ސުންގަޑި އަށް އިސްރާއީލުގެ ސިފައިން ލުބުނާނުން ފައިބާ ނުނިންމި

އިސްރާއީލުގެ ސިފައިން ލުބުނާނުން ފައިބާ ނިންމަން ޖެހޭ ސުންގަޑި އަންގާރަ ދުވަހަށް ހަމަވިއިރު، ލުބުނާނުގެ ދެކުނުގެ ފަސް ޕޯސްޓެއްގައި އިސްރާއީލު ސިފައިން ބައިތިއްބާނެ ކަމަށް ބުނެފިއެވެ.

އިސްރާއީލު ޑިފެންސް ފޯސަސް (އައިޑީއެފް) ގެ ތަރުޖަމާނު ހޯމަ ދުވަހު ބުނި ގޮތުގައި، "އަހަރެމެންގެ ރައްޔިތުން ދިފާޢުކުރުމަށާއި ކުއްލި ނުރައްކަލެއް ނެތްކަން ޔަޤީންކުރުމަށްޓަކައި" ލުބުނާނުގެ އައުޓްޕޯސްޓްތަކުގައި ސިފައިން ބައިތިއްބާނެއެވެ.

އިސްރާއީލުގެ ސިފައިން ވޭތުވެދިޔަ ދުވަސްތަކުގައި ލުބުނާނުގެ މީހުން ދިރިއުޅޭ ސަރަޙައްދުތަކުން ފައިބާފައިވާ ކަމަށް ބެލެވެއެވެ. ލުބުނާނުގެ ސިފައިން އަންގާރަ ދުވަހުގެ ހެނދުނު ވަނީ ލުބުނާނުގެ ދެކުނުގެ އެކި ރަށްތަކަށް އަލަށް ސިފައިން ފޮނުވާފައިވާ ކަމަށް އިޢުލާނުކޮށްފައެވެ.

ލުބުނާނުގެ ރިޔާސަތުން އަންގާރަ ދުވަހު ނެރުނު ބަޔާނެއްގައި ބުނެފައިވަނީ، ލުބުނާނުގެ ސަރަޙައްދުގައި އިސްރާއީލުގެ ސިފައިންގެ އެއްވެސް ބަޔަކު ތިބިނަމަ އެއީ "ހިސޯރުކުރުން" ކަމުގައި ބަލާނެ ކަމަށާއި، އިސްރާއީލު ސިފައިން އެތަނުން ފައިބާކަން ޔަޤީންކުރުމަށް "ހުރިހާ ވަސީލަތެސީލަތެއް" ބޭނުންކުރުމުގެ ޙައްޤު ލިބިގެންވާ ކަމަށެވެ.

އަނެއްކޮޅުން ހިޒްބުﷲ އިން އިސްރާއީލުގެ ބާކީ ތިބި ސިފައިންނާ ދެކޮޅަށް ވަގުތުން ހަނގުރާމައެއް ފަށާނެކަމުގެ އިޝާރާތެއް ދީފައެއް ނުވެއެވެ. އެ ޖަމާޢަތުގެ އަލް މަނާރު ޓީވީން އަންގާރަ ދުވަހު އިޢުލާނުކުރި ގޮތުގައި ލުބުނާނުގެ ދެކުނު "އަނބުރާ ލިބިފައިވަނީ ޝަހީދުންގެ ލޭގެ ސަބަބުން" ނެވެ.

އިސްރާއީލާއި ހިޒްބުﷲ އާ ދެމެދު އަހަރު ދުވަހުގެ ހަނގުރާމަ އެއް ނިމުމަކަށް އައީ ނޮވެމްބަރު މަހު، އެމެރިކާގެ މެދުވެރިކަމާއެކު ހެދުނު ހަނގުރާމަ ހުއްޓާލުމުގެ އެއްބަސްވުމަކުންނެވެ. އިސްރާއީލުން އެދުމުގެ މަތިން، އިސްރާއީލުގެ ސިފައިން ފައިބަން ކަނޑައެޅިފައިވާ ސުންގަޑި ޖެނުއަރީ މަހުގައި އޮތް ނަމަވެސް، ފެބްރުއަރީ 18 އަށް ވަނީ ފަސްކޮށްފައެވެ.