މިއަދު ދިވެހި ރައްޔިތުން ތިބީ ރައީސުލްޖުމްހޫރިއްޔާ ޑޮކްޓަރު މުޙައްމަދު މުޢިއްޒު އަށް ނޫނެކޭ ބުނެގެން ކަމަށް، ރައްޔިތުންގެ މަޖިލީހުގެ ކެންދޫ ދާއިރާގެ މެމްބަރު މަޢުރޫފް ޛާކިރު ވިދާޅުވެއްޖެ އެވެ.
މަޢުރޫފް މިހެން ވިދާޅުވީ ހުކުރު ދުވަހުގެ ރޭ، އިދިކޮޅު މައި ޕާޓީ، ދިވެހި ރައްޔިތުންގެ ޑިމޮކްރަޓިކް ޕާޓީ (އެމްޑީޕީ) އިން ކުރިއަށް ގެންދިޔަ "ފުދިއްޖެ ފުނޑިއްޖެ" އެއްވުމުގައި ބައިވެރިވެ ވަޑައިގެން ވާހަކަ ދައްކަވަނުންނެވެ.
އެގޮތުން މަޢުރޫފްް ވިދާޅުވީ ރައީސް މުޢިއްޒުގެ މި ސަރުކާރުން ރައްޔިތުން ބިކަކޮށްފައިވާ ކަމަށެވެ. ޚާއްސަކޮށް މަސައްކަތްތެރިންގެ ތެރެއިން ބޮޑު ބައެއް އޭގެ ތެރޭގައި ހިމެނޭ ކަމަށާއި، ޓުވަރިޒަމް އަދި މަސްވެރިކަމުގެ ސިނާއަތުގައި މަސައްކަތް ކުރާ މަސައްކަތްތެރިން ވަރަށް އުންމީދުގަައި ރައީސް މުޢިއްޒު ވެރިކަމަށް އިންތިޚާބު ކުރި ކަަމަށެވެ. އެގޮތުން ރައްޔިތުންގެ ޓެކްސް ފައިސާ އިން ފައިސާ ދީގެން ޚިދުމަތް ކުރަން ހަވާލު ކުރީމާ، ރައީސް މުޢިއްޒު ކުރައްވާ ކަމަކީ ރައްޔިތުން ބިކަ ކުރުން ކަމަށް މަޢުރޫފް ވިދާޅުވި އެވެ.
މަޢުރޫފް ވިދާޅުވީ ރައީސް މުޢިއްޒުގެ މަޤުސަދަކީ ކޮބައިކަމެއް ނުވިސްނޭ ކަމަށާއި، މަސައްކަތްތެރިކަމުގެ ސިނާއަތުގަައި އުޅޭ މީހުން އަދި ދިވެހި ރައްޔިތުން ބިކަ ކުރުމުގެ ބޭނުމެއް ވެސް ނުވިސްނޭ ކަމަށެވެ. އެގޮތުން ރިސޯޓު މުވައްޒަފުންނާއި، މަސްވެރިން އަދި މަސައްކަތްތެރި އެންމެނަށް އެތައް ކަމެއް ކޮށްދިނުމަށް ވައުދުވެ ވަޑައިގެންވި ކަަމަށާއި، ނަމަވެސް މިއަދާ ހަމައަށް އައިއިރު ދިމާ އިދިކޮޅަށް އަދި ރައްޔިތުން ބިކަ ކުރުމަށާއި، ރައްޔިތުން ޙާލުގައި ޖެއްސުމަށްޓަކައި ރައީސް މުޢިއްޒު މަސައްކަތް ކުރައްވާ ކަމަށް މެމްބަރު މަޢުރޫފް ވަނީ ވިދާޅުވެފަ އެވެ.
