ސަޢޫދީ ޢަރަބިއްޔާގެ ޚާރިޖީ ވަޒީރު އަމީރު ފައިޞަލް ބިން ފަރްޙާން، އެމެރިކާގެ ސްޓޭޓް ސެކްރެޓަރީ މާކޯ ރޫބިއޯއާ ހޯމަ ދުވަހު ރިޔާޟްގައި ހުންނަ ޚާރިޖިއްޔާގެ މައި އޮފީހުގައި ބައްދަލުކުރައްވައިފިއެވެ.

ކުރިން ރޭވިފައިވާ ގޮތަށް އެމެރިކާގެ އޮފިޝަލް ރިޔާޟަށް ކުރައްވާ މި ދަތުރުފުޅު ދިމާވެފައިވަނީ، އަންގާރަ ދުވަހު ރިޔާޟް ގައި ޔުކްރެއިން ހަނގުރާމަ އާ ގުޅޭގޮތުން އެމެރިކާ-ރަޝިޔާ މަޝްވަރާތައް ބާއްވާ ދަނޑިވަޅާއެވެ.

އެމެރިކާގެ ނެޝަނަލް ސެކިއުރިޓީ އެޑްވައިޒަރ މައިކް ވޯލްޓްޒް އަދި މެދުއިރުމަތީގެ ސަފީރު ސްޓީވް ވިޓްކޮފް ހޯމަ ދުވަހު ސަޢޫދީގެ ވެރި ރަށަށް ވަޑައިގަންނަވާ ގޮތައް ވަނީ ހަމަޖެހިފައެވެ. އެ ބޭފުޅުން ރޫބިއޯއާ ގުޅިވަޑައިގެން ރަޝިޔާގެ ވަފުދަކާއެކު މަޝްވަރާތައް ކުރިއަށް ގެންދަވާނެއެވެ. ކްރެމްލިންގެ ބަޔާނެއްގައި ބުނެފައިވާ ގޮތުގައި، ރަޝިޔާގެ ޚާރިޖީ ވަޒީރު ސަރްގޭ ލަވްރޯވް އަދި ރައީސް ވްލަޑިމިއަރ ޕުޓިންގެ ޚާރިޖީ ސިޔާސަތާ ބެހޭ މުޝީރު ޔޫރީ އުޝަކޯވް މި މަޝްވަރާތަކުގައި ބައިވެރިވެ ވަޑައިގަންނަވާނެ އެވެ.