މައްޗަންގޮޅި އުތުރު ދާއިރާގެ މެމްބަރ މަޖިލީހުގެ އިމްތިޔާޒު ނަހަމަގޮތުގައި ބޭނުންކޮށް ޓެކްސީ ޑްރައިވަރުންގެ ބޮލުގައި މަރުގެ ތުޙުމަތުއެޅޭ ގޮތަށް ދެއްކި ވާހަކަތައް ކުށްވެރިކޮށްފި
ޑްރައިވަރުންގެ އިހުތިޖާޖުގެ ސަބަބުން މީހަކު މަރުވިކަމަށްބުނެ ރައްޔިތުންގެ ހިތުގައި ޓެކްސީ ޑްެރައިވަރުންނާ ދޭތެރޭ ބިރުވެރިކަމާއި ނަފުރަތު އުފެދޭ ގޮތަކަށް ރައްޔިތުންގެ މަޖިލިސް އިން ލިބިދޭ ޤާނޫނީ އިމްތިޔާޒުގެ ދިފާއު ނާޖާއިޒު ގޮތުގައި ބޭނުން ކުރުމަކީ ވަރަށް ދަށު ދަށުދަރަޖައިގެ ޢަމަލެއްކަމަށް އެ ޖަމިއްޔާއިން ބުނެފައިވެއެވެ.
މެންބަރު އިބްރާހިމް މުހައްމަދު
މައްޗަންގޮޅި އުތުރު ދާއިރާގެ މެމްބަރު މަޖިލީހުގެ އިމްތިޔާޒު ނަހަމަ ގޮތުގައި ބޭނުންކޮށް ޓެކްސީ ޑްރައިވަރުންގެ ބޮލުގައި މަރުގެ ތުހުމަތުއެޅޭ ގޮތަށް ދެއްކި ވާހަކަތައް ޑްރައިވަރުންގެ ޖަމްއިއްޔާ އިން ކުށްވެރި ކޮށްފިއެވެ.
އެ ޖަމްއިއްޔާ އިން ބުނީ ޓެކްސީ ޑްރައިވަރުންގެ އިހުތިޖާޖު ކުރިވަގުތު އެއްވެސް މިންވަރަކަށް އެންބިއުލާސްއަކަށް ހުރަސް އަޅާފައި ނުވާނެ ކަމަށެވެ. އަދި އެކަމުގެ ސަބަބުން މީހަކު މަރުވި ކަމަށް ބުނެ ރައްޔިތުންގެ ހިތުގައި ޓެކްސީ ޑްރަވަރުންނާއި ދޭތެރޭ ބިރުވެރިކަމާއި ނަފުރަތު އުފެދޭ ގޮތަކަށް ރައްޔިތުންގެ މަޖިލިސް އިން ލިބިދޭ ޤާނޫނީ އިމްތިޔާޒުގެ ދިފާއު ނާޖާއިޒު ގޮތުގައި ބޭނުން ކުރުމަކީ ވަރަށް ދަށު ދަށުދަރަޖައިގެ ޢަމަލެއް ކަމަށް އެ ޖަމްއިއްޔާ އިން ބުނެފައިވެއެވެ. އަދި އެކަން އެ ޖަމްއިއްޔާ އިން ވަނީ އެންމެ ހަރުކަށި އިބާރާތުން ކުށްވެރި ކޮށްފައެވެ.
"ޓެކްސީ ޑުރައިވަރުން އަބަދުވެސް މަސައްކަތް ކޮށްފައިވާނީ ޤާނޫނީ އިމުގެ ތެރެއިންނެވެ. އަދި އެކި ފަހަރު މަތިން ސަރުކާރާއި ކުރެވުނު މަޝްވަރާގެ ތެރޭން ހައްލެއް ނުލިބުމާއި، އެފަހަރު އެކި ގޮތަށް މިނިސްޓަރު ޖަވާބު ދެއްވުމާއި، ސަރުކާރުން މިވީ ހާތަނަށް އެއްވެސް ކަމެއް ހައްލު ކޮށްދީފައި ނުވާތީ އިހުތިޖާޖު ކުރީވެސް ޤާނޫނުން ލިބިޖޭ ހައްގުތަކުގެ ތެރެއިންނެވެ."ޑްރައިވަރުންގެ ޖަމްއިއްޔާ
އަދި އެރޭގެ މުޒަހަރާ ނިންމާލުމަށް ފަހު ހިނގައިދިޔަ އެއްވެސް ކަމެއްގައި ފުލުހުންގެ އަމުރަށް ނުކިޔަމެންތެރި ކަމެއް ނުދައްކާ ކަމުގެ އެންމެ އަލިގަދަ ހެއްކަކީ ފުލުހުންނާއި ޑްރައިވަރުންނާއި ދެމެދު އެއްވެސް ކުރިމަތިލުމެއް ހިނގާފައި ނުވުން ކަމުގައި އެ ޖަމްއިއްޔާ އިން ބުނެފައިވެއެވެ. ޓޯކުރި ކާރުތައް ވެސް ޓޯ ކޮށްފައި ވަނީ ފުލުހުންގެ އަމުރަށް ދުއްވާފައިގޮސް ފުލުހުން ބުނި ތަނަކަށް ދިޔުމަށް ފަހުގައި ކަމަށް އެ ޖަމްއިއްޔާ އިން ބުނެއެވެ.
ޑްރައިވަރުންގެ ޖަމްއިއްޔާގެ ބަޔާނުގައި ބުނެފައިވަނީ މިކަމުގައި ޑްރައިވަރުންނާއި ޑްރައިވަރުންގެ އާއިލާތަކަށް އަދުގެ ސަރުކާރުން ދީފައި ވަނީ ވަރަށް ބޮޑު ގެއްލުމެއް ކަމީ ކަށަވަރު ކަމެއް ކަމަށެވެ.
