ހުރިހާ ރަހީނުން ހޮނިހިރު ދުވަހު މެންދުރަށް ދޫކޮށް ނުލައިފިނަމަ ޣައްޒާ ނަރަކަ އަކަށް ވެދާނެ ކަމުގެ އިންޒާރު ޓްރަމްޕް ދެއްވައިފި

ފަލސްތީނުގެ ހަމާސް ޖަމާއަތުން ބަންދުކޮށްފައިވާ އިސްރާއީލުގެ އެންމެން އަންނަ ހޮނިހޮރު ދުވަހުގެ މެންދުރާ ހަމަ އަށް ދޫކޮށް ނުލައިފިނަމަ ޣައްޒާ 'ނަރަކައަކަށް' ބަދަލުވެދާނެ ކަމަށް ވިދާޅުވެ އެމެރިކާގެ ރައީސް ޑޮނަލްޑް ޓްރަމްޕް އިންޒާރު ދެއްވައިފިއެވެ. 

އެމެރިކާގެ ރައީސް ޑޮނަލްޑް ޓްރަމްޕް ހޯމަ ދުވަހު ވިދާޅުވީ އެ ވަގުތާ ހަމަ އަށް އެންމެން ދޫކޮށް ނުލައިފިނަމަ އިސްރާއީލާއި ހަމާސްއާ ދެމެދު ހަދާފައިވާ ހަނގުރާމަ ހުއްޓާލުމުގެ އެއްބަސްވުން ބާޠިލުކުރުމަށް ހުށަހަޅުއްވާނެ ކަމަށާއި އެހިސާބުން ޣައްޒާ "ނަރަކަ އަކަށް ބަދަލުވާން" ދޫކޮށްލައްވާނެ ކަމަށެވެ. 

ޓްރަމްޕް ވިދާޅުވީ މި މައްސަލައިގައި އިސްރާއީލުގެ ބޮޑުވަޒީރު ބެންޖަމިން ނަތަންޔާހޫއާ ވާހަކަފުޅު ދައްކަވާފާނެ ކަމަށެވެ. 

އޯވަލް އޮފީހުގައި ނޫސްވެރިންނާއެކު ބޭއްވި ފުޅާ ދާއިރާއެއްގެ މައުޟޫއު ތަކަށް ވާހަކަ ދެކެވުނު ބައްދަލުވުމެއްގައި، ޓްރަމްޕް ފާހަގަ ކުރެއްވީ ހަމާސް އިން އެންމެ ފަހުން ދޫކޮށްލި ރަހީނުންގެ ގްރޫޕުގެ ހާލަތާމެދު ހިތްހަމަނުޖެހޭ ކަމަށާއި، އިތުރު ރަހީނުން ދޫކޮށްނުލާނެ ކަމަށް ހަމާސްއިން އިޢުލާނުކުރި ކުރުމާމެދު ވެސް ހިތްހަމަ ނުޖެހޭކަމަށެވެ. 

"އަހަރެންނަށް ފެންނަ ގޮތުގައި، ހޮނިހިރު ދުވަހުގެ 12 ޖަހާއިރަށް ހުރިހާ ރަހީނުން ދޫކޮށްލަން ޖެހޭނެ، އެއީ އެކަށީގެންވާ ވަގުތެއް ކަމަށް އަހަރެން ދެކެން. އަހަރެން ބުނާނީ، އެއްބަސްވުން ބާޠިލުކޮށް، ހުރިހާ ވަޢުދުތަކެއް ނިމުމަކަށް ގެނެސް، 'ނަރަކަ ފެށުމަށް' ދޫކޮށްލާށޭ. އަހަރެން ބުނާނީ ހޮނިހިރު ދުވަހުގެ 12 ޖަހާއިރަށް އެމީހުން އަނބުރާ ގެންނަންވާނެ ކަމަށް،" ޓްރަމްޕް ވިދާޅުވިއެވެ. 

ޓްރަމްޕް ބޭނުންފުޅު ވަނީ މަދުމަދުން ގްރޫޕް ގްރޫޕަށް މީހުން ދޫކޮށްލުމުގެ ބަދަލުގައި އެއްފަހަރާ ހުރިހާ ރަހީނުން ދޫކޮށްލުމަށެވެ.

"އަހަރެމެން ބޭނުންވަނީ އެންމެން އަނބުރާ ގެނައުމަށް." 

