ފަހަތުން އަރައި ބްރޫޖް ބަލިކޮށް، ސިޓީ ސަލާމަތްވެއްޖެ

ޔުއެފާ ޗެމްޕިއަންސް ލީގުގައި ކުލަބު ބްރޫޖާ ދެކޮޅަށް ކުޅުނު މެޗުން މޮޅުވެ، މެންޗެސްޓަރ ސިޓީން މުބާރާތުގެ ޕްލޭ އޮފް ބުރުން ޖާގަ ހޯދައި ސަލާމަތްވެއްޖެ އެވެ.

ސިޓީގެ އަމިއްލަ ދަނޑު، އިއްތިހާދު ސްޓޭޑިއަމްގައި ބުދަ ދުވަހުގެ ރޭ ކުޅުނު މެޗު އެ ޓީމުން ކާމިޔާބު ކުރީ 3-1 އިންނެވެ. އެއީ މެޗުގައި ބްރޫޖުން ލަނޑު ޖަހައި ކުރި ހޯދާފައި ވަނިކޮށް، ފަހަތުން އަރައި ތިން ލަނޑު ޖަހައިގެންނެވެ. މި ސީޒަންގައި ސިޓީގެ ނަތީޖާތައް ދަށްވެފައިވާއިރު، ސިޓީ އަށް ޗެމްޕިއަންސް ލީގުގައި ކުރިއަށް ދެވެން އޮތީ ވެސް އެ މެޗުން މޮޅުވެގެންނެވެ.

މެޗުގެ ފުރަތަމަ ހާފުގެ 45 ވަނަ މިނެޓުގައި ބްރޫޖަށް ލީޑު ނަގައިދިނީ ރަފައެލް އޮންޔެޑިކާ އެވެ. މެޗުގައި ސިޓީން އެ ޓީމުގެ ތިން ލަނޑު ވެސް ޖެހީ ދެ ވަނަ ހާފުގަ އެވެ. މެޗުގެ ދެ ވަނަ ހާފު ފަށައިގެން އަށް ވަނަ މިނެޓުގައި ސިޓީ އަށް ނަތީޖާ ހަމަހަމަ ކޮށްދިނީ މަތެއޯ ކޮވަސިޗް އެވެ. އެއީ ޖޯން ސްޓޯންސް ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ.

އޭގެ ފަހުން މެޗުގެ 62 ވަނަ މިނެޓުގައި ސިޓީ އަށް ލީޑު ލިބުނީ ބްރޫޖުގެ ޑިފެންޑަރު ޖޮއެލް އޯޑޮނޭޒް އަތުން ބައި ކޮޅަށް ވަތް ލަނޑުންނެވެ. މެޗުގައި ސިޓީގެ ތިން ވަނަ ލަނޑު ޖެހީ ސަވީނިއޯ އެވެ. މެޗުގެ 77 ވަނަ މިނެޓުގައި އެ ލަނޑު ޖަހަން ސަވީނިއޯ އަށް ފުރުސަތު ތަނަވަަސްކޮށްދިނީ ސްޓޯންސް އެވެ.

މޮޅާއެކު ސިޓީން މުބާރާތުގެ ޕްލޭ އޮފްގެ ޖާގަ ހޯދިއިރު، އެ ޓީމު އޮތީ 22 ވަނައިގަ އެވެ. އެއީ އެ ޓީމު ކުޅެފައިވާ އަށް މެޗުން 11 ޕޮއިންޓާ އެކު އެވެ. މުބާރާތުގެ ޕްލޭ އޮފްގައި ސިޓީ ވާދަކުރަން ޖެހޭނީ ރެއާލް މެޑްރިޑު ނުވަތަ ބަޔާން މިއުނިކާ އެވެ.