެ ދެ ވަނަ ލެގުގެ މެޗު މިއާމީން ކާމިޔާބު ކުރީ 3-1 އިންނެވެ. އޭގެ ކުރިން ކުޅުނު ފުރަތަމަ ބުރުގެ ފުރަތަމަ ލެގު މިއާމީން ކާމިޔާބު ކުރީ 1-0 އިންނެވެ.

މެޗުގެ ފުރަތަމަ ހާފުގައި ވެސް މިއާމީން ވަނީ ތިން ލަނޑު ޖަހައިގެން ލީޑު ނަގައިފަ އެވެ. މެޗުގައި ސްޕޯޓިން އިން އެ ޓީމުގެ ލަނޑު ޖެހީ މެޗުގެ ދެ ވަނަ ހާފުގަ އެވެ.

މެޗު ފަށައިގެން 19 ވަނަ މިނެޓުގައި މިއާމީ އަށް ލަނޑު ޖަހައި ލީޑު ނަގައިދިނީ އެ ޓީމުގެ ކެޕްޓަން ލިއޮނަލް މެސީ އެވެ. އޭގެ ފަހުން ފުރަތަމަ ހާފުގެ އިތުރު ވަގުތުގައި މިއާމީގެ ދެ ވަނަ ލަނޑު ޖެހީ ޓަޑެއޯ އަލެންޑޭ އެވެ. އޭގެ އިރުކޮޅެއް ފަހުން މިއާމީގެ ތިން ވަނަ ލަނޑު ޖެހީ ލުއިސް ސުއަރޭޒް އެވެ. މެޗުގައި ސްޕޯޓިންގެ ހަމައެކަނި ލަނޑު، 63 ވަނަ މިނެޓުގައި ޖެހީ މެމޯ ރޮޑްރިގޭޒް އެވެ.

މުބާރާތުގެ ގަދަ 16 ވަނަ ބުރުގައި ދެ ލެގު ކުޅުމަށް ހަމަޖެހިފައިވެ އެވެ. ގަދަ 16 ވަނަ ބުރުގައި މިއާމީ ނިކުންނާނީ ކަވަލެއާއާ ދެކޮޅަށެވެ. ގަދަ 16 ވަނަ ބުރުގެ ފުރަތަމަ ލެގު އޮންނާނީ މާޗު މަހުގެ ހަ ވަނަ ދުވަހު އެވެ. އަދި ދެ ވަނަ ލެގު އޮންނާނީ މާޗު މަހުގެ 14 ވަނަ ދުވަހު އެވެ.