މެންޗެސްޓަރ ޔުނައިޓެޑް ގައި މަސައްކަތް ކުރާއިރު، ތަށިތަކެއް ކާމިޔާބު ކުރުމަކީ ކޮންމެހެން ވެސް ކުރަން ޖެހޭނެ ކަމެއް ކަމަށް އެ ޓީމަށް އިރުޝާދު ދެމުން އަންނަ ޕޯޗުގަލްގެ ރުބެން އަމޯރިމް ބުނެފި އެވެ.

އޭނާ މިހެން ބުނީ، ޔުއެފާ ޔޫރޮޕާ ލީގުގައި ސްޓެއުއާ ބުކަރެސްޓްއާ ދެކޮޅަށް ކުޅުނު މެޗުން މޮޅުވެ، މުބާރާތުގެ ގަދަ 16 ވަނަ ބުރުން ޔުނައިޓެޑު ޖާގަ ހޯދި މެޗަށްފަހު ނޫސްވެރިންނާ ވާހަކަ ދައްކަމުންނެވެ.

އަމޯރިމް ބުނީ، އެ މެޗުގައި ވެސް ޔުނައިޓެޑުގެ ކުޅުމަކުން މާބޮޑު ތަފާތުތަކެއް ފާހަގަވާން ނެތް ކަމަށާއި، ނަމަވެސް އެ މެޗުގައި ރަނގަޅު ކަންތައްތަކެއް ފެނުނު ކަމަށެވެ. ޔުނައިޓެޑުން ކުރިއަށް ދާން ބޭނުންވާ ވިސްނުމާއި، އެ ޓީމުގެ ޕްލޭން ވެސް އޮތީ ހަމަ އެއްގޮތެއްގައި ކަމަށާއި، ވަގުތު ލިބިގެން ކުރިއަށްދާ ވަރަަކަށް ބަދަލު އަންނަ މަންޒަރު ފެންނަ ކަމަށް ވެސް އަމޯރިމް ވަނީ ބުނެފަ އެވެ.

މީގެ އިތުރުން އަމޯރިމް ބުނީ އޭނާ ޤަބޫލު ކުރާ ގޮތުގައި މެޗަަކަށްފަހު މެޗަކުން ކުރިއަށް ގޮސް، ޔުނައިޓެޑަށް ޔޫރޮޕާ ލީގު ކާމިޔާބު ކުރެވޭނެ ކަމަށެވެ. އެކަމުގައި ޔުނައިޓެޑުގެ ކުޅުންތެރިންނާއި، އޭނާ އަށް ވެސް އޮތީ ވަރަށް ބޮޑު ޒިންމާއެއް ކަމަށް އަމޯރިމް ދެކެ އެވެ. އަދި ކޮންމެ ޙާލަތެއް އޮތް ނަމަވެސް، ޔުނައިޓެޑުގައި ކުރިއަށްދާއިރު ތަށިތަކެއް ކާމިޔާބު ކުރަން ޖެހޭނެ ކަމަށް ވެސް އަމޯރިމް ވަނީ ބުނެފަ އެވެ.

ޔުނައިޓެޑު މިހާރު ނެރެމުން އަންނަ ނަތީޖާއާ ގުޅޭ ގޮތުން ވާހަކަ ދައްކަމުން އަމޯރިމް ބުނީ، މިހާ ހިސާބަަށް އަންނައިރު ކޮންމެ ކަމެއް ވެސް ޙާސިލު ކުރެވިދާނެ ކަމާއި، ކޮންމެ ޓީމެއް ވެސް ބަލި ކުރެވިދާނެކަން ސާބިތު ކޮށްދެވޭނެ ކަމަށެވެ. ލީގު ބުރުގެ ގަދަ ތިނެއްގައި އޮވެ ޔުނައިޓެޑަށް އަނެއް ބުރުން ޖާގަ ލިބުމަކީ ވެސް އަމޯރިމް އަށް އޮތް ހިތްހަމަ ޖެހުމެކެވެ.

ޔޫރޮޕާ ލީގުގެ ގަދަ 16 ވަނަ ބުރުން ޔުނައިޓެޑު ޖާގަ ހޯދިއިރު، މިހާތަނަށް ބަލި ނުވެ އޮތް ހަމައެކަނި ޓީމަކީ ވެސް ޔުނައިޓެޑެވެ. އެ ޓީމު ވަނީ ކުޅުނު އަށް މެޗުގެ ތެރެއިން ފަސް މެޗުން މޮޅުވެ، ތިން މެޗުން އެއްވަރުވެފަ އެވެ.

ޔުނައިޓެޑުގެ ކޯޗުކަމާ އަމޯރިމް ހަވާލުވީއިރު އެ ޓީމުގެ ނަތީޖާތައް ވަރަށް ބޮޑަށް ދަށްވެފައި އޮތްއިރު، އޭނާ އަށް ވެސް ޕްރެޝަރު ބޮޑުވި އެވެ. އަމޯރިމްގެ އިރުޝާދުގެ ދަށުން ޔުނައިޓެޑު އެންމެ ފުރަތަމަ ކުޅުނު 10 މެޗުގެ ތެރެއިން ފަސް މެޗެން އެ ޓީމު ބަލިވެފައިވެ އެވެ.

އެއީ 1932 ވަނަ އަހަރުގެ ފަހުން ފުރަތަމަ 10 މެޗުގެ ތެރެއިން ފަސް މެޗުން ބަލިވި ފުރަތަމަ ކޯޗެވެ. ނަމަވެސް ފަހަކަށް އައިސް ޔުނައިޓެޑުގެ ނަތީޖާތައް ރަނގަޅުވަމުން އަންނައިރު، އަމޯރިމް އަށް ވެސް ޕްރެޝަރު ކުޑަވަމުން އަންނަ ކަމަށް މީޑިއާ ތަކުގައި ވަނީ ރިޕޯޓުކޮށްފަ އެވެ.