ސުޕްރީމް ކޯޓުގެ ފަނޑިޔާރުންގެ އަދަދު މަދުކުރަން ހުށަހެޅި ބިލު ބަލައިގަންނަން ވޯޓުދޭން ޕީއެންސީން ގްރީން ވިޕެއް ނެރެފި
25 ފެބުރުއަރީ 2025 | އަންގާރަ 08:26ބިލުގައިވާ ގޮތުން ފަނޑިޔާރަކު ގާބިލު ނޫން ކަމަށް ޖޭއެސްސީ އަށް ގަބޫލު ކުރެވިއްޖެ ނަމަ އެ ފަނޑިޔާރަކު މަގާމުން ވަކި ކުރުމަށް ރައްޔިތުންގެ މަޖިލީހަށް ހުށަހެޅިދާނެ
ސުޕްރީމް ކޯޓުގެ ފަނޑިޔާރުންގެ އަދަދު މަދުކުރާގޮތަށް ހުށަހެޅި ބިލު ފާސްކުރަން ވޯޓު ދިނުމަށް ޕީއެންސީގެ މެންބަރުންނަށް ވަނީ އަންގާފައި
ސުޕްރީމް ކޯޓުގެ ފަނޑިޔާރުންގެ އަދަދު މަދުކުރަން ސަރުކާރުން ހުށަހެޅި ބިލަށް ތާއިދުކޮށް ވޯޓުދޭން ޕީއެންސީން ޕާލަމެންޓްރީ ގްރޫޕުން ގްރީން ވިޕެއް ނެރެފިއެވެ.
ދުސްތޫރީ މައްސަލަ އެއް ހިނގަމުން ދަނިކޮށް ސުޕްރީމް ކޯޓުގެ ފަނޑިޔާރުންގެ އަދަދު ދަށްކޮށް ދެ ފަނޑިޔާރަކު ބެންޗުން ވަކި ކުރުމަށް މަގު ފަހިވާ ގޮތައް ހޯމަ ދުވަހު އެޖެންޑާގައި ހިމެނި ބިލުގެ ބަހުސް އަންގާރަ ދުވަހު ބޭއްވުމަށްފަހު، ވޯޓަށް އެހުމުގެ ކުރިން ޕީއެންސީގެ ޕާލަމެންޓްރީ ގްރޫޕުން ވަނީ އެ ބިލާ އެއްކޮޅަށް ވޯޓު ދިނުމަށް ގްރީން ވިޕްލައިނެއް ނެރެފައެވެ. ވޯޓުލުން އޮންނާނީ 1:30 ގައެވެ.
ރައްޔިތުންގެ މަޖިލީހަށް ވެރިކަން ކުރާ ޕީއެންސީ އަށް ނިސްބަތްވާ ހޮޅުދޫ ދާއިރާގެ މެމްބަރު އަބްދުއްސައްތާރު މުހައްމަދު އަމިއްލަ ގޮތުން ހުށަހެޅުއްވި ބިލުގެ ބޭނުމެއް ކަމަށް ބުނެފައިވަނީ، ގާނޫނު ނަންބަރު 2010/22 (ދިވެހި ރާއްޖޭގެ ކޯޓުތަކުގެ ގާނޫނު) ގައި ސުޕުރީމް ކޯޓުގެ ފަނޑިޔާރުންގެ އަދަދު، ކުރީގެ ޚާއްސަ މަޖިލީހުގައި ކުރެވުނު ބަހުސްތަކުގައި ވެސް ބަޔާން ކުރެވިފައިވާ ފަދައިން، ގާނޫނު އަސާސީ އަކީ ވަރަށް ފޮނި އުއްމީދަކާއެކު ދިވެހިން ލިބިގެން ގާނޫނު އަސާސީ އަކަށް ވާއިރު، ގާނޫނު އަސާސީ އިން ދިވެހިން ކުރާ އެންމެ ފޮނި އުއްމީދަކީ ރައްޔިތުންގެ އާންމު ހާލަތު ރަނގަޅު ވެގެން އައުން ކަމުގައި ދެކޭތީ އެ ބަދަލު އެންމެ އެކަށޭނަ ގޮތަކަށް ރައްޔިތުންނަށް ލިބިގެންދާނީ ދިވެހިރާއްޖޭގެ ސުޕުރީމް ކޯޓު އެކުލެވިގެންވާ ގޮތް ކުރިއެކޭ ވެސް އެއްގޮތަށް ބަދަލު ކޮށްގެން ކަމަށް ދެކޭތީ ކަމަށެވެ.
މަޖިލިހަށް ހުށަހެޅި ދިވެހި ރާއްޖޭގެ ކޯޓުތަކުގެ ގާނޫނަށް 8 ވަނަ އިސްލާހު ގެނައުމުގެ ބިލުގައި ގައި ބުނެފައިވަނީ، ދިވެހިރާއްޖޭގެ ސުޕްރީމު ކޯޓު އެކުލެވިގެން ވަނީ އުއްތަމަ ފަނޑިޔާރާ އެކު އެކޯޓަށް އައްޔަނު ކުރެވިފައިވާ، ޖުމްލަ 5 ފަނޑިޔާރުންގެ މައްޗަށް ކަމަށެވެ.
