ރައީސް މުއިއްޒުގެ ވެރިކަން ބަދަލުކުރެވޭނެ އެހެން ނިޒާމެއް ހޯދުމަށް ރައްޔިތުން ނުކުމެ މަސައްކަތް ކުރަންޖެހޭ: ސަނީފް
ރައީސް މުއިއްޒު ވެރިކަމަށް ގެނައުމަށް މަސައްކަތް ކުރެވުން އެއީ ކުށެއްކަން ގިނަ ރައްޔިތުން ގަބޫލުކުރޭ
އެމްޑީޕީ ހަރުގެ ޖަލްސާގައި ރައްޔިތުން މަޖިލީހުގެ ތިނަދޫ ދެކުނު ދާއިރާގެ ކުރީގެ މެންބަރު އަބްދުﷲ ސަނީފް ވާހަކަދައްކަވަނީ
ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ ވެރިކަން ބަދަލުކުރެވޭނެ އެހެން ނިޒާމެއް ހޯދުމަށް ރައްޔިތުން ނުކުމެ މަސައްކަތް ކުރަންޖެހޭ ކަމަށް ރައްޔިތުން މަޖިލީހުގެ ތިނަދޫ ދެކުނު ދާއިރާގެ ކުރީގެ މެންބަރު އަބްދުﷲ ސަނީފް ވިދާޅުވެއްޖެއެވެ.
ބުރާސްފަތި ދުވަހުގެ ރޭ ކުރިއަށް ގެންދިޔަ އެމްޑީޕީ ހަރުގެ ޖަލްސާގައި ސަނީފް ވިދާޅުވީ މިސަރުކާރަށް އަލަށް މިގައުމުގައި އެއްވެސް ތަރައްގީގެ މަޝްރޫއެއް ހިންގިފައިނުވާ ކަމަށާއި، ގިނަ މަޝްރޫއުތައް ހުއްޓުވާފައިވާ ކަމަށެވެ. މިއީ ރައްޔިތުންނަށް ހައްގު މިންވަރު ނޫން ކަމަށް އޭނާ ވިދާޅުވިއެވެ.
ސަނީފް ވިދާޅުވީ ރިޔާސީ އިންތިޚާބުގެ ކެންޕޭންގެ ތެރޭގައި ރައީސް މުއިއްޒު ދެއްކެވި ގިނަ ވާހަކަފުޅުތައް ރައްޔިތުން ގަބޫލުކުރި ކަމަށާއި، އެމަނިކުފާނަށް ވަރަށް ބޮޑަށް އިތުބާރު ކުރި ކަމަށެވެ. ނަމަވެސް މިހާރު ގައުމުގައި ކަންކަން ހިނގާ ގޮތުން އެއިތުބާރު ގެއްލިފައިވާ ކަމަށް ސަނީފް ވިދާޅުވިއެވެ. ރައީސް މުއިއްޒު ވެރިކަމަށް ގެނައުމަށް މަސައްކަތް ކުރެވުން އެއީ ކުށެއްކަން ގިނަ ރައްޔިތުން މިއަދު ގަބޫލުކުރާކަން ފާހަގަކުރައްވައި ސަނީފް ވިދާޅުވީ މިވެރިކަން ބަދަލުކުރެވޭނެ އެހެން ނިޒާމެއް ހޯދުމަށް މިއަދު ރައްޔިތުން ނުކުމެ މަސައްކަތް ކުރަންޖެހޭ ކަމަށެވެ.
ރައީސް މުއިއްޒުގެ ދޮގުތައް ގިނަ ރައްޔިތުން ގަބޫލުކުރި ސަބަބުތަކަށް އިޝާރާތް ކުރައްވައި ސަނީފް ވިދާޅުވީ އެދުވަސްވަރު އެމްޑީޕީ އެތެރޭގައި ހިޔާލު ތަފާތުވުން އުފެދިފައިވާ ކަމަށާއި، ޕާޓީ ދެކަފިވެގެން ދިޔަ ކަމަށެވެ. އަދި ރައްޔިތުންނަށް ދޭންޖެހޭ ސަމާލުކަން ނުދެވުނު ކަމަށް އޭނާ ވިދާޅުވިއެވެ.
ސަނީފް ވިދާޅުވީ އެމްޑީޕީގެ ވެރިކަން ފިޔަވައި އެހެން ވެރިކަންތަކުގައި ރައްޔިތުންނަށް ތަކުލީފު އުފުލަންޖެހިފައިވާ ކަމަށާއި، މިސަރުކާރުގައި މާބޮޑަށް ރައްޔިތުންނަށް އުދަނގޫތައް ކުރިމަތިކުރުވަމުންދާ ކަމަށެވެ. އެމްޑީޕީއަކީ ހުރިހާ ރައްޔިތުންނަށް ފައިދާވާ ގޮތަށް ގައުމުގައި ކަންކަން ކުރާ ހަމައެކަނި ޕާޓީ ކަމަށް ސަނީފް ވިދާޅުވިއެވެ. އެގޮތުން މަތީތައުލީމަށް ސަލާން ޖެހުން ހުއްޓުވައި ހިލޭ ޑިގްރީ ޕްރޮގްރާމް ފެށުމާއި، މުވައްޒަފުންނަށް ލިބެންޖެހޭ ހައްގު އުޖޫރަ ހޯދައިދިނުމާއި، ކުޑަ ރަށެއް ބޮޑު ރަށެއް ނުބަލައި ތަރައްގީގެ މަޝްރޫއުތައް ކުރިއަށް ގެންދިޔަކަން އޭނާ ފާހަގަކުރެއްވިއެވެ.
މީގެ އިތުރުން ސަނީފް ވިދާޅުވީ 2008 ވަނަ އަހަރު މަސައްކަތް ކުރި ގޮތަށް މިއަދު ވެސް މަސައްކަތް ކުރަންޖެހޭ ކަމަށާއި، ރިޔާސީ ނިޒާމަށް ބޮޑު ބަދަލެއް ގެންނަންޖެހޭ ކަމަށެވެ. އަދި މި ނިޒާމު ހަރުދަނާކުރަންޖެހޭ ކަމަށް ސަނީފް ވިދާޅުވިއެވެ. އެހެންނޫން ކަމަށްވާނަމަ ވެރިކަމަށް އަންނަ ބޭފުޅާ ނުހައްގުން ބާރުގެ ބޭނުންކޮށް، އަނިޔާވެރިކަން އިސްކުރާނެ ކަމަށް ސަނީފް ވިދާޅުވިއެވެ.
