ރައީސް މުއިއްޒު، އަބްދުއްރަހީމްއާއި ބައްދަލުކުރެއްވީ ސަރުކާރުގެ ފަރާތުން ފޮނުއްވަންހުރި ބިލްތަކާމެދު މަޝްވަރާ ކުރަން - ސަރުކާރު
20 ފެބުރުއަރީ 2025 | ބުރާސްފަތި 14:17ރައީސުލްޖުމްހޫރިއްޔާއާއި މަޖިލީހުގެ ރައީސްއާއި ދެމެދު ބައްދަލުވުމެއް އޮތީ ސަރުކާރުން ފޮނުއްވަންހުރި ބިލްތަކާ މެދު މަޝްވަރާކުރުމަށް
މަޖްލިސް އަބްދުލްރަހީމް އަބްދުالله (ކ) ރައީސް ޑރ. މުހައްމަދު މުއިއްޒު (ވ) އާއެކު
މަޖިލީހުގެ ރައީސް އަބްދުއްރަހީމް އަބްދުﷲ އާއި ރައީސް ޑރ. މުހައްމަދު މުއިއްޒުއާއި ބައްދަލުކުރެއްވީ ސަރުކާރުގެ ފަރާތުން ފޮނުއްވަންހުރި ބިލްތަކާމެދު މަޝްވަރާ ކުރައްވަން ކަމަށް ސަރުކާރުން ބުނެފިއެވެ.
މަޖިލީހުގެ ރައީސް އަބްދުއްރަހީމް އާއި ރައީސް މުއިއްޒު ބައްދަލުކުރެއްވީ ބުރާސްފަތި ދުވަހުގެ ހެނދުނުއެވެ. ޢަބްދުއްރަހީމް ވަނީ ބުރާސްފަތި ދުވަހު ރައީސުލްޖުމްހޫރިއްޔާގެ އޮފީހަށް ވަޑައިގެންފަ އެވެ. އަދި ރައީސް އޮފީހުގެ ދޮރުން ޢަބްދުއްރަހީމްގެ ކާރުކޮޅު ވަންނަ މަންޒަރު ފެންނަ ފޮޓޯ ވަނީ ސޯޝަލް މީޑިއާގައި ވެސް ދައުރުވާން ފަށައިފައެވެ.
ރައީސް މުޢިއްޒުއާ ބައްދަލު ކުރައްވަން ޢަބްދުއްރަހީމް ވަޑައިގެންނެވިއިރު، ދެ ބޭފުޅުންގެ ގުޅުން ގޯސްވެފައިވާ ކަމަށް ޢަބްދުއްރަހީމް ވަނީ މީގެ ކުރިން ވިދާޅުވެފަ އެވެ. އެއީ ފަތުރުވެރިކަމާ ބެހޭ ވަޒީރުކަމުގައި ހުންނެވި ޢަބްދުއްރަހީމްގެ ދަރިކަލުން އިބްރާހީމް ފައިސަލް އެ މަގާމުން ވަކި ކުރެއްވި ދުވަހުއެވެ.
ދެބޭފުޅުންގެ ބައްދަލުވުމާއި ގުޅޭގޮތުން ސަރުކާރުގެ ފަރާތުން އިސްތަރުޖަމާނު ހީނާ ވަލީދު ވިދާޅުވީ ރައީސުލްޖުމްހޫރިއްޔާ ޑރ މުޙައްމަދު މުޢިއްޒު ބުރާސްފަތި ދުވަހު ވަނީ، ރައްޔިތުންގެ މަޖިލީހުގެ ރައީސް ޢަބްދުއްރަޙީމް ޢަބްދުﷲ އާއި، ޕީ.އެން.ސީގެ ޕީ.ޖީ ލީޑަރު އިބްރާހީމް ފަލާޙްއާ ބައްދަލު ކުރައްވާފައި ކަމަށެވެ.
މި ބައްދަލުކުރެއްވުމުގައި، ރައްޔިތުންގެ މަޖިލީހަށް މި އަހަރުގެ މި ފެށުނު ދައުރުގައި ސަރުކާރުގެ ފަރާތުން ފޮނުއްވަންހުރި ބިލްތަކާމެދު މަޝްވަރާ ކުރެއްވި ކަމަށް ހީނާ ވިދާޅުވިއެވެ. އަދި މި ބައްދަލުކުރެއްވުމަކީ، މިދިޔަ އަހަރުވެސް ކޮންމެ ދައުރެއްގެ ކުރީކޮޅު ކުރިއަށްގެންދަވާފައިވާ ފަދަ މަޝްވަރާ ބައްދަލުވުމެއް ކަމަށް ވެސް ހީނާ ވިދާޅުވިއެވެ.