ބިލުގައި ވަނީ ސުޕްރީމް ކޯޓުގެ ފަނޑިޔާރު ކަމުގެ މަގާމަށް އައްޔަން ކޮށްފައިވާ ފަނޑިޔާރަކު ގާބިލު ނޫންކަމަށް ޖޫޑިޝަލް ސާވިސް ކޮމިޝަން (ޖޭއެސްސީ) އަށް ގަބޫލު ކުރެވިއްޖެ ނަމަ އެ ފަނޑިޔާރަކު މަގާމުން ވަކި ކުރުމަށް ރައްޔިތުންގެ މަޖިލީހަށް ހުށަހެޅިދާނެ ކަމަށެވެ. އަދި އެގޮތައް ހުށަހެޅުމުން މަޖިލީހުގެ ޖަލްސާ އަށް ހާޒިރުވެ ވޯޓުގައި ބައިވެރިވި މެމްބަރުންގެ ތިންބައިކުޅަ ދެބައިގެ އަޣުލަބިއްޔަތުން ފާސްވުމުން އޭނާގެ މަގާމުން ވަކި ކުރެވޭނެ ކަމަށެވެ.
ކުރިން ހުންނެވި ރައީސުލް ޖުމްހޫރިއްޔާ އައްޔަން ކުރައްވާ މެމްބަރު ވަކި ކުރުމަށްފަހު، ރައީސް މުޙައްމަދު މުޢިއްޒު، އައްޔަން ކުރައްވާ މެމްބަރެއްގެ ގޮތުގައި ގއ.ވިލިނގިލި، ވައިޖެހޭގެ އަލްފާޟިލް ޔަޒްމީދު މުޙައްމަދު، އާދިައްތަ ދުވަހު އައްޔަން ކުރައްވާ ފަތްކޮޅު ދެއްވާފައިވާއިރު، ސުޕްރީމް ކޯޓުގެ ފަނޑިޔާރު ކަމުގެ މަގާމުން ވަކި ކުރުމަށް ޖޭއެސްސީ އިން ރައްޔިތުންގެ މަޖިލީހަށް ހުށަހަޅާ ފަނޑިޔާރުންގެ ނަންތައް މި ގާނޫނަށް އަމަލު ކުރަން ފަށާތާ ގިނަ ވެގެން 5 ދުވަހުގެ ތެރޭގައި ޖޭއެސްސީ އިން ރައްޔިތުންގެ މަޖިލީހަށް ހުށަހަޅަންވާނެ ކަމަށް ވެސް ވަނީ ބުނެފައެވެ.
އަދި ރައްޔިތުންގެ މަޖިލީހަށް އެ ފަނޑިޔާރުންގެ ނަންތައް ހުށަހަޅާތާ މަދުވެގެން 7 ދުވަހުގެ ތެރޭގައި ރައްޔިތުންގެ މަޖިލީހުން އެ ފަނޑިޔާރުން މަގާމުން ވަކިކުރުމާ މެދު ގޮތެއް ނިންމަންވާނެ ކަމަށް ވެސް ވަނީ ބުނެފައެވެ.
ސަރުކާރުން ސުޕްރީމުގެ ކޯޓުގެ ބެންޗަށް ބަދަލު ގެންނަން ކުއްލި އަކަށް ހުށެހެޅި މި ބިލަކީ އެ ކޯޓުގައި މިހާރު ކުރިއަށްދާ ދުސްތޫރީ މައްސަލަ އަށް ސީދާ ނުފޫޒު ފޯރުވުމަށް ހިންގާ ކަމެއް ކަމުގައެވެ.
ގާނޫނޫ އަސާސީ އަށް މުއިއްޒުގެ ސަރުކާރުން ކުއްލި ގޮތަކަށް ކުރިން ގެނައި ބަދަލަކާއެކު މިހާރު ރައްޔިތުންގެ މަޖިލިހަށް އިންތިޚާބުވެފައިވާ މެމްބަރަކު އޭނާގެ ޕާޓީން ކަނޑާލި ނަމަވެސް އަދި އަދި އަމިއްލަ އަށް ވަކިވި ނަމަވެސް މެމްބަރު ކަމުގެ ގޮނޑިގެއްލޭނެ އެވެ.
އެހެން ކަމުން މި ބަދަލަކީ މުޅި ގާނޫނު އަސާސީ ބައްޓަންވެގެންވާ އޮނިގނަޑާ ޚިލާފު އަދި ބާތިލު ބަދަލެއް ކަމަށް ކަނޑައަޅަން ސުޕްރީމް ކޯޓަށް މައްސަލަ ވަނީ ހުށަހަޅާފައެވެ.
މައްސަލައިގެ އަޑުއެހުންތައް މިހާރު ފެށިފައިވާއިރު، މައްސަލަ ބަލާ ފަނޑިޔާރުންގެ ތެރެއިން ބަޔަކު މަގާމުން ވަކި ކުރަން އުޅުމަކީ މައްސަލައިގެ ތެރެއަށް ނުފޫޒު ފޯރުވުން ކަމަށް މައްސަލަ ސުޕްރީމް ކޯޓަށް ހުށަހެޅި ގާނޫނީ ވަކީލު އަލީ ހުސެއިން ވެސް ވަނީ ވިދާޅުވެފައެވެ.