ޓްރަމްޕްގެ މި ނޫސް ކޮންފަރެންސް ގައި ވިދާޅުވީ ޣާއްޒާ އިން ބަދަލުކުރެވޭ ފަލަސްޠީނު ރެފިއުޖީން ބަލައިނުގަންނަ ނަމަ، އުރުދުން އާއި މިޞްރަށް ދޭ އެހީ ހުއްޓާލައްވާނެ ކަމަށެވެ. ޓްރަމްޕް އަންގާރަ ދުވަހު އުރުދުންގެ ރަސްގެފާނު ޢަބްދުﷲއާ ބައްދަލުކުރައްވާ ގޮތައް ވަނީ ހަމަ ޖެހިފައެވެ. 

ޙަމާސްގެ ހަތިޔާރުއެޅި ބައިގެ ތަރުޖަމާނަކު އިއުލާނު ކޮށްފައިވަނީ ރަހީނުން ދޫކޮށްލުން ވަކި ތާރީޚެއް ނެތް ގޮތައް ފަސްކުރަން ނިންމާފައިވާ ކަމަށެވެ. ސަބަބެއް ކަމަށް ބުނެފައިވަނީ ހަނގުރާމަ ހުއްޓާލުމުގެ އެއްބަސްވުމާ އިސްރާއީލުން ޚިލާފުވެފައިވާތީ ކަމުގައެވެ. 

ކުރިން ހަމަ ޖެހިފައި އޮތީ އިތުރު ތިން ރަހީނުން ހޮނިހިރު ދުވަހު ދޫކޮށްލާ ގޮތަށެވެ. 

އިސްރާއީލުގެ ދިފާޢީ ވަޒީރު އިސްރާއީލް ކަޓްޒް ވިދާޅުވީ ޙަމާސްގެ ނިންމުމަކީ "ހުއްޓުމަކަށް އައިސްފައިވާ ހަނގުރާމައާ ބެހޭ އެއްބަސްވުމާ މުޅިން ޚިލާފުވުމެއް؛" ކަމަށެވެ. 

"އަހަރެން ބުނަން ބޭނުންވަނީ އެމީހުން އަނބުރާ ގެންނަންވާނީ ހޮނިހިރު ދުވަހުގެ މެންދުރު 12 ޖަހާއިރު... އެންމެން އެކުގައި، އެކަކު ދެމީހުން، ނޫނީ އެކަކު، ތިން މީހުން، ހަތަރު މީހުން، ދެ މީހުން އެ ގޮތަކަށް ނޫން" ޓްރަމްޕް ވިދާޅުވިއެވެ.

ޓްރަމްޕްގެ އިންޒާރަށް ހަމާސް އިން ވަނީ ރައްދު ދީފައެވެ. ހަމާސް އިން ބުނެފައިވަނީ ހަނގުރާމަ ނިމުމަކަށް ގެނައުމަށް ދެފަރާތުން ވެސް ޒިންމާ ފުރިހަމަ އަށް އަދާ ކުރަންވާނެ ކަމަށެވެ.

"ޓްރަމްޕް އަށް އެނގިވަޑައިގަންނަވަން ވާނެ ޣައްޒާގައި ހަނގުރާމަ ހުއްޓުން ދެމިއޮތުމަށްޓަކައި ދެފަރާތުން ވެސް އެމީހުންގެ ޒިންމާތަކާ އެއްގޮތަށް ޢަމަލު ކުރަން ޖެހޭނެ ކަން. މިއީ [އިސްރާއީލުގެ] ހަމަ އެކަނި ރަހީނުން އަނބުރާ ގެންދިއުމަށް އޮތް ކަމެއް ނޫން" ކަމަށް ޙަމާސްގެ ސިޔާސީ ބިއުރޯގެ އިސް މެންބަރެއް ކަމުގައިވާ ސާމީ އަބޫ ޒުހްރީ ވިދާޅުވިއެވެ 

އޭނާ އިތުރަށް ވިދާޅުވީ، "ބިރުދެއްކުމުގެ ބަސްތަކަކީ އެއްވެސް އަގެއް ހުރި އެއްޗެއް ނޫން. އަދި އެއިން ކަންކަން އިތުރަށް އުނދަގޫ ވެގެން ދިޔުން ނޫން އެހެން ކަމެއް ނުވާނެ."