ރައީސް މުއިއްޒު ހިންގެވި އެންމެ ބޮޑު އެއް ޕްރޮޖެކްޓަކީ މިނިވަން މުއައްސަސާތައް ގޮށްމުށުގެ ތެރެއަށް ލެއްވުން: މެންބަރު އަހުމަދު ދީދީ

ރައީސުލްޖުމްހޫރިއްޔާ ޑރ.މުހައްމަދު މުއިއްޒު މިގައުމުގައި ހިންގެވި އެންމެ ބޮޑު އެއް ޕްރޮޖެކްޓަކީ މިނިވަން މުއައްސަސާތައް ގޮށްމުށުގެ ތެރެއަށް ލެއްވުން ކަމަށް ރައްޔިތުން މަޖިލީހުގެ މަރަދޫ ދާއިރާގެ މެންބަރު އަހުމަދު ދީދީ ވިދާޅުވެއްޖެއެވެ.

ބުދަ ދުވަހު ރާއްޖެޓީވީން ގެނެސްދިން ފުނޑިއްޖެ-ފުދިއްޖެ ޚާއްސަ ކަވަރޭޖްގައި މެންބަރު އަހުމަދު ދީދީ ވިދާޅުވީ ރާއްޖެ މިހާރު މިއޮތީ ބިރުވެރި ހާލަތެއްގައި ކަމަށާއި، ގައުމު ރަނގަޅު މިސްރާބަށް މި ވެރިކަމުގައި ދާނެ ކަމަށް އުންމީދު ނުކުރާ ކަމަށެވެ.

Advertisement

ރައީސް މުއިއްޒު ވެރިކަމާ ހަވާލުވެވަޑައިގެން ހިންގެވި އެންމެ ބޮޑު ޕްރޮޖެކްޓަކީ މިނިވަން މުއައްސަސާތައް ގޮށްމުށުގެ ތެރެއަށް ލެއްވުންކަން ފާހަގަކުރައްވައި މެންބަރު އަހުމަދު ދީދީ ވިދާޅުވީ ރައްޔިތުން މަޖިލީހުގެ ސުޕަ މެޖޯރިޓީއާއެކު ނުހައްގުން ބާރުގެ ބޭނުންކުރަމުންދާ ކަމަށެވެ. އެގޮތުން މިހާރު މިނިވަން މުއައްސަސާތަކީ ސަރުކާރުގެ މިނިސްޓްރީއަށް ނުވަތަ އޮފީހަކަށް ހަދައި ސަރުކާރު އޮޕަރޭޓް ކުރާ ތަނަކަށް ހަދާފައިވާ ކަމަށާއި، މިނިވަންކަން ނަގާލާފައިވާ ކަމަށް މެންބަރު އަހުމަދު ދީދީ ވިދާޅުވިއެވެ.

ޕީއެންސީއަށް ވަގު ފޯމް ހުށަހަޅާފައިވާ މައްސަލައަށް އިޝާރާތް ކުރައްވައި މެންބަރު އަހުމަދު ދީދީ ވިދާޅުވީ އިލެކްޝަން ކޮމިޝަން (އީސީ)އަކީ މިނިވަން މުއައްސަސާއެއް ނަމަވެސް މިއަދު އެމުއައްސަސާއަށް ރައްޔިތުންގެ އިތުބާރު ނެތް ކަމަށެވެ. ވަގު ފޯމް ހުށަހަޅާފައިވާކަން ޔަގީންކުރެވިފައިވާއިރު، އެކޮމިޝަނުން އެފޯމްތައް ބަލައިގަނެ، އެމައްސަލަތައް ބެލުމެއްނެތި ސިޔާސީ ޕާޓީތަކުގެ ލިސްޓް އާއްމުކޮށްފައިވަނީ ރައީސް މުއިއްޒުގެ ނުފޫޒުން ކަމަށް މެންބަރު އަހުމަދު ދީދީ ވިދާޅުވިއެވެ.

މެންބަރު އަހުމަދު ދީދީ ވިދާޅުވީ ވަގުފޯމާއެކު ވެސް ޕީއެންސީއަކީ އެންމެ ބޮޑު ސިޔާސީ ޕާޓީއަކަށް ހަދާފައިވަނީ ދައުލަތުގެ ފައިސާ ނަހަމަ ގޮތުގައި ބޭނުން ކުރުމަށް ކަމަށެވެ. އަދި މިހާރު އޮތްގޮތުން ނަމަ ސިޔާސީ ޕާޓީތަކަށް ފައިސާ ދޫކުރާއިރު، ޕީއެންސީއަށް ގިނަ އަދަދެއްގެ ފައިސާ ލިބޭނެ ކަމަށް އޭނާ ވިދާޅުވިއެވެ.

މީގެ އިތުރުން މެންބަރު އަހުމަދު ދީދީ ވިދާޅުވީ ގައުމުގައި ހިންގާ މިފަދަ މައްސަލަތައް ބަލާނެ ވެސް މިނިވަން މުއައްސަސާއެއް ނެތް ކަމަށާއި، އެންޓި ކޮރަޕްޝަން ކޮމިޝަން (އޭސީސީ)ގެ ވެސް އިތުބާރު ނަގާލައި، ބާރުތައް ނަގާފައިވާ ކަމަށެވެ.

މެންބަރު އަހުމަދު ދީދީ ވިދާޅުވީ ރައީސް މުއިއްޒަކީ ވަރަށް މަކަރުވެރިކަމާއެކު ވަރަށް ފްލޭން ކޮށްގެން ބާރުތައް ނެގުމަށް ކަންތައްތައް ކުރައްވާ ރައީސްއެއް ކަމަށެވެ. ޚާއްސަކޮށް ދޮގާއި މަކަރާއި ހީލަތުން ވަރަށް ގިނަ ކަންތައްތަކެއް ކުރައްވަމުން ގެންދަވާ ކަމަށާއި، ރައްޔިތުންގެ ގާތަށް ގޮސް، ހަގީގަތް ފެންނަން ހުންނަ ކަންކަމުގައި ވެސް ދޮގު ހައްދަވަމުން ގެންދަވާ ކަމަށް މެންބަރު އަހުމަދު ދީދީ ވިދާޅުވިއެވެ.