މީގެ އިތުރުން ރައީސް މުޢިއްޒު ގެންގުޅުއްވާ ސިޔާސަތަކީ ރައްޔިތުން ބިކަަ ކުރުމަށްފަހު، އިންތިޚާބުތަކުގައި ރައްޔިތުންނަށް ފައިސާ ދީގެން ވޯޓު ހޯދުމުގެ ސިޔާސަތު ކަމަށް މަޢުރޫފް ފާހަގަ ކުރެއްވި އެވެ. މިއަދު ދިވެހި ރައްޔިތުން ތިބީ ރައީސް މުޢިއްޒު އަށް ނޫނެކޭ ބުނެ، މާލޭގެ ބޮޑެތި މަގުތައް ފުރޭ ވަރަށް ރައްޔިތުން ނިކުމެ ކަމަށް މެމްބަރު މަޢުރޫފް ވިދާޅުވި އެވެ. ރައްޔިތުންގެ ނިކުތުމުން އަންގައި ދެނީ ރައްޔިތުންނަށް ފުދިއްޖެ ކަމަށާއި، ރައްޔިތުން ފުނޑިއްޖެ ކަމާއި އަދި ރައްޔިތުން ދެން ބޭނުން ވަނީ ރައީސް މުޢިއްޒުގެ އަނިޔާވެރި ވެރިކަން ބަދަލު ކުރުން ކަމަށް މަޢުރޫފް ވަނީ ވިދާޅުވެފަ އެވެ.
އެހެންވީމާ މިއަދު ދިވެހި ރައްޔިތުން މިތިބީ ރައީސް މުޢިއްޒަށް ނޫނެކޭ ބުނެ، މިއޮއްތީ މާލޭގެ މަގުތައް، ބޮޑެތި މަގުތައް ފުރޭ ވަރަށް ރައްޔިތުން ނިކުމެފައި. ރައްޔިތުން މި އަންގައިދެނީ ރައްޔިތުންނަށް ފުދިއްޖެއޭ، ރައްޔިތުން ފުނޑިއްޖެއޭ، ރައްޔިތުން ބޭނުމެއް ނޫނޭ ރައީސް މުޢިއްޒުގެ މި އަނިޔާވެރި ވެރިކަން، ބަދަލު ކުރާށޭ ބޭނުން ވަނީ، ރައްޔިތުން ގާތު އަޅުގަނޑުމެން އަހާލާއިރަށް ރައްޔިތުން މި ބުނަނީ މި ވެރިކަން ވައްޓާލާށޭ ބޭނުން ވަނީ.މަޢުރޫފް ޛާކިރު / ރައްޔިތުންގެ މަޖިލީހުގެ ކެންދޫ ދާއިރާގެ މެމްބަރު
މީގެ އިތުރުން މެމްބަރު މަޢުރޫފްް ވިދާޅުވެފައި ވަނީ ސިޔާސީ ޒިންމާދާރު އިދިކޮޅު ޕާޓީއެއްގެ ހައިސިއްޔަތުން ރައީސް މުޢިއްޒުގެ ސަރުކާރަށް އެންޑީޕީން ދައްކައި ދިނީ އަދި އިއްވައި ދިނީ ދިވެހި ރައްުޔިތުންގެ ޝުޢޫރު ކަމަށެވެ.
މިއީ ރައީސް މުޢިއްޒު ވެރިކަަަމަށް ވަޑައިގެންނެވި ފަހުންް އެމްޑީޕީން މަގު މަތީގެ ޙަރަކާތެއް ބޭއްވި ފުރަތަމަ ފަހަރެވެ. މީގެ ކުރިން މިދިޔަ އަހަރުގެ ޑިސެމްބަރު މަހު އެމްޑީޕީން ވަނީ ކާނިވަލް ސަރަހައްދުގައި ބޮޑު ޖަލްސާއެއް ބާއްވައިފަ އެވެ. އެ ޖަލްސާ ގައި ގިނަ އަދަދެއްގެ ރައްޔިތުން ބައިވެރިވެފައި އެވެ.
އޭގެ ފަހުން ހުކުރު ދުވަހުގެ އެމްޑީޕީން ބޭއްވި އެއްވުމުގައި ވެސް ވަނީ ގިނަ އަދަދެއްގެ ރައްޔިތުން ބައިވެރިވެފަ އެވެ. އެ އެއްވުމުގައި ބައިވެރިވި ރައްޔިތުން ވަނީ ރައީސް މުޢިއްޒުގެ އިސްތިއުފާ އަށް ވެސް ގޮވައިފަ އެވެ